¹ Inja ehele, bapalami, mosono mo ibaye mokomea mbi nu. ta tei e momoti na mokina nali bo inja bosusuja no na bikebiseli mayele manu, ² Atina ebo oleheni midjo mi tondo boso anjea e basakoli basenwake, pe na mobeko mo Kumu pe moheleji, moteyama na Batoma, ³ Bojebaka yambo ji bosusu, ta maswi ma suka, baseki ba bato baluaka ba boseke bobu, bodala bokokana na na maluli ma bu, ⁴ pe babala: elaka e bodua bonde edi ani? Te ngasa, banda agwa batata, esusu edi ko ndenge e ebandeli e bokomo bo ngondo. ⁵ Babosaka, ba boa, bo badiko idaka koko a njia e liloba li Njambe, elenge emoti kpoto di moti di gbulama ta maliba pe ji koomo na njia e maliba, ⁶ Pe bo a nzea e leka luwa ngondo ebajama, emiama na maliba, ⁷ Njokande, na njia e liloba limoti diya, liko pe kpoto ibuseibu ibaneama pe elengeleme poji mosa, poji liswi li bosambija pe bobejama bo bato babe. ⁸ Kasi edi na eka emoti, bapalami, iye ekokiti na nu oboseni, edi iye, a boso bo Kumu, diswi dimoti lili elenge mbuwa koto, pe mbuwa koto elenge diswi dimoti, ⁹ Kumu taliake ngonga poji bikokeja elaka ende te, elenge edimyaka bakina; kasi akalie molema moyayi adiso, taka ebodimia bo omoti abunge, kasi na bopalaka bo basusu bahekoje milema. ¹⁰ Busa bo Kumu boduabi elenge moyibi; a diswi dia, diko dinoko na kekele, deka dosusu lo beya, pe kpoto na leka londe losusu bongwaka. ¹¹ Na boa leka losusu bobwani bodimwa, ekada te pe bosenwake na moda na bosapa na ebikeli epele, ¹² Na boa odiombani pe inja ni boluwa bo diswi di Njambe, Tina emina diko di bwanaka libeaka pe leka lobeya loyangwaka bi ! ¹³ Kasi bombaka dea, bolanda ndaka ende, diko disika pe kpoto di sika, ena sembo eda. ¹⁴ Tina emina, bapalami, na bokaka ngando ji, sapani na bo otanie nu taka e litono pe olumini ba bowi. ¹⁵ Jimeani molema moyayi mo Kumu edi lobiko lo nu, elenge e ngene mopalami osu Polo akomeya no, bokokana na bwanya bopama na nde. ¹⁶ Ili iye ekoko yo ta misono misusu, a tei emina abalaka tina e makamo ma, atei emu edi na meko mipipo mi bososolo, imi bo bato bataki bojeba pe malejamiti bopele babejaka ebaleli emu, elenge e misono mikina, poji bobejama bobu mene. ¹⁷ Ino koko, bapalami, iba balia ekebiseli, dani na ekenge, na tina ebo mata bungeja iba babe, bo otakeni bokwajama na molende monu. ¹⁸ Kasi kaandoani atei e ngolu pe na bojebi bo Kumu pe Moheleji Yesu Klisto. adi yo edae kembo, sikaye pe poji seko na seko! Amene!