¹ ተህም ቀጥወ ሾᎄቀ ኢቨስርካ ኢሰፉርኰዳ አአር አውኝ፤ ሆርታ «ኧጎይታ ቤተ መቅደስቪ ህትቭ ኢንኧኰዳቭ ኤኤዲ ስፍር፤ በህሜ ኧጎይታ ኢሰጉጅታ ሁኗ መዝር ቧርኝ። ² ተቬተ መቅደስ ሰቻ አጋድ አነዳ ወረፐድ ጭን ቴእኩ አትስፍርኩ አአረማዊ ሰቭ አውዮታናአርአረማዊ ሰቭ ቈጠረ ከተማአርቭአ ውርኤት በኘ ኢድራደርኰዴ። ³ ኧውርቸ ሄቶኛ ጨርቅ ተኸደይተውዋታ አት ሁው ውርኤት በኧር ስድሳ ቀረ ትምቢት ኢዝረኩዋኸ ደረግ ኢኮቴ ⁴ እሞሁኗ አፈር በፈጠረ ጎይታ ኢፍቲ ኢትሸኮውዋታ ኧዌራ ኤኧቪ ውርኤት መቅረዝምኗ። ⁵ ማንኢሞኋ ሁኗ ኢጎዳይ ቢሲእ ፣እሳድ ታቃሁኗ ዌኤተታ ጠራትሁኗ ኢጀፕርኴ።ኢጎዳኮሜ ኢሲኢካ ሁዳ ሙድኋ ሀኸትን። ⁶ ዋ ሰቭ ትንቢት ቢዝሮኮታ በኘ ድየ አያድገኸ ሳቭይ ኢዞጎዋይ ዳኝነድ አነኖዋ፤ ህመኸቭ እሀ ደቭ ኢኸረኸ ቲሱእታ አፈር በቫንእየአአር ያአፎዋይ ዳኝነድ አነኖዋ። ⁷ ሄቶ አውጅተውዋ በጀፖሩዋ ቀጥወ ተሱዌር ኢዋአካ አዊ ተዋጌተ ኢኢምኮቴ ፣የኧትርኮቴቭ። ⁸ ኒሳሞሁኗ በሩኡየ ከተማይ ወረፐድ ኢቋሺዴ፤ እም ከተማ ሰዶምቪ ግብጽቭ ቧርም መርኸት ኤፖዊቪ፣ እም ከተማ ኧሁኗይ ጌታ ኧሶኦርኰ ኤኤድኔ። ⁹ ተዶበ ፣ተጥቭ ፣ቡችር ቡችር ቃር ቲዝሮክታ ሰቪ ኧዎኦዋ ሰቭ ሶኦስት ቀረ ተግት ኒሳሁኗ ያዥቴ፤ኒሳሞሁኗዋ ኢዎኩዮይ አዪውታ። ¹⁰ እም ውርኤት ነቢ ባአፈር ኢረውርታ ሰቭ ያድዋኝዋይ ኧረፐሬ፥በዋ ባአፈር ፎር ኢረውርታ ሰቭ በሁኖዋ በሰንአዎዋ ዘንጋ ኢሽርኮቴ፤ሁኖም ተሁኖም ኧጀ ቦቸ ኢትዋቾቴ። ¹¹ ተሶኦስት ቀረ ተግት ቀጥወ ጭን ሀ ኧዎጁዋ ውርኤት ሰቭ ሉህ ኢካ አንፏት ተጎይታይ ማአ ገፓዎም፤፤እም ተውንድ ውርኤት ሰቭ ተውንድ ተረሾምታ፤ያዢዮም በረፖሩዋ ሰቭ ኑእ ድሪኢት ወተኧዎም። ¹² ተህም ቀጥወ «ተሳቫይ «ዋይ !ዮሁዋ!»ዩኮታ ኑእ ቃር ተሳቫዪ ሰምኦም፤ጠራትሁኗ ቲያዢዮም ኧሳቫይኒየ ዎኦም። ¹³ ህም ግዝየ ኑእ አአፈር እፋድ ማአ፤ኧከተማቭ አት አስረኘኋ ኧፋ፤ባአፈርቭ ብእፋድ ሁዳ ሳቭአት ሁው ሰቭ ሞጁም፤ኧተነፉም ሁኗ ፈኞምታ ኧሩእ ጎይታ አኸቦጁም። ¹⁴ ኧውርኤተኘ ክቻ አለፈ፣እኩ ዋአካ ሀይተ ኢቫአኴ ኢቫአኴ። ¹⁵ ኧሳቭአተኘ መላአይካ ጥሩቦኋ ነፋፋ፤ተሳቫይ ዋኸ ዩርታ ኑእ ኑእ ቃር ተሰምአ፤«አአለም መንግስት ኧጌታንራ ኧኢየሱስ ክርስቶሲ መንግስት ኸረ ፤ሁዳ ኧላለም ኢረግስኴ። ¹⁶ በጎይታ ኢፍቲ በዙፋንሁኗ ኧቸኗ ሁይአ አርቭአቸ ባሪቅቭ ኢፍቶኢፍት ዎቶኡምታ ኧጎይታ ሰጎጁም ፤ ¹⁷ እመኸቭ ቯርም « ድረ ኧረፐርኸ ዋአካቭ አነኸዳ ፣እንእአአር ኢኽነኸዳ ኑእ ኧኸርኸ ጎይቶ፣ አኸ ብበሩእ ጦናኸ ኧረገስሄ ኧኸሬ ሽኩራኸ፤ ¹⁸ 18. አረማዊ ሰቭ ሟአቸውም ፤አኸ ማአት ማአቨኸ፤በዎጁዋ ሁኖዋ ትፈርድወዳ ፣ኧነብያት አገልጋያኸ፣ያኽቡጅከዳ ኧውጭር ሰቫኸ፣ኧሩእቪ እእስሞኋ ዋጋሁኗ ቲወዳ፣አፈርቭ አአፎዋ ሁኗ ትጀፕርወዳ ዘቨር ሰንአ። ¹⁹ ተህም ቀጥወ በሳቫይ አነዳ ኧጎይታይ ሙጭር ቢድ ተከፈደ፤በቨቅደስ ከስ ኧጉርዳ ታቦት ተረከቨ፤ቦዠ፣ህያድ ፣ኧሳቫይ እገግውት፣አአፈር እፋድቪ ቡሼእ በረጀቭ ማአ።