3 وبيوم الساعة ثلاث بعد الظهر، شاف كرنيليوس بوضوح بالرؤيان ملاك من عند الله دخل لعنده وقله: "يا كرنيليوس!" 4 وشاف لعند الملاك وهو خائف وقله: "أيش ياسيد؟" فقله الملاك: "صلواتك وصدقاتك طلعن لعند الله، فذكرك الله. 5 وذلحين رسل بعض من رجالك إلى يافا وادعي لي سمعان اللي اسمه بُطرس يجي لعندك. 6 وهو جالس ببيت سمعان الدباغ عند البحر." 7 ولما راح الملاك اللي كلم كرنيليوس، دعي لي اثنان من الاخدام حقه، وعسكري صالح من المرافقين حقه. 8 وقلهم كُل اللي حصله، ورسلهم إلى يافا. 9 واليوم الثاني، لما كان الرجال الثلاثة قد هم قريبين من مدينة يافا، طلع بطرس وقت الظهر للسقف عشان يصلي. 10 وجاء له جوع كثير وكان يشتي ياكل. ولما كانوا يجهزوا له الطعام، جاءت له غيبوبة، 11 فرأى رؤيان: السماء مفتوحة، وقدر مثل قطعة كبيرة من القماش مربوطة بالأطراف الأربعة نازله للأرض، 12 ومليانة بكُل انواع الحيوانات اللي تمشي على الأرض والزواحف والوحوش وطيور السماء. 13 وسمع صوت يقله: "قم يا بطرس، اذبح وآكل." 14 فقله بطرس: "لا يا رب، أنا ما آكلش حاجة حرام أو نجس" 15 وسمع الصوت مرة ثانية: "اللي طهره الله، لاتحسبه أنتا نجس!" 16 وحصل هذا ثلاث مرات، وبعدين ارتفع القدر للسماء.
17 ولما كان بطرس محتار في نفسه ايش معنى الرؤيان اللي شافها، كان الرجال الثلاثة اللي رسلهم كرنيليوس قد سألوا عن بيت سمعان الدباغ وموقفين بالباب. 18 وسألوأ: "في واحد جالس عندكم اسمه سمعان بُطرس؟"
19 ولما كان بطرس جالس يفكر بمعنى الرؤيان، قله الروح القدس: "بوه ثلاثة رجال بالباب يدورا علوك. 20 فانزل لعندهم و امشي معاهم بدون تردد، فأنا اللي رسلتهم لعندك." 21 فنزل لعندهم وقلهم: "أنا اللي تدورا علوه. ليش جئتم؟" 22 فقالوا له: "جئنا من عند الضابط كرنيليوس وهو رجال صالح يخاف الله، ويشهد له كُل اليهود، وقد ظهر له ملاك طاهر وقله يدعي لك تجي لعنده عشان يسمع الكلام اللي عندك." 23 وقلهم بطرس يجلسوا عنده الليلة ضيوف بالبيت. والصباح مشي معاهم، ومشوا معه بعض الإخوة من يافا، 24 وباليوم الثاني وصلوا مدينة قيصرية، وكان كرنيليوس منتظر لهم، وقد دعي لي أقاربه وأصحابه المُقربين. 25 ولما دخل بُطرس البيت، استقبله كرنيليوس وسجد له، 26 فقامه بُطرس وقله: "قُم، أنا إنسان مثلك." 27 ودخل بُطرس وهو يتكلم معه، وشاف ناس كثير، 28 فقلهم: "أنتم عارفين أنه محرم على اليهودي يتعامل مع غير اليهودي أو يدخل بيته. فالله علمنا ما نعتبرش أي واحد من الناس نجس أو دنس. 29 وعشان هذا أنا جئت لعندكم بدون تردد، لما دعيتم لي، وليش دعيتم لي؟" 30 فقله كرنيليوس: "قبل اربع أيام، في نفس هذه الساعة كنت أصلي في بيتي صلاة الساعة ثلاث بعد الظهر فظهر قُدامي رجال لابس ثوب لماع. 31 وقلي: يا كرنيليوس، الله سمع صلاتك وذكر صدقاتك. 32 والآن رسل رِجال إلى يافا، وادعي لي سمعان بُطرس يجي لعندك. هو جالس ببيت سمعان الدباغ عند البحر. 33 وأنا رسلت لعندك بنفس الوقت تجي، وأنت ما قصرتش جئت. وذلحين كُلنا موجودين قُدام الله عشان نسمع كُل اللي أمرك الله فيبه."
34 فبدأ بطرس يتكلم وقله: "فهمت ذلحين صح إنو الله ما يفضلش واحد على واحد، 35 يقبل الله أي واحد يتقيه ويعمل عمل صالح من أي جنسية كان. 36 وقد رسل الله كلمته لبني إسرائيل، وبشرهم بالسلام بواسطة المسيح يسوع رب الكُل. 37 وانتم تعرفوا اللي حصل ببلاد اليهود، وبالبداية حصل بالجليل بعد المعمودية اللي دعا لها يوحنا المعمدان. 38 فالله جاب يسوع الناصري الروح القدس والقدرة، فكان يتنقل من مكان لمكان يفعل الخير، ويشفي كُل الناس اللي فيبهم شياطين، لأن الله كان معه. 39 وإحنا شهود على اللي سواه ببلاد اليهود وبالقدس، وصلبوه وقتلوه، 40 والله قامه من الموت باليوم الثالث، وخلوه يظهر، 41 وظهر مش للناس كُلهم ، ظهر للشهود اللي الله اختارهم له من اول، وإحنا اللي أكلنا وشربنا معه بعدما قام من الموت. 42 وبعدا أمرنا نبشر الناس، ونشهد إنو المسيح يسوع هو اللي اختاره الله يحاسب الأحياء والأموات. 43 ويشهد له كُل الأنبياء إنو أي واحد يؤمن بالمسيح تغفر له ذنوبه بِاسمه." 44 ولما بطرس كان يتكلم بهذا الكلام، نزل الروح القدس على كُل اللي كانوا يستمعوا كلامه. 45 واستغربوا المؤمنين اليهود اللي جاءوا مع بُطرس، لأن نعمة الروح القدس نزلت حتى على غير اليهود، 46 وسمعوهم يتكلموا بلغات ثانية، ويسبحوا الله. وبُطرس قال: 47 "يقدر واحد يمنع هاذوم الناس اللي نالوا الروح القدس مثلنا ما يتعمدوش بالماء؟" 48 وأمر إنوهم يتعمدوا باسم يسوع المسيح. وطلبوا منوه يجلس عندهم عدة أيام.