4 በጋ፡ ጋዛ ባርስትቶ ግን፣ ኣስቃሎንኻ ድመን ኣኽቶ ግን፣ ኣሽዶድር ኣዳሓ ጫዕዳዅሊ ካይትቶ ግን፣ ኤቅሮንኽር ምኵርቶ ግን። 5 እንትን እን በሓር ሸሊ መንደርትደናኽር ከው ክረቱ መላልኩም፣ ከንዓን ብሪ ፍልስጥኤምዅ መላልካ፡ እን ኵዳግ ድውስተዅ ቆል ጃሩዅ ኒን ግን፡ “ናትክ ድሂስያ ግን፣ እን ንርትል መንደርተውልድኻ ከብታዅ እላ።” 6 እን በሓር ሸሊ ህምባ ብራ፡ መቓቓዲ በግዲር መስከብ ኣኽሮ ግን፣ 7 እና ብራ ኒን፡ እን ከብተው ከው ያሁዱውድ እውስትሮ ግን፣ ናውር ኒል ምቓቕርሰናዅ ኣካን አርድኖ ግን። ኵንⶖ ልጝንቲ ኣሽከሎንዱሊ ክድኖ ግን፣ ናአደራ ጃር ተከውሮሎም ግን፡ እን ናልድ ወረርሶ እርገውስኽር ወንተስሮሎም ግን። 8 “ጀኸን ሞኣብዅዲ ቃየርና ዓሞንድዅዲት ዋሶ ህምበኵ፣ ይእክሲ ጀኺኒዅ፣ ናብሪ ግንድል ኣኽኖኻ ናኣዀትሲ ክብሲኒዅ። 9 እማ ኣን ዋነኽር ግን” የኵ ጃር አደራ ጻብኦቱዅ፡ ጃር እስራኤልዱዅ፣ “እምንድክ፡ ሞኣብ ሶዶምሰና ኣኽቶ ግን፡ ኣሞንድቝርኻ ጎሞረርሰና ኣኽድኖ ግን፣ ኣካን ኳታኵቱርዅዲ ጎቝ ሽዊዅዲ ዲመር አው ከደንዲ ኣኽድኖ ግን። እን ይእክልድ ከብተው ወረርድኖሎም ግን፣ እን ዩ ኣኸውልድ ከብተውኻ፡ ናብረስ ለውድኖ ግን።” 10 እን እክ አደራ ጃራ ጻብኦቱሲ ጀኺኒዅርሎም፡ ከበርስንዅርሎም፣ እና ኒንኻ እና ናው ሃቢነዅ ሰበት ናዳግ ገምሮ ግን፣ 11 ጃር እን ብሪል ህምባ ጣቖትሲ ድሂሳ ወክትሲ፡ ናድ ጒኢስትሮ ግን፣ እን በሓር ሸሊ መንደርተው ከውር እን ናው ህምበና ኣካንሊ ኣኽኖ ኒል ሰገድኖ ግን።
12 “እንትን ኢትዮጵዪው፣ እንትንኽር ሰፍድ ኵውስትትኖ ግን።”
13 ኒናንሲ ግብለትሊ ኣኽራሲክ መደድሮ ግን እማ፣ ኣሶርቲ ድሂስሮ ግን፣ ነነዌትኻ ድመንዲ ሰቦት አው ከደንዲርሰና እስሮላ ግን። 14 በግዲ ወስዲ ኣይዪ ጅንስ መሀድሰውዲ ንር ዓጝቀይል ክድኖ ግን፣ ጕምጕመረዲ ግራሸዲ፡ ናኳና ኣዀርሊ ክድኖ ግን፣ ናደሀይ ሕጎድ ዋስስትሮ ግን፣ እን ልጝን ሰሮ እርገው ካን ሊባኖሱ ግልህስትሮ ግን እማ፡ እን ኳና ሃገግሮ ግን። 15 እን ሀድእሮ መንደርትሩ እርግረሪ፡ ፋርሒ ዕርዲራ እና ኒኒ ግን፣ ንሪ ንር ለበከድ፡ “ኣን ካያ ግን፣ ይንኻ ላዅ እላ” ይሩ እርግረሪ፣ አዋኽረ ደአም ኣራዊት ከደነዉድ መስከብዲ ድመንዲ ኣኽቲን?
ናውክ እን ንር ገበድ ደኮው፡ ተርጀክሰነኵላ፣ ቅበስኽር ናናንድ ንርትል ሓበረነኵ።