¹ Ngingotkan dietn agoe tuno' ngen pumuruntoh ngen punguasa, nurut ngen siyop ngulaku sutiyop pubuwot do paguh, ² De' ngurotuh esih ja, de' budoruh, paguh toi sereta munu'u-munu'u busukop buralus ngen sumua nya. ³ Sobob, to'u nyemin nyeh gi'e budo, de' nurut, osot, dobudo-budo bumacopm kuma'u ngen kusenang, mudip wa'ng kebi'a' ngen dengki, do tigi'i ngen samoh-samoh tigi'i ngen ni'i-ni'i'ou. ⁴ Pa', watu pumaguh ngen Kaseh Tompo'u, Punyulamoet to'u, do payatn, ⁵ Yuh nyulamoet to'u, bukutn kerena pubuwot do munu'u do to'u ngulaku, subukutn kerena pungaseh-Yuh luwot pungupo' do ngurana' agi'e ngen do umpaguh Roh Kudus, ⁶ do Yuh puriyetn nun tunuh to'u ngen melimpoh luwot Kristus Yesus, Punyulamoet to'u. ⁷ Jaji, mus do ngkudog punyugotn-Yuh, to'u jaji ahli warih susuai ngen pungarop akon mudip do kokoel. ⁸ Bobo'u sono'u ti'i munu'u dog. Tenta'ng hoel ti'i oku'u rou mu'u munu'u-munu'u yaketn agoe dietn do mus pucayo'u neko' Tompo'u dopud rajitn ngulaku pubuwot do paguh. Hoel-hoel ti'i paguh ngen buguna unto' nya kopa. ⁹ Pa', ngela'lah busuka'ng-busuka'ng, kuturutn-kuturutn, sulisih, ngen buderuh do budo tenta'ng kupm Taurat kerena hoel ti'i de buguna ngen podo'u-podo'u. ¹⁰ Unto' nya do bodo'u nya pocoh, suniyo'u lah yuh ni'i atou duwuh kali, mus setn ungkujo'u lah yuh. ¹¹ Sobob mu'u pu'otn nya do mungsetn moeh do ungkosot ngen muwo'u dusa, yuh bodo'u monug kupm unto' odup'ou dadup. ¹² Mus oku'u ngutus Artemas atou Tikhikus ngen mu'u, burusaha monug neko' oku'u nun Nikopolis kerena oku'u mus notud sono'u unto' ngunu'u nun o'ih kutuwoi musipm modud mati'u. ¹³ Ngen sukuwot tunaga mu'u, bantu'u lah Zenas, nya do mae kupm setn, ngen Apolos do oduh nun wa'ng pumponu agoe dietn de' kura'ng koyuh enih pun. ¹⁴ Aruslah bi odup bulajoer rajitn wa'ng ngulaku kereja do paguh agoe dietn dopud ngisi'u kupoolu mudip on'u-on'u ngen de' mudip ngen de' bubuwo'u. ¹⁵ Sumua nya do oduh ngen oku'u sunampei salopm unto' mu'u. Sunampeikan salopm ku'u neko' dietn do kunaseh omi'u wa'ng imon. Punyugotn nyereta mu'u sumua.