DCS-Mirror-burje_duro_byn_zep_text

1 ¹ ሲም ያሁዱዅ ዮስያ ኣሞጽዅራ ዳለትል፡ ሶፎንያስ ኩሺዅራ፡ ግዳልያዅራ፡ ኣማርያዅራ፡ ሕዝቅያስዅራትል እንታዅ ቆል ጃሩዅ ኒን ግን፦

² “ኣን፡ ኣኻዅስክ ብሪ ደግልድ ድሂስያ ግን” የኵ ጃር።

³ “ከውዲ ማልዲት ድሂስያ ግን፣

ኰዶ፡ ጀከል ሰሚውዲ ዓሳ በሓሩዲ

እን ሓዋንሲ ዓጝቀፈውዲት ድሂስየሎም ግን፣

“ከው ናትክሲ ብሪ ዳግልድ ድሂስየሎም ግን” የኵ ጃር።

⁴ “ይናንሲ፡ ያሁዳ ብረዲ

ኢዮሩሳሌምዲትል መንደርተውሊ

መደድያ ግን፣

እና ኣካን ኒልድ፡ እን በዓልሲ ¹ አምለክደውልድ ከብተውዲ

ጣቖቱ ከድ ስⶖዲት ናትክ ድሂስያ ግን፣

⁵ ዓስከር ዓስተሩሲ አምለክድድኖ፡

ንሕስ አወይሲ ፍኖ ሰገደውዲ፡

እን ጃርሊ ሰገደውዲ ኒስⶖድ ሸረውዲ፡

ኰዶ ኒሰና ሚልኮምድ ሸረውዲ፡

⁶ ጃርሲ ተለይኒልድ ደምቢራ ወንተረውዲ፡

ጃርሲ ጀረብገውዲ

ካቢሮሎም ወጝቀረገውሉዲት

ድሂስየሎም ግን።

⁷ እን ግርጋ ጃሩዅ ስኵሮ ዋነውድ፡

አደራ ጃር ገሸል ትም ያ።

ጃር ሰደቐት ደለምዶ ህምበኵ፣

እን ኒሽኘውሲሎምኽር ሸተክድዅሎም።

⁸ እን ግርጋ ሰደቐት ጃሩዅድ፡ ስልጠቱዲ ሲም ቝርዲ ሰረን አሪውዱሲ ሰረውዲት ቀጽዕየሎም ግን።

⁹ እን ግርጋ እንድሂሲ፡

ኣን፡ እን ኣካን ክብያዅ ጃብራ ህምባዅሊ ኣኽኖ ባⶖጕረውዲ፡

ናጣቖታዅ ልጝንሲ ዓመጭዲ ምልነዲሲ እንሰኸውዲት

ቀጽዕያ ግን።

¹⁰ ጃር ንሰና የኵ እⶖኵዅ፣

“እን ግርጋ እንድሂሲ፡ ክብያዅ ደሀይ መራ ዓሲዅል፡

መውዒታትኻ እን ሊጘር ሸኪል፡

እን ጊተልኽር በሀር ኮት ደወሽትና

ዋስስትሮ ግን።

¹¹ ናውክ እን ሰቀጠንቲ ድድኖ ግን፣

እን ወርካ ሰቀጠውር ጨነትድኖ ግን እማ፣

እንትን እን ዕዳጋ መኸቴሽሩዅሊ መንደርትደናኽር ትኦይ ያ።

¹² እን ወክት እንዲል፡ ኢዮሩሳሌምቲ

ቲዀድ ጕርጕርየላ ግን፣

እን ታሚትድ መንደርተው፡

ግለትሊ ከብተው ወይኒርሰና፡

‘ጃር፡ ትክያዅ ኣኽን ምቝላ፡እሰላ’

የውሲ ቀጽዕየሎም ግን።

¹³ እንታ ርድቕ ወረርስሮ ግን፣

እንታ ልጝንትትኽር ሀገግሮ ግን፣

ልጝንቲ ከደምድኖ ግን፣

ደአም ናል መንደርትድኖ ኣኽኒ፣

ካን ወይኒሩ ተከልድኖ ግን፣

ደአም ናልድ ወይኒ ጀአኒ።

¹⁴ “እን ግርጋ በሀር ጃሩዅ ስኵሮ ህምበኵ፣

ተኸትሊ ግን፡ ኣሸሻዅድ እንትሮ ግን፣

እን ግርጋ ጃሩዅድ ወረራዅ ስረና ወስስትሮ ግን፣

እን ፈራስ እኝሽኸንታኽር መረራዅ ስረና ስሪሮ ግን፣

¹⁵ እን ግርጊ እንድሂኒ፡ ግርጊ ሓርቕርቖትሪዲ፡

ግርጊ ጅርበትሪዲ ምሽዊትሪዲ፡

ግርጊ ዶሸትሪዲ ድዲሪዲ፡

ግርጊ ጭልምትሪዲ ግፍዕትሪዲ ፡

ግርጊ ብኳኒሪዲ ሒለቱዅ ጭልምትሪዲ ኣኽቶ ግን።

¹⁶ እን ግርጋ እንድሂሲ፡ እን ከለብ ሺራዅድ ከለብሰው ዕርዲራታት፡ ደሀይ መለከትዅዲ ሓርብዅ መውዕታትዲ ዋሰነላ ግርጋ ግን።

¹⁷ እን ከው ጃርሲ ዓገብንነዲ፡ ሽብውድየሎም ግን፡ ዓርፍሰና ኰዶ ወንተተርድኖ ግን።

ናብር ብቲሰና ብቝቲሮ ግን፣ ናስኻኽር ቀጨጭሰና ማልስሮ ግን።

¹⁸ እን ግርጋ ሓርቕርቖትሪ ጃርድሪሲ፡ ናወርካ ኣኽን ናደሀብ ደአንድሮሎም ገረሰላ፣

ብራ ንርውክ ኒሓርቕርቖትዅ ለኸድ ሓውይቶ ግን፣

እን ብሪል መንደርተውድ ዳግል፡ ስድፈትድ ጨዓት ገምሮ ግን።

¹ 1.4 በዓል ስⶖ ጣቖትዅ ግን