20 ¹ وبيوم الأحد الصباح بدري وعاد الضوء ما طِلعش، بكَّرت مريم المجدلية لقبر يسوع، شافت إنو الحجر مبعود من باب القبر. ² فراحت تجري بسرعة لعند سمعان بطرس والتلميذ الثاني اللي كان يسوع يحِبُه، وقالت لهم: "شلّوا السيد من القبر، وما ندريش وين طرحُنُوه." ³ فخرج بطرس والتلميذ الثاني وراحو للقبر. ⁴ كانوا الإثنين يجرو سوى، لكن التلميذ الثاني سبق بطرس، ووصل للقبر قبلُه. ⁵ و دنّ وشاف الأكفان مطروحه بالأرض، لكن ما دخلش. ⁶ بعدين وصل سمعان بطرس بعدُه، ودخل للقبر وشاف الأكفان مطروحه بالأرض. ⁷ والمنديل اللي كان فوق رأس يسوع ما حصلوش مع الأكفان، حصلُه ملفوف لوحده بمكان ثاني. ⁸ وبعدين دخل التلميذ الثاني، اللي وصل قبل بطرس للقبر، شاف و آمن، ⁹ لإنو التلاميذ لآذك الوقت ما كانوش فاهمين إنو الكتاب قال على يسوع إنو لازم يقوم من الموت. ¹⁰ بعدين رجعو الإثنين التلاميذ لبيوتهم. ¹¹ وكانت مريم المجدلية واقفه تبكي خارج القبر، أنحنت تشوف لداخل القبر وهي تبكي، ¹² شافت إثنين ملائكة لابسين ثياب بيض، جالسين مكان ما كانت جثة يسوع مطروحه واحد مكان الرأس والثاني عند الأرجل. ¹³ فقالوا لِه: "ليش تبكي يا مره؟" قالت لهم: "شلّوا سيدي وما أدريش أين طرحنوه." ¹⁴ قالت هذا ولفتت لورائها، فشافت يسوع واقف، بس ما عرفتش إنوه يسوع. ¹⁵ قال لها يسوع: "ليش تبكي يا مره؟ على مِن تُدوري؟" فحسَبتو إنو عامل البُستان، فقالت لُه: "ياسيد، إذا كنت أنت أخذتو قُلي أين طرحتُه شاروح آخُذُه." ¹⁶ قال لها يسوع: "يـا مـريم." فالفتت وقالت بالعِبرية: "ربُّونِي"، معناها: يا معلم. ¹⁷ فقلها يسوع: "لا تلمسيناش، لإننا عادنا ما طلعتوش لعند أبي، لكن روحي لخوتي وقولي لهم: إننا شطلع عند أبي وأبوكم، وإلهي و إلهكُم." ¹⁸ فـراحت مريم المجدلية وخبرت التلاميذ إنه شافت الرب، وخبرتهم بالكلام اللي قلها. ¹⁹ وبآذاك اليوم، يوم الأحد بالمساء، كانوا التلاميذ مجتمعين ببيت والأبواب مقفل خائفين من قادة اليهود، جاء يسوع ووقف بالوسط، وقلهم: "سلام لكم!" ²⁰ وبعد ما قال هذا، وري لهم بيداته وجنبُه، فِرحوا التلاميذ لما شافوا الرب. ²¹ فقلهم يسوع ثانيه: "سلامٌ لكم، مثلما أرسلنا الآب، أرسِلكُم أنا" ²² وبعد ماقال هذا نفخ عليهم وقلهم: "إقبلوا الروح القُدس. ²³ إذا غفرتم لأحد ذنوبه تُغفر لُه، وإذا ما غفرتمش ما تغتفرش." ²⁴ بس توما ما كنش موجود معهم لما جاء يسوع، وتوما هو واحد من التلاميذ اثناعشر واسمه يعني "التوأم" ²⁵ قالوا لُه بقية التلاميذ: "شِفنا الـربَّ !" قال توما: "ما شصدقش إلا إذا شِفتو أثار المسامير بيداتُه، ودخلتو أُصبعي بمكان المسامير، وأمسك بيدي على جنبُه"

²⁶ وبعد ثمان أيام، كانوا تلاميذ يسوع مجتمعين مرة ثاني داخل البيت وتوما معهم، أجى يسوع والأبواب كانت مُقفل، ووقف بالوسط وقال: "سـلامٌ لكم!" ²⁷ وقال لتوما: "تعال ودخِل اُصبعك هِنا، وشوف يـدآتي، وأمسك بيـدك على جنبي، ويكفيك شـكَّ وخليك مؤمن." ²⁸ جاوب توما وقله: "ربي و إلهي!" ²⁹ فقله يسوع: "لإنك شِفتنا يا توما آمنت؟ هـنيئاً للي يُؤمنوا من غير ما يشوفُنَّا." ³⁰ وعمل يسوع قُدّام تلاميذُه مُعجزات ثانية كثير ما كُتِبتش بهذا الكتاب. ³¹ أما ذي المُعجزات فكُتِبت عشان تُؤمنوا إنو يسوع هـو المسيح ابن الله، وعشان تكون لكم حياة باسمه إذا آمنتُم.