¹ ትእም ቀጥወ ቡችር ጦናᎀ መላአይካ ዳቨራ ተኸተረታ ተሳቫይ ቲወትካ አሸሁ፤በሁድ በጉ ንኧርኋይ ወዅ ወካ ባነደ።ኢፍትኋ እእዋየኸአእር ፣ኧግርሞኋቭ እእሳድ ፌቨኸአእር ባነውተ። ² በኧጅሞኋ ቀሪ ኧጥዋነሪ መጣፍ ተበጠ ባነደ፤ቀነ ኧግርኋ በቫር ፎር ፣ጉራ ኧግርሞኋ ባአፈር ፎር አትሸከቨ፤ ³ ኢሮእካ ዠፐኸ ቃርኋ ነሳ አኸና፤ባኸናመጋ ኧሳቭአቸ ኢግወኩውታ ቦዠ ቃር ዝሬኵውም ⁴ ሳቭአቸ ኢጉወኩውታ ቦዠ በዝሬኵውዋ ኧጠፊ ተረሳሁ፤ዘንጋ ጭን ሳቭአቸ ኢጉወኩውታ ቦዠ ኧዝሬኬዊ ቃር ማተብ ኧትምወ ባሀሬ እንጣፍኸ ይካ ቃር ተሳቫይ ሰምአሁ። ⁵ ተህም ቀጥወ በቫርቪ ባአፈር ፎር በትሸከቬ አሸሁን መላአይካ ቀነ ኧጅኋ ኧሳቫዪ ኤፐ ነሳ፤ ⁶ ሁድ ኧዘላለም ቢረቭርካ፣ ሳቫይቪ በከስሞኋ አነውታአር፣አፈርቪ በከስሞኋ አነውታ፣ባርቪ በከስሞኋ አንነውታአር እንእ በፈጠረ ጎይታ ተኘ፤እመኸቭ ባረ፥በዋቴ አቲርት ኤነዳ ፤ ⁷ ዘንጋ ጭን ኧሳቭአተኘ መላአይካ ጥሩᎄ ቢረፋወዳ ቀረ አአገልጋይኋ ኧነቢ ሁኖዋ ኧዝሬኬኖዋመኸ፣ ጎይታ በሂንኋ አወናን አሳብ ኢቴፕኴ። ⁸ ተህም ቀትወ በተርሁ ተሳቫይ ኧሰምአሁን ቃር ሀአቨ ዋኸ ባረ ዝሬኬዪ፤ «ሆር ፣በቫርቪ ባአፈር ፎር ተትሸከቨ መልአይካ ኧጅ ኢጥዋንሪዳ ኦፎጂ መጣፍ ውስት። ⁹ ሁዳይ ዎርሁታ «ኧጥዋነሪ እንስየ መጣፍ ሁዳ አቬ ባሁን»፤ሁድ «ውስድኩታ ብርአኩ ፣ትትቨርአኩዳ ኧውየኸ ኢኢኸዴ፤በበንአኸን ቀጥወ ጭን በከሳኸ ኢቨርርካአር ኢኸርኴ» ባረዪ። ¹⁰ ኢያቭ ተቨላአይካ ሁዳይ ኧጅ እንስየ መጣፍ ቴኤፐርሁንታ በንአሁን፤ባቃመኛ ትንቨርአኩዳ ኧውየኸ ኤኤቨዪ፤በበንአሁንቀጥወ ጭን በከስኛ ኢቨርርካአር ኸረ። ¹¹ ተህም ቀጥወ «ኧሮኦራ ጥቭ ፣ኖኦራ ገኘ ሰቭ ፣ኖኦራ ሰቭ ኢዝሬኩዳ ቃርቫአርቪ ኧዳኝአር ትቢት ኧዞጉት አነቨኸ» ቧርኝ።