21 ¹ بعـد كِذا أظهر يسوع نفسُه للتلاميذ مرة ثاني عند بُحيرة طبريَّة، أظهرنفسُه بهذي الطريقة: ² أجتمعوا سِمعان بطرس، وتوما اللي يُسمنوه التوأم، ونَثنَائيل اللي من قانا منطقة الجليل، وأولاد زبدي الإثنين، وإثنين تلاميذ ثانيين من تلاميذ يسوع. ³ قلهم سِمعان بُطرس: "أنا رايح أصطاد سمك" قالوا لُه: "ونِحنا شِنجي معك." فخرجوا ورِكبوا القارب، بس ما أصطادوش ولا شيء بآذيك الليلة. ⁴ والصّباح، وقف يسوع بالساحل، لكن التلاميذ ما عرفُنّوش إنوه يسوع. ⁵ فسألهم يسوع: "يـا أولاد، في معكُم سمك؟" جاوبنو: "لا." ⁶ فقلهم: "إرموا بالشبكة للجهة اليمين من القارب، شتحصلوا سمك!" فرموا بها، وما عقدروش يسحبنوا من كُثر السمك اللي فيبه. ⁷ فقال التلميذ اللي كان يسوع يحِبُه لِبُطرُس: "هذا هـو الربّ!" لما سِمع سِمعان بُطرُس إنو الربَّ، لِبس ثوبه بسرعة لإنو كان خالع لُه، وقـفــز لبين الماء. ⁸ و أجاءو بقية التلاميذ بالقارب وهُم يسحبوا شبكة السمك، لإنهم ما كنوش بعيدين من الساحل، حوالي مئة متر بس. ⁹ ولما وصلُوا للساحل، شافوا هِناك جمروالع ومطروح فوقه سمك وخُبز. ¹⁰ قلهم يسوع: "جِيبوا من السمك اللي اصطدتونُه الآن!" ¹¹ فطلع سِمعان بُطرُس للقارب، وسحب الشبكة للساحل، كانت مليان سمك كبير، مية وثلاثه وخمسين سمكة كبير، رغم إنهن كثير لكن الشبكة ما اتقطعت. ¹² قلهم يسوع: "تعالوا أكلوا." ولا جِـرئ واحد من التلاميذ إنو يسألُه: منو أنت؟ لإنهم عرفوا إنوه الـربَّ. ¹³ بعدين قام يسوع وأخذ الخُبز، وجاب لهم مِنُه ومن السمك. ¹⁴ آذي ثالث مـرة يظهُر فيبه يسوع لتلاميذُه بعـدما قـام من الموت. ¹⁵ بعد ما أكلوا، سأل يسوع سِمعان بطرس: "يـا سِمعان بن يُونَا، تحِبّنا أكثر مما يحِبُنا هاذوم؟" جاوبه: "أيوه يا ربّ، أنت تعرِف إننا أحبك!" قله يسوع: "أكل خِرافي." ¹⁶ سأله مرة ثاني: "يا سِمعان بن يُونَا، تَحِبنا؟" جاوبُه: "أيـوه يا ربّ، أنت تعرِف إننا أحبك!" قلُه يسوع: "إرعِي غنمي." ¹⁷ فسأله مرة ثالث: "يا سِمعان بن يُونَا، تَحِبنا؟" فحِزن بُطرُس لإنو يسوع سأله للمرة الثالث: "تحِبنا؟" فقله: "يا ربّ، أنت تعرِف كل شيء. أنت تعرِف إننا أحبك!" فقلُه يسوع: "أكل غنمي " ¹⁸ أقولك الصدق: لما كَنت شباب، كَنت تلبس ثيابك بنفسك وتروح مكان ما تشتي. لكن لما تُشِيب شتمُد يداتك وغيرك يُلبِّسك ثيابك، ويأخُذك لمكان ما تشتوش." ¹⁹ هذا الكلام قالوا يسوع إشارة للطريقة اللي شيموت فيبه بُطرس ويتمجَّد الله بها. بعدين قال يسوع لبطرُس: "تَبِّعنا."

²⁰ ولفت بُطرُس لورائُه، شاف التلميذ اللي كان يسوع يحِبُه يمشي بعدهم، وهو التلميذ اللي أتكأ على صدر يسوع وقت عشاء الفِصح، وقلُه: "يا سيد، مِنو اللي شِخونك؟ ²¹ لما شافوا بُطرُس، سأل يسوع: "ياربُّ، وهذا إيش بيحصُل لُه؟" ²² جاوبه يسوع: "إفـرض إننا أشتوه يجلس حيّ لما أرجع، إيش دخلك؟ إتبعنا أنت!" ²³ أنتشر الخبر بين الإخوة إنو ذى التلميذ ما شيموتش! بس يسوع ما قالش إنو ما شيموتش، لكنُه قال: "إفـرض إننا أشتوه يجلس حيّ لما أرجع، إيش دخلك ؟"

²⁴ هذا التلميذ هـو اللي يشهد بآذي الأمور، وكتبها هِنا.ونِحنا نعرف إنو شهادتُه حقّ.

²⁵ وفي أشياء كثيرة عملها يسوع المسيح، لو كُتِبت كُلها بالتفصيل واحدة بعد واحدة، معتقدش إنو العالم كُله شِيوسع الكُتب اللي كانت شتُكتب.