16 فوقف بولس وأشر بيده وقال : " إسمعونا يا بني إسرائيل وغيرهم من اللي يتقوا الله . 17 إله بني إسرائيل أختار ابوتنا . ولما كان هذا الشعب غريب ببلاد مصر ، رفع شأنهم وخرجهم من هناك بقوته العظيمة . 18 وبعدين أتحملهم حوالي أربعين سنة بالصحراء. 19 وبعدين أهلك سبع أمم ببلاد كنعان وجاب أرضهم لشعبه . 20 وأستغرق كل هذا حوالي أربعميه وخمسين سنة . وبعدين جاب لهم قُضاة إلى عهد صموئيل النبي . 21 ولما طلبوا ملك، الله جاب لهم شاول بن قيس ، وهو رجال من حق قبيلة بنيامين ، فحكم أربعين سنة . 22 وبعدين الله أبعده من الحكم وجعل داود بداله حاكم عليهم ، اللي شهد له بكلامه وقال : انا حصلتو داود بن يسى رجال يرتاح له قلبي ، وهو شيعمل بكل ما اشتي. 23 ومن نسل هذا الرجال ،الله جاب لبني إسرائيل مُخلص هو يسوع ، مثلمــــا وعد . 24 وقبل ما يجي يسوع ، يوحنا دعي لكل بني إسرائيل أنهم يتوبوا ويغتسلوا بالماء . 25 ولما خدمه يوحنا قدها قريب شتخلص قال: من تتوقعونا ؟ أنا مش المسيح ! بس هو شيجي بعدي وانا ما أستحِقش أنو أفك الرباط حق حذائه . "
26 يا أخوه ، يا أولاد إبراهيم ، ويا كل من يتقي الله من الحاضرين اللي هنا : الله أرسل لنا كلمه هذا الخلاص ! 27 بس أهل القدس والقادة حقهم ما عرفوش المسيح يسوع ، فحكموا علوه . وبذلك كملوا كلام الأنبياء اللي يُقرأ بكل سبت . 28 بالرغم أنهم ماحصلوش اي غلط يستحق الموت ، طلبوا من بيلاطس أنو يقتله. 29 ولما عملوا كل ما قاله الكتاب علوه ، نزلوه من فوق الصليب ، وحطوه بقبر . 30 بس الله أقامه من الموت . 31 وظهر أيام مليان للي راحوا معه من الجليل للقدس ، وهم الآن يشهدوا له بين شعبنا.
32 فإحنا نخبركم بيذي البشارة :الله وعد ابوتنا ، 33 والآن عمل الوعد لنا نحن أولادهم ، وذلك بأنه أقام يسوع من الموت . مثلما يقول الكتاب في المزمور الثاني : " أنت ابني ، أنا اليوم ولدتك . 34 فقيمه الله من الموت ، وماشيرجعش إلى فساد الموت أبداً. وبيهذا المجال الله قال : " أجيب لك البركات الصالحه والمضمونة اللي وعدت بها داود . 35 ويقول داود بمزمور ثاني : ما شتسمحش لقدوسك أنو يتعفن بالقبر . 36 بس داود مات بعدما خدم الجيل حقه حسب نية الله ، ودفن مع آبوته وأتعفن بالقبر . 37 بس اللي أقامه الله ما تعفنش. 38 لهذا يا اخوة ، لازم تعرفوا أنو إحنا نبشركم بان مغفرة الذنوب هي بواسطة المسيح يسوع. 39 وبواسطته شيتحرر كل من يؤمن، من كل خطيئة ماهوش ممكن لشريعه موسى أنو تحرركم منها . 40 إذن أحذروا! علشان ما يحصلش لكم اللي قالوا بُه الأنبياء : 41 شوفوا يا مُستهزئين ! أ واستغربوا وأهلكوا ! لأننا شاعمل بأيامكم عمل ما تصدقوش أبداً. حتى ولو كلمتكم به . "
42 ولما كان بولس وبرنابا خارجين من بيت العبادة ، الناس طلبوا منهم أنهم يكلموهم بنفس الموضوع في السبت اللي بيجي . 43 ولما الإجتماع خلص ، كثير من اليهود ومن المتيهودين المتدنين أنضموا الى بولس وبرنابا . فجلس بولس وبرنابا يكلموهم ويشجعوهم أنهم يتوكلوا دائماً على نعمة الله . 44 وبيوم السبت التالي اجتمعوا أهل المدينة كلهم تقريباً عشان يسمعوا كلمة الله . 45 لكن لما اليهود شافوا الناس المتجمعين مسكتهم غيرة بصدورهم ، وجلسوا يعارضوا كلام بولس ويسبونه . 46 فجاوب عليهم بولوس وبرنابا بجراءة وقالوا : كان من اللازم أنه نكلمكم أنتم اولاً بكلمة الله . لكن بما انكم ترفضوها وتحكموا على أنفسكم أنكم ما تستحقوش حياة الخلود ، نحن الان شنروح للشعوب الثانية . 47 لأن الله امرنا وقال : " جعلتك نور للأمم ، عشان تحمل النجاة لآخر الأرض."
48 ففرحوا الناس اللي مش هم يهود لما سمعوا هذا ، وكرموا رسالة المسيح . وأمنوا كل اللي اختارهم الله لحياة الخلود. 49 ورسالة المسيح أنتشره بكل المنطقة .
50 بس اليهود حرضوا النسوان اللي هن مُتدينات ، والرجال اللي هم مسئولين على المدينة ، وأثاروا الإضطهاد على بولس وبرنابا لما طردوهم من البلاد حقهم. 51 فنفضوا عليهم الغُبار حق أرجلهم ومشوا بإتجاه مدينة إيقونية . 52 اما التلاميذ أمتلأوا بالفرحه وبالروح القدس .