¹ Te ngasa bo kumu bodiko bo kwani na mokonji o ndako iyo oimana sobusa, tina ebo adiye ba buli poji gbiye ende. ² A dimejaka atei ebu omti na isu na isu, pe aba domi ta gbiye ende. ³ A sotoi ta ewole e isato, pi a anii ba kina badaka pepe bokoko eka. ⁴ A bali nabu: Keeni pe a gbiye embi, na paleya no iye edi na tina. Pe bakeke. ⁵ A imani naikina ta ewole e isamano pe e libuwa,pe akoi koko ndenge emoti. ⁶ A imana yo ta ewole e domi na emoti, a taneya ba kina ibaya badaka ena, pe a ali nabu: Tina boni odini iyabo isu isusu pepe bo ako eka? ⁷ Bamo sombeji: E nejibo moto a tombiti iso. Keeni pe ta gbiye embi, a bali nabu. ⁸ A imeya momoko, mokonji o gbiye abali na mo kengeli onde: Beya ba koeli ba susu, pe oba futeye lifuta, bo banda na osuka kini o boso. ⁹ Ibaya ba ewole edomi na emoti ba dua, pe badii omoti omoti ikuta imoti. ¹⁰ Oboso adua naikina, bo kanisa bo adialeya bula; kasi ba diaka omoti omoti likuta limoti. ¹¹ A diyabo, ba banda bo timowa mokonji o ndako, ¹² pe ba bali:ibayao bakoi koko ewole emoti, pe ba diaka nasu elenge emoti iso iba bakeaka molunge na bwembu. ¹³ A sombeji na omoti obu: mwaninga, napiti we bobunga te; odimiti na mbi natina e pata emoti? ¹⁴ Tomba iye edi poji we, pe okeye. Na pali napeye nande bodolwa owe. ¹⁵ E dimejamiti na mbi bo nakoye iye edimi mbi? oneke bobe na diso ndani boo nadaye mobe? ¹⁶ Na tina yena ba boso badabi bato ba ngongo. ¹⁷ A daka Yesu a konda ta Yekusaleme, a tombi yongi jiba yekoji domi na babaye, pe abali nabu na njeya: ¹⁸ Injani, bo kondakani ta Yelusaleme, pe mwana omoto apamaleya ama momo ma ba nganga na ba komeli. bamo dumbi a yogo, ¹⁹ pe bamo dumbi ta momo maba bapagano, bamo bomi na pengu, pe bamo baki; pe lisu lima sato a sekwa. ²⁰ Nabowa nango omwana o Zebedai a sindani adi Yesu na bana bande, pe andi ma gbunda, tinabo amo waje mojo. ²¹ abali nande: Opali yeni? paka ndingisa, a bali nande, ibo bana bami bambi ba baye babo, badaye ta bokumu bo we, omti a ebo emomi pe okina a ebo emwali. ²² Yesu a sombeji: O jebitini eka e wajaka nu te. O bwanini bo mwaka keni iye ekoki mbi bomwa? Ba bali bo bwani bo mwaka. ²³ Pe aba sombeji: Edi soti boo omwabini kopo e bwale bombi; kasi iye edi boda ta ebo ebami embi pe e mwali, yo e wokeiti mbi te,pe e pambi adi moto yo tata ombi a bongeja. ²⁴ Ibaya domi, a keya bo bowa, ba diya molema saya na tina e ba ngene ba baye. ²⁵ Yesu aba bei, pe a bali: O jebini bo ba kinji ba bikolo badi oindaneja bu, pe ba nene badi osalela bu. ²⁶ Edabiti elenge emoti atei enu. kasi iyo o dimi bo adae monene atei enu; kinabo yo adae mosali; ²⁷ Pe iyo odimibo adae moto oyambo atei enu, adae mo buli onu. ²⁸ Edi bowa na tina emina mwana omoto aduwa, pepe ibo bamo sunge,kasi na tina ebo sunga pe apeye bo moi binde elenge e miya adi bato. ²⁹ A imana yo ta Yeliko, bato bula ba susa Yesu. ³⁰ Pe inja bato ba miso ma gwake ba baye, ba dayi ta suka e njeya, ba aki boo Yesu anoko yana, pe ba gamka: Diya waa esu, kumu, mwana o dawidi! ³¹ bula ba ba siyaka, poji badae bogo; kasi ba gamaka bo pipi naikina: a keyasu waa, kumu mwana o dawidi! ³² Yesu a mai, aba bei, pe abali: O palini na koeno yeni? ³³ Ba bali nande: kumu, bo pali boo miso masu ma dioye. ³⁴ Adumi na waa,Yesu a boli miso mabu; pe na mbala yena ba dii miso, pe bamo susani.