¹ Pa', mu'u, ngajoerlah hoel-hoel do susuwai ngen pungajoer do sihot. ² Budari do rebih tuuh arus dopud untad odup, turomot, nguasa odup, sereta buwa'u wa'ng imon, wa'ng kaseh, ngen wa'ng kurajitn. ³ Ngen, budayuk'ng-budayuk'ng do rebih tuuh arus tuju'u tingkoh laku do alepm, bukutn ungki'a' atou anoel mabuk, pa' arus ngajoer do paguh ⁴ Ngen mungsetn, dietn dopud suniyo'u bara budayuk'ng do dena' unto' kunaseh bonuh'ou, kunaseh ena'-ena'ou. ⁵ Nguasa odup, alepm, ngurus urusan momo'u'ou, paguh toi, tuno' ngen bonuh'ou agoe sono'u Tompo'u de' do nulo'u. ⁶ Mungsetn gi'e, ngujoerlah nya-nya dena' agoe dopud nguasai odup. ⁷ Wa'ng sugala hoel, jajikan odup mu'u cuntoe wa'ng pubuwot-pubuwot do paguh. Wa'ng pungajoer, tuju'ulah kubujog, kuhormot, ⁸ nyono'u do munu'u do de' dokus, sampei suna rawotn akon jaji moyo'u kerena de' dopud nyono'u hoel do bi'a' tenta'ng to'u. ⁹ Jungos-jungos arus tuno' neko' tuwotn-tuwotn dietn wa'ng sugala hoel, usahakan unto' nyenang dietn, ngen de' bunantoh. ¹⁰ Soh ngongku, pa' tuju'u lah bawa mu'u dopud pucayo'u agoe nun wa'ng sugala hoel dietn nguromot pungajoer Tompo'u, Punyulamoet to'u. ¹¹ Sobob, punyugotn Tompo'u do tobotn kusulamoet moeh mayan unto' sumua nya, ¹² unto' bodo'u to'u gogoh nula' hoel-hoel do de' alepm atoupun awa nafsu dunia sampei to'u dopud mudip nguasa odup, adel, ngen alepm nun jamoen do titi'u, ¹³ sementara to'u nungu'u pungarop do tumos burokot, oduhlah pumonug do ntumos kemuliaan musu Tompo'u Do Mahabaas, ngen Punyulamoet to'u, Kristus Yesus. ¹⁴ Yuh moeh jugotn odup-Yuh unto' to'u unto' bayour to'u musu sumua pubuwot bi'a' ngen unto' nguroseh odup-Ou, umot do punirih-Yuh do rajitn ngulaku pubuwot do paguh. ¹⁵ Najoerlah sumua ti'i. Jugotnlah putuwoh ngen suniyo'u lah nengi sugala kuwibawa. Eba'u oduh nya do pudubo'u mu'u.