6 ¹ ದಾಸ ಆಯಿಕ್ರಾ ಮತ್ತೊಂಡ್ ವರ್ತಿ ಅಧೀನತಾಳಿ ಇಕ್ರಾತಮ್ಮ ಯಜಮಾನರತ್ತ ಅದ್ದಿ ಮಾನತ್ಕೂ ಯೋಗ್ಯರಂಡ್ ಅನ್ಪಿಚ್ಚಟ್; ಇಲ್ಲ ಅಂಡೆಕೆ ದೌರ್ರ ನಾಮತ್ಕೂ ನಂಗ ಹೊಂದಿಕ್ರಾ ಉಪದೆಶತ್ಕೂ ನಿಂದೆ ಉಂಟ ಅಕ್ಕಾದ್ ² ಎವಲಿಕೂ ಆನೆಕ್ಯೂ ಕ್ರಿಸ್ತನಕ ನಂಬ್ರಾ ಆಯಿಕ್ರಾ ಯಜಮಾನಂಗ ಇಂದಿ೦ದೇಕೆ ಅಂಗ ಆ ಯಜಮಾನಂಗಳತ್ತ ದೆಂಬೆ೦ಗ ಅಂಡು ಉದಾಸೀನ ಸೇಯದೆ ತಮ್ಮ ಸೇವೆತಾ ಫಲತ್ತ ಹೊಂದಂಗ ನಂಬ್ರಂಗ ಪ್ರಿಯರೂ ಆಗೀದ್ ಅಂಡ್ ತಿಳಿಸ್ ಅಂಗಳಿಕಿ ಎಕು ಆಯಿಕ್ರಾ ಸಂತೋಷ೦ಡ ಸೇವೆ ಸೇಯಿಬೇಕ್. ಈ ಉಪದೇಶತ್ತ ಸೆಂದು ಅಂಗಳಿಕಿ ಎಚ್ಚರ ಸೇಯಿ. ತಿಮೋತಿಯು ತಪ್ಪ ಆಯಿಕ್ರಾ ಬೋಧನೆಕ್ಯು ಪಣಟಾ ಆಶೆಕ್ಯೂ ದೂರ ಆಗಿಂದು ಸದ್ಧರ್ಮತ್ತ ಅನುಸಾರ ಸೇಯಿರಾಂವು ಬೋಧನೆ ಸೇಯಿರಾಂವು ಆಗಿರಬೇಕಂಡ ಖಂಡಿತವಾಯಿ ಎಚ್ಚರಿಕೆಯು ³ . ಯೇವ್ ಆನೆಕ್ಯೂ ಏರೆ ವಿಧವಾಯಿಕ್ರಾ ಉಪದೇಶತ್ತ ಸೆಂದು ನಂಗಳಟಾ ಕರ್ತನಾಯಿಕ್ರಾ ಯೇಸು ಕ್ರಿಸ್ತನಟಾ ಸ್ವಸ್ಥವಾಯಿಕ್ರಾ ವಾತಿಗಳಿಕಿ ಭಕ್ತ ಅನುಸಾರ ಆಯಿಕ್ರಾ ಉಪದೇಶತ್ಕ್ ಸಮ್ಮತ ಸೇನ್ದ್ಗರ್ಕ್ ಓನೇಕೆ ⁴ ಆಂವು ಒಂಡೂ ತಿಳಿಸದೆ ಕುತರ್ಕ ವಾಗ್ವಾದಗಳತ್ತ ಸೇಯ್ರಾ ಭ್ರಾಂತಿತಾಳಿ ಇ೦ದು ಮದದಿಂಡ ಕಣ್ಣು ಕಾಂಗ್ರಾ೦ವು ಆಗಿಂದು. ಇವಿಗಳಿಂಡ ವರಗ್ ಕಿಚ್ಚ ತಂಟಿ ದೋಷಣೆ ದುಸ್ಸಂಶಯ ಇಂಗಳತ್ತ ಉಂಟ ಅಕ್ಕಾದ್. ⁵ ಈದ್ ಅಲ್ಲದೆ ಬುದ್ದಿ ಕಟ್ಟು ಸತ್ಯಟಾ ವಿಹೀನ ಆಗಿಂದು ದೌರ್ರಟಾ ಭಕ್ತಿಯತ್ತ ಲಾಭ ಸಾಧನ ಅಂಗ್ರಾ ಈ ಮನುಸಂಗಳತಾಳಿ ನಿತ್ಯವಾಯಿಕ್ರಾ ಕಚ್ಚಾಟ೦ಗ ಉಂಟ ಅಕ್ಕಾದ್. ⁶ ಸಂತುಷ್ಟಿಸಹಿತವಾಯಿಕ್ರಾ ಭಕ್ತಿ ಬೆರ್ರಾ ಲಾಭ ಸರಿ ಇಗದ್. ನಂಗ ಲೋಕತಾ ವುಳ್ಳೆ ಎಂದೂ ಅತ್ಗೊಂಡ್ ವರ್ರಲಿಲ್ಲ ಅತ್ನೆ; ಅತರ ವುಳ್ಳ೦ಡ ಎಂದೂ ಅತ್ಗೊಂಡ್ ಓಗದಲ್ಲ. ⁷ ನಂಗಳಿಕಿ ಸೋರು ಬಟ್ಗ್ಯಾ ಇಂದೇಕೆ ಶಾನಾ; ⁸ ಐಶ್ವರ್ಯವಂತಂಗ ಆಗಬೇಕಂಡ್ ಮನಸು ಸೇಯಿರಂಗ ದುಷ್ಪ್ರೇರಣೆ ಅಂಗ್ರಾ ಉರ್ಲಿತಾಳಿ ಸಿಕ್ಕಿಕೊಂಡಟ ಬುದ್ಧಿ ವಿರುದ್ಧವಾಯಿ ಹಾನಿಕರ ಆಯಿ ಇಕ್ರಾ ಅನೇಕ ಆಶೆತಾಳಿ ಬುಗಾದ್. ಅಂತ ಆಶೆಯಂಗ ಮನುಸಂಗಳಿಕಿ ಸಂಹಾರ ನಾಶತಾಳಿ ಮುಳುಗ್ಸಾದ್. ⁹ ಪಣಟಾ ಆಶೆಯು ಅದ್ನಿ ವಿಧ ಆಯಿಕ್ರಾ ಕಟ್ಟತನತ್ಕ್ ಮೂಲ ಆಗೀದ್. ¹⁰ ಕೆಲವರು ಅತರ ಸಲವಾಯಿ ಆತುರ ಪಟ್ಟಟ ಅತರಿಂಡ ಕ್ರಿಸ್ತ ನಂಬಿಕೆಯತ್ತ ವುಟ್ಟು ಅಲದಾಡಿ ಅನೇಕ ವೇದನೆಗಳಿಂಡ ತಮ್ಮನ್ನ ತಿವಿಸಿಕೊಳ್ಳಾದ್. ¹¹ . ಎಲೈ, ದೌರಟಾ ಮನುಸನೇ, ನೀನ್ ಆನೆಕ್ಯೂ ಇವುಗಳಿಕಿ ದೂರವಾಗಿರು; ನೀತಿ ಭಕ್ತಿ ನಂಬಿಕೆ ಪ್ರೀತಿ ಸ್ಥಿರಚಿತ್ರು ಸಾತ್ವಿಕತ್ವ ಇವುಗಳತ್ತ ಸಂಪಾದಿಸಿರ್ಕ್ ಪ್ರಯಾಸ ಸೇಯಿ. ¹² . ಕ್ರಿಸ್ತ ನಂಬಿಕೆಯುಳ್ಳ೦ಗ ಸೇಯ್ರಾ ಶ್ರೇಷ್ಠ ಹೋರಾಟತ್ತಾ ಸೇಯಿ, ನಿತ್ಯ ಜೀವನತ್ತ ಪುಡಿಸ್ಕೋ; ಅತಕಾಗಿ ದೌರ್ರು ನಿನಕ ಕರ್ದ್ನು, ತಿರಗ್ ನೀನು ಅನೇಕ ಸಾಕ್ಷಿಟಾ ಮುನಕ ನಲ್ಲ ಪ್ರತಿಜ್ಞೆ ಸೇಂದಿರಲ್ಲಾ. ^{13 14} 13. ಸರ್ವಸೃಷ್ಟಿಕಿ ಜೀವನಾಧಾರಕನಾಯಿಕರಾ ದೌರ್ರಟಾ ಮುನಕೂ ಪೊಂತ್ಯ ಪಿಲಾತನ ಕಾಲತಾಳಿ ಶ್ರೇಷ್ಠ ಪ್ರತಿಜ್ನೆಯತ್ತ ತಾನೇ ಸಾಕ್ಷಿ ಆಗಿಂದು ಸ್ಥಾಪನೆ ಸೇಂದಿಕರಾ ಕ್ರಿಸ್ತ ಯೇಸುನಟಾ ಮುನಕೂ ನಾನು ನಿನಕ ಖಂಡಿತವಾಯಿ ಸೋನ್ನರಾದ್ ಎಂದ್ ಅಂಡೆಕೆ- 14. ನಂಗಳಟಾ ಕರ್ತು ಆಯಿಕ್ರಾ ಯೇಸು ಕ್ರಿಸ್ತು ಪ್ರತ್ಯಕ್ಷ ಆಗ್ರಾ ತನಕ ನೀನು ಸುವಾರ್ತೆತಾ ವಿಧಿಯತ್ತ ನಿಷ್ಕಳಂಕವಾಗಟ್ ನಿಂದಾರಸಹಿತವಾಗಟ್ ಕಾಪಾಡ ಬೆಕ್ . ¹⁵ ಭಾಗ್ಯವಂತನಾಯಿಕ್ರಾ ಏಕಾಧಿಪತಿಯು ತನ್ನ ಕ್ಲುಪ್ತ ಸಮಯತಾಳೆ ಆತನಕ ಪ್ರತ್ಯಕ್ಷ ಪದಸಿದ್ನು. ¹⁶ ಆ ಏಕಾಧಿಪತಿಯು ರಾಜಾಧಿರಾಜು ಕರ್ತರಟಾ ಕರ್ತು ತಾನೊಂಡೆ ವರ್ತಿ ಅಮರತ್ವವುಳ್ಳ೦ವು ಅಗಮ್ಯ ಆಯಿಕ್ರಾ ಬೆಳಕತಾಳಿ ವಾಸ ಸೇಯಿರಾಂವು ಆಗೀರು; ಮನುಸರಾಳಿ ಎದೂ ಆತನಕ ಕಾಂಗದಿಲ್ಲ, ಎದೂ ಕಾಂಗ್ರ ಮಟ್ಲೇ ಇಲ್ಲ; ಅಂವನಿಕಿ ಮಾನು ನಿತ್ಯಾಧಿಪತ್ಯು ಇಕ್ಯಟ್. ಆಮೇನ್. ¹⁷ ಇಹಲೋಕ ವಿಷಯತಾಳಿ ಐಶ್ವರ್ಯ ವುಳ್ಳ೦ಗ ಅಹಂಕಾರಿಗಳ ಆಗಿ ಇಕ್ಕದೆ ಐಶ್ವರ್ಯತ ಮೇನೆ ನಿರೀಕ್ಷೆ ಅಕ್ಕಿದೆ ನಂಗಳಟಾ ಅನುಭೋಗತ್ಕೊಸ್ಕರ ನಂಗಳಿಕಿ ಅದ್ನಿ ¹⁸ ಎಕುವಾಯಿ ದಯಪಾಲಿಸ್ರಾ ದೌರ್ರ ಮೇನೆ ನಿರೀಕ್ಷೆತಾ ಅಕ್ಕಿಬೆಕ್ ಅಂಡ್ ವಾಸ್ತವ ಆಯಿಕ್ರಾ ಜೀವನತ್ತಾ ಹೊಂದರ್ಕ ಅಂಗ ನಲ್ಲಾದ್ ಸೇಯಿರಂಗ ಸತ್ಕಾರ್ಯತಾಳಿ ಐಶ್ವರ್ಯಂಗ ¹⁹ ದಾನಧರ್ಮಗಳತ್ತ ಸೇಯಿರಂಗ ಪರೋಪಕಾರ ಸೇಯಿರಂಗ ಆಗಿಂದು ಮುನ್ನ ಇಕ್ರಾ ಕಾಲತ್ಕ್ ನಲ್ಲ ಅಸ್ತಿವಾರ ಆಗ್ರಾದ್ ತಿರಗ್ ತಮಕ ಕೂಡ್ಪಿಚ್ಚಕೊಳ್ಳಬೇಕಂಡ್ ಅಂಗಳಿಕಿ ಅಜ್ನಾಪನೆ ಸೇಯಿ. ²⁰ ಎಲೈ ತಿಮೊತಿಯನೇ, ಜ್ಞಾನೋಪದೇಶ ಅಂಡ್ ಸುಳ್ಳಾಯಿ ಸೋನ್ನರಾ ಬೋಧನೆಕಿ ಸಂಬಂಧಪಟ್ಟ ಪ್ರಾಪಂಚಿಕ ಆಯಿಕ್ರಾ ಆ ಹರಟೆ ವಾತಿಗಳಿಕಿ ವಿವಾದಗಳಿಕಿ ನೀನು ದೂರ ಆಗಿಂದು ನಿಂಟಾ ವಶತ್ಕ್ ಕುಡ್ತಿಕ್ರಾತ್ತಾ ಕಾಪಾಡು. ²¹ ಕೆಲವಂಗ ಆ ಸುಳ್ಳ ಆಯಿಕ್ರಾ ಜ್ಞಾನತ್ತ ಅವಲಂಬನೆ ಸೇಂದಟ ಕ್ರಿಸ್ತ ನಂಬಿಕೆಯಿಂಡ ಭ್ರಷ್ಟಂಗ ಆಸು. ಕೃಪೆಯೂ ನಿನ್ನ ಬೇಟೆ ಇಕ್ಕ್ಯಟ್.