9 وبهذا ضاع منا وقت طويل، والسفر رجع بالبحر خطر لإنو الوقت كان بعد الصيام. فحذرهم بولس وقال: 10 "يا رجال، أنا اشوف إنو سفرنا فيبه خطورة وخسارة كبيرة، مش بس على السفينة والحمولة حقها، حتى على أرواحنا كمان." 11 بس قائد المية كان يميل لكلام قائد السفينة وكلام صاحبها وما جبش ولا أي أهمية لنصيحة بولس. 12 والميناء كان ما يصلحش للجلوس فيبة بوقت الشتاء، فقرر اكثر الناس إنو نكمل السفر، على أمل إنو نوصل لميناء فينكس بجزيرة كريت ونجلس بوقت الشتاء هناك. وهذا الميناء بإتجاه الجنوب الغربي والشمال الغربي . 13 وأجت ريح خفيف من الجنوب، فظنوا البحاريين إنو شيلاقوا اللي يشتوه، فرفعوا الشراع وأبحروا قريب من ساحل كريت.
14 بس بعد قليل أجت ريح عاصفة اسمها الشمالية الشرقية، اجت من الجزيرة. 15 فأندفعت السفينة وما قدرتش تقاوم الريح. فأستسلمنا لها والريح هي اللي كانت تقودنا. 16 وجزعنا قريب من جزيرة صغير اسمها كودا، وقدرنا بصعوبة إنو نرفع قارب النجاة لظهر السفينة. 17 وبعدين البحارين أتخذوا الإحتياطات اللازمة، فشدوا وسط السفينة بالحبال. وخافيين إنوه تصطدم بالساحل الرملي عند سرتس، فأنزلوا الشراع وسيبوا السفينة تمشي على هذه الحال. 18 وزادت علينا العاصفة بقوة، لدرجة إنو البحارين باليوم الثاني رجموا بحمولة السفينة للبحر. 19 وثالث يوم رجموا بأدوات السفينة بأيديهم. 20 ومشت أيام كثير واحنا ما شفناش فيها الشمس ولا النجوم، والعاصفة كانت تزيد من ليوم، لدرجة انحنا يأسنا.
21 والمسافرين كانوا قأمتنعوا من الأكل لفترة طويلة، فوقف بولس بينتهم وقال: "يا رجال، كان لازم تعملوا بنصيحتي وما تسيبوش كريت، فتسلموا من هذا الخطر والخسارة. 22 بس انا ذلحين أطلب منكم تتطمنوا، ولا واحد منكم شيفقد حياته. بس السفينة لوحدها شتتكسر. 23 ظهر لي هذه الليلة ملاك من عند الله اللي أنا له وأخدمه. 24 وقال لي: ما تخافش يا بولس، لازم انك توقف أمام قيصر. والله جاب لك حياة كل المسافرين معك. 25 أطمنوا يارجال، أنا عندي إيمان بالله إنو كلامه شيوقع. 26 لازم ما نندفع لواحدة من الجزر." 27 وبالليلة الرابعة عشر، والرياح كانت ما تزال تسوقنا ببحر أدريا، البحاريين أعتقدوا بنص الليل أنهم يقتربوا من البر. 28 فقاسوا العمق حق الماء وطلع اربعين متر. وبعد قليل رجعوا قاسوا العمق طلع ثلاثين متر. 29 فخافوا إنوه نصطدم بالحجار، فرجموا من أخرالسفينة أربع مراسٍ، ومنتظرين يطلع الصبح. 30 والبحاريين كانوا يشتوا إنو يهربوا من السفينة، فانزلوا قارب النجاة للبحرعلى أساس إنوهم يشتوا ينزلوا بعض المراسي من مقدمة السفينة. 31 فقال بولس لقائد المية والجنود: "إذا هاذم البحاريين ما جلسوش بالسفينة فما شتعيشوش." 32 فالجنود قطعوا الحبال حق القارب وسيبوه يفلت بين الماء. 33 وقبل الفجر، بولس طلب منهم كلهم يأكلوا وقلهم: "مشين اربع عشر يوم وأنتم ما أكلتموش ولا حاجة، 34 لو سمحتم كلوا قليل من الأكل، أنتم تحتاجوا لهذا عشان تعيشوا. وما شيفقدش ولا واحد منكم شعرة من رأسه" 35 ولما قال هذا، شل خبز وشكر الله قُدامهم كلهم. وبعدين قسمه وبدأ يأكل. 36 فاطمنوا كلهم، واكلوا من الأكل. 37 وكان عددنا بالسفينة مئيتين وستة وسبعين شخص.
38 وبعد ما شبعوا، رجموا القمح بالبحر عشان يخففوا من حمولة السفينة.
39 ولما طلع النهار، ما قدروش البحاريين إنوهم يميزوا البر، بس هم شافوا خليج له ساحل رملي. فقرروا إنوهم يدفعوا السفينة لعنده إذا قدروا. 40 فقطعوا المراسي وسيبوها تفلت للبحر. وبنفس الوقت فكوا الحبال اللي تربط الدفة، ورفعوا الشراع الأمامي للريح وأتجهوا بإتجاه الساحل. 41 بس السفينة اصطدمت بتلة رمل بين الماء. فجنحوا بها للساحل، فارتكز المقدمة حقها وبقي ما يتحركش، وأخر السفينة أتكسر بقوة الأمواج. 42 فالجنود كانوا يشتوا يقتلوا المساجين عشان ما يسبحوش للساحل ويهربوا. 43 بس قائد المية كان يشتي ينقذ بولس، فمنعهم إنوهم يعملوا اللي يشتوه. فأمر اللي يعرفوا السباحة إنوهم يقفزوا أول حاجه ويخرجوا للشاطئ. 44 وبعدين الباقيين يتبعوهم على ألواح من السفينة او على قطع من الأكسار حق السفينة. وبكذا الكل وصلوا بسلام للبر.