3 وجمع بولس بعض الحطب ورجمه بُه لوسط النار، فخرجت حية بسبب الحرارة، وأتعلقت بيده. 4 فلما شافوا أهل الجزيرة الحية مُعلق بيده، قالوا لبينتهم البين: "شكل هذا الرجّال قاتل، بالرغم أنه نجي من البحر، العدل ما يسمحلوش بانه يعيش." 5 بس بولس نفض بالحية لوسط النار وما وقعبوش ولا حاجه. 6 والناس أتوقعوا أنه شيتورم أو يفلت ميت فجأة ، بس هم أنتظروا لفترة طويلة وشافوا أنه ما وقعبوش ولا حاجة، فغيروا رأيهم وقالوا أنه إله.
7 وكان في مزارع قريب من المكان لحاكم الجزيرة بوبليوس، فدعي لنا وأحسن ضيافتنا ثلاث أيام. 8 وكان أب بوبليوس راقد على الفراش مريض بحمى وإسهال زيادة. فراح بولس يزوره وصلي، وحط أيديه علوه، فعالجه. 9 وبعدين أجاءوا الناس الأمراض اللي هم بالجزيرة واتشافوا. 10 فجابوا لنا هدايا مليان، ولما رحلنا جابوا لنا كل ما نحتاج له بسفرنا. 11 وبعد ثلاثه شهور سافرنا على سفينة من الإسكندرية فيبها صورة الجوزاء "يعني التوأمين" كانت قا جلست بفصل الشتاء بمالطة. 12 ولما وصلنا لمدينة سراكوسا جلسنا بها ثلاث أيام، 13 وبعدين أبحرنا ومشينا بالقرب من الساحل لما وصلنا مدينة ريغيون، وباليوم الثاني أجت ريح جنوبية، فوصلنا لمدينة بوطيولي بيومين. 14 وحصلنا هناك بعض الإخوة، طلبوا مننا نجلس معاهم سبع أيام. وكذا وصلنا إلى روما. 15 ولما الإخوة سمعوا اننا وصلنا، خرجوا عشان يستقبلونا بساحة أبيوس وبالحانات الثلاث. فلما شافهم بولس شكر الله وأتشجع. 16 ولما دخلنا روما الضابط سمح لبولس إنو يجلس ببيت خاص مع الجندي اللي يحرسه. 17 وبعد ثلاث أيام دعي بولس كبار اليهود، وقلهم: "يا إخوة، مع أننا ما عملتش ولا شيء يؤذي الشعب، ولا لطقوس أبوتنا، مع اننا أحتبستو بالقدس وسُلمت للرومان، 18 فاستجوبونا وكانوا يشتوا يفكوا لي ، لإنو ما كنش في حاجه تستاهل إعدامي. 19 بس اليهود عارضوا، فاضطريت أرفع قضيتي لعند قيصر. وهذا ما يعنيش اننا أشتكيتو على بني وطني بحاجة . 20 لهذا طلبت إنو أشوفكم وأكلمكم. انا مُقيد بهذه السلسة بسبب رجاء بني إسرائيل." 21 فجاوبوا علوه: "إحنا ما وصلتش ولا أي رسالة من منطقة يهوذا علوك، والإخوة اللي اجاءوا من هناك ما كلموناش بحاجة مش تمام علوك. 22 وإحنا نشوف إنو من الصح نسمع رأيك، لإنو إحنا ما نعرفش أن الناس بكل مكان يعارضوا هذا المذهب!"
23 وأتفقوا أنهم يقابلوا بولس بيوم محدد، وأجاءوا لبيته ومعهم ناس ثانيين مليان. فجلس يكلمهم من الصبح للمغرب وشرح لهم حقائق مملكة الله، وحاول إنو يقنعهم برسالة يسوع المسيح، مستخدم توارة موسى وكتب الأنبياء. 24 فا قتنعوا بعضهم بكلامه، وبعضهم رفضوا أنهم يؤمنوا. 25 فأختلفوا بينتهم البين، وخرجوا بعد ما قلهم بولس: "صدق الروح القدس لما قال لآبائكم بلسان النبي إشعياء: 26 "روح لعند هذا الشعب وقل: "مهما سمعتم ما شتفهموش، ومهما شفتم ما شتشوفوش. 27 لإنو القلب حق هذا الشعب رجع قاسي، وآذانهم رجعت ثقيلة عن السمع، وغمضوا عيونهم، عشان ما يشوفش بعيونهم، ويسمعوا بآذانهم، ويفهموا بقلوبهم، فيرجعوا لعندي عشان أشفيهم." 28 لهذا اشتيكم تعرفوا إنو الله أرسل نجاته لغير اليهود، وهم شيسمعوا له." 29 وبعدما قال هذا، خرجوا اليهود من عنده وهم يتصايحوا بقوة.
30 وجلس بولس سنتين كاملتين ببيته اللي أستأجره، وكان يرحب بكل اللي يجي لعنده ليزوره. 31 وكان بولس يعلن بشرى قيام مملكة الله بجراءه وبدون عائق، ويعلم الناس بالرب يسوع المسيح.