¹ Busa bomoti buwa, Yesu aimana a ndako, pe adaa ta suka e duwa. Bato bike basanganaka mbuti nande, akonda ta bwato, pe ada. bato baya bama ta mbuti e libongu. ³ Na aba balea ngando jike na masese, pe abali : mooni o leka amana bo anee. ⁴ Adaka yo ana, ekina ndambo e mboto ekwa nande ta nzea : mbulu badoi, pe bayaka. ⁵ Ekina ndambo koko ekwa ta bisika bi matai, iyana kpoto idaka mingi : na ji toi pele mene, zambi ji tana kpoto ji ndinda pepe ; ⁶ kasi, ehole mose adua, ji ngoa pe na ji kakana, janga e nginga. ⁷ Ndambo ekina ekwa atei e nzube : nzube ji kandoa, pe jifakaka. ⁸ Ekina ndambo jikoa ta kpoto epele : ibota mbumba, emoti ebota mbuma kama, ekina tuku isamano, ekina tuku isato. ⁹ Kina bo iyo adi na matoi ma booka ake. ¹⁰ Bayekoli bapusana nande, pe babala nande : Tina boni obalaka na bu a tei masese ? ¹¹ Yesu aba sombeja : zambi epama nanu bo ojebeni sekele e bokumu bo diko, pe iye ei pama nabu boo bajebe te. ¹² Te ngasa bakape iyo adi nayu, pe adiabi bonene, kasi na iyo aditi na eka bakatoabi nongo iyo edi nande. ¹³ Na tina emina na ba baleaka na masese, tina bo na bone bataneke dea pepe, pe na booka batakakate dea na bata sosoloko dea. ¹⁴ Na tina ebu lisakoli e Yisaya edi okokijama : Oka na matoi manu, pe ososolobiti eka ; Oinjakabini na miso manu, pe onebini eka pepe. ¹⁵ Zambi milema mi bato baya mimei mipipo, bapingeji matoi mabu, pe badipi miso mabu, bobanga bo batane na miso mabu, bataka na matoyi mabu, bata sosololo na milema mibu te, bata jima te, pe nata baheleja te. ¹⁶ Kasi sepi na miso manu, tina bo maneke, pe matoi manu tina bo makaka ! ¹⁷ Nabali nanu ta soti, basakoli banene na bato basembo basepa bo bana iye enekeno, pe baine te, booka iye ekakano, pe baikaka. ¹⁸ Ino, kani iye ebali liloba li moneli. ¹⁹ Ekada bo moto omoti aki liloba li bokumu pe ai sosoliti te, moyini adoi pe adongezi iye enama ta molema monde : adi moto yo odia mboto ta boyai bo nzea. ²⁰ Iyo odia mboto ta tei e matai, adi moto yo okaka liloba pe adi yambi na sepi ; ²¹ kasi nginga iditi atei ende mene, ataki ngulu, pe, ehole edua mikakatano na minyoko na tina e liloba, adiabi libaku e bokwa. ²² Iyo odia mboto atei e nzube, edi yo okaka liloba, kasi edi adi yo makanisi ma bianga pe mapengoji ma bodia ewaka liloba, na ata boma mbuma. ²³ Iyo odia mboto ta mokpoto mopele, edi iyo oki liloba pe oi sosoli ; aboti mbuma, pe mbuma emoti kama, ekina tuku isamano, ekina tuku isato. ²⁴ Abapa lisusu likina, pe abali : bokumu bodiko bodi olongo moto yo onaka mboto epele ta gbie ende. ²⁵ Kasi, ehole eweke bato, monguna onde adoi, ani ngongo atei e ndongo, pe anoi. ²⁶ Ehole ebanda milona bokandoa pe bobota mbuma, ngongo koko imani. ²⁷ Basali ba moswa ndako badoi bobala nande : Kumu, oi naka mboto jipele ta gbie ewe ? Ebandi boni bo ngongo jiboloe atei ? ²⁸ Abasombeji : Edi monguna omoti akoi boa. Pe basali babali nande : Ojimi bo bokee bodongeja ? ²⁹ Abalabo, Pepe, na bobanga bo abobikoa ngongo, osaka bikoani ndongo ehole emoti. ³⁰ Kinani ikandoe engbanga emoti na ekina tee a ehole e botoa, pe, a ehole e botoa, nabalabi na batoeli : Bikoani ngongo boso, pe sangejani na mipiko tina e bongojama, kasi sangejani ndongo mopole mombi. ³¹ Abapeke lisese ekina, pe abali : bokumu bo diko bodi ameti na mbuma e seneve iye etombi moto pe anii ta gbie ende. ³² Edi eka ekeke bonoo mboto esusu ; kasi, atoyo, adi bonene bonoo nzuwa pe aimei mole, a esika bo mbulu ba diko badua boda ta bitape bina. ³³ Abali nabu lisese likina : bokumu bodiko bodi ameti na fulu iye mwali omoti pe aisi ta emekeli isato i moteke, kino bo mapa masusu majangoe. ³⁴ Yesu abali na bato banene ngando jisusu atei e masese, na ai bala te na botaka masese, ³⁵ na tina bo ekokejame iye ebalama na mosakoli : na dipoabi monoko mombi, natondobi ngando jiboloma banda bokomo bo ngondo. ³⁶ Naboa ayaneja bato baya banene, pe akweya ta ndako. Bayekoli bande basindi nande, pe babali : Limbola so lisese lingongo li gbie. ³⁷ Asombeja : Iyo onaka mboto epele, edi mwana o moto ; ³⁸ gbie, edi ngondo ; mboto epele, edi bana ba bokumu ; ngongo, edi bana ba moto o mayele mabe ; ³⁹ monguna iyo oni mboto, edi mongoli ; ehole ebo toa mbuma, edi suka e ngondo ; batoeli ba mbuma, edi banje. ⁴⁰ Nzokande,elenge e bobikoa ngongo pe bodumba ta mosa, edabi elenge ameti na suka e ngondo. ⁴¹ Mwana o moti alomabi banje, ibadongejabi a bokumu bonde mabaku masusu pe iba bakoko bokeseni : ⁴² pe abandumbabi atei e litumbu li mosa mopipo, esika edabi biyo na bosiyana mino. ⁴³ Na boa bato ba sembo bangengebi olongo mose ta bokumu bo sanswabu. Kina bo iyo adi na matoyi ma booka ake. ⁴⁴ Bokumu bo diko bodi ameti na kita ebolama ta gbie. Moto yo ae diya ae boli ; pe atei sepi ende, ateke dea ji susu jidi nande, pe asombe gbie yena. ⁴⁵ Bokumu bo diko bodi ameti na mosombi iyo odukaka miyaka mipele. ⁴⁶ Adii miyaka mi motuya monene pe akei bo botekeleka losusu lodaki nande pe asombi moyaka muwa. ⁴⁷ Bokumu bo diko bodi ekina ameti na monyama modumbi bo ta dua pe mondoaka swi ba elenge esusu. ⁴⁸ A ehole eluma mo, molobi agbuli ; pe, ngongo ji boda a mbongu, basi ta isasu iye edi epele pe badumbi iye edi ebe. ⁴⁹ Edabi ameti na suka e ngondo. Banje baduabi akobola bato ba kele na bato ba sembo, ⁵⁰ pe babadumbabi ta mosa monene, a esika edabi biyo na basiayana mino. ⁵¹ Ososolini ngando jiya jisusu ? Hii, bosembeji bowa. ⁵² Pe abali nabu : Na tina emina, mokomi mosusu iyo otali ngando ji bokumu bo diko adi ameti na moswa ndako iyo oiwaka ta kita ende leka loyene na loyou. ⁵³ Ehole esieja Yesu masese maye, adonga yana. ⁵⁴ Akee a etuka ende e ngando, akojoka ta Sinagoga, bo baya bamokaka badaka na bokamoa pe babala : Adiyo bwanya na makamwisi maa ani ? ⁵⁵ Editi mwana o mowali o mabaya ? editi Malia nango onde ? Yakobo, Yosefu, Simona pe Yuda, baditi bangene bande ? ⁵⁶ pe bangene bande babali baditi basusu atei enu ? Ahuli yo na ngando jiya jisusu ani ? ⁵⁷ Pe adaka atina ebu nzea emoti e bokwa. Kasi Yesu abali nabu : Mosakoli a tiolamaka oko ta etuka na ndako ende. ⁵⁸ Pe bikamwa binene boikomo ta esika yena, a tina e botaka ejimeli ebu.