¹ Musu Paulus, jungos Tompo'u ngen rasul Kristus Yesus, do utus unto' imon nya-nya do punirih Tompo'u ngen pumpu'ot akon kumunu'u do mimpitn neko' kualepm ² agoe dietn dopud pungarop mudip kokoel, do janyikan sani nyeh subayuh jamon miradn uleh Tompo'u do nya' perenah ngurako. ³ Nun watu-Yuh, Yuh moeh payatn sono'u-Yuh luwot punyampei agoh do moeh do pucayo'u neko' oku'u susuai ngen puruntoh Tompo'u, Penyulamoet to'u. ⁴ Neko' Titus, ena' do sah wa'ng imon to'u busamoh. Punyugot ngen damoei bujaya musu Tompo'u, Samo'u, ngen Yesus Kristus, Punyulamoet to'u ⁵ Kerena alos ti'i lah oku'u konteg mu'u nun Kreta, agoe mu'u dopud nyulesei enih do gi'e poolu do natur ngen dokot nya untuuh-untuuh nun sutiyop Kuta, mun do oku'u pusut ngen mu'u. ⁶ Yuh aruslah nya do de' cacot, bonuh musu ni'i osou, umpu'u ena'-ena' do pucayo'u, ngan de' do nuduh kerena mudip de' bumoral atou burontak. ⁷ Sobob ,seura'ng pumurati umot aruslah nya do de' bucacot subagei pumbantu Tompo'u, de' juk'ng, de' punoruh, bukutn pumabuk, de' anoel buderuh ngen de' surakah ngo'u kuuntuk'ng'ou. ⁸ Subalik'ou, anoel jugotn antuk'ng ginop, ro'u ngen enih do paguh, paguh pungatur, adel, alepm, ngen dopud nguasai odup'ou. ⁹ Yuh bupoguh kuwot ngen sono'u do dopud do pucayo'u, susuai ngen do mus do ajoer, singa yuh dopud jugotn putuwoh munurut pungajoe do paguh ngen suniyo'u dietn do bunantoh'ou. ¹⁰ Sobob, oduh muwo'u nya do buruntak, anoel ngumong pumula'u, ngen ngurakor, unto' dietn do burasol musu kulumpok nya Yahudi. ¹¹ Dietn layak do tutu bobo'u'ou kerena dietn sunusoh sumua momo'u ngen ngajoer hoel-hoel do suarus'ou de' dietn najoer, do malah bodo'u monug hoel do noeh koyo'u. ¹² Ni'i musu dietn, oduhlah nabi odup dietn, nyono'u, "Dasor nya Kreta pungurakor, mun bunata'ng do juk'ng do bi'a' ngen punuru'u do bujag." ¹³ Kusasi ti'i munu'u. Kerena ti'i, suniyo'u lah dietn ngen koros agoe dietn jaji buwa'u wa'ng imon. ¹⁴ Eba'u lah purati tanun-tanun nya Yahudi ngen puruntoh nya-nya do nula' kumunu'u. ¹⁵ Unto' do buroseh, sumua oduhlah buroseh. Pa', unto' dietn do dokus ngen de' pucayo'u, nya' ni'i pun do buroseh kerena mun pumuker atou pun owa'ng do turup dietn oduhlah dokus. ¹⁶ Dietn ngaku'u konoel Tompo'u, pa' pubuwot dietn nyangkoel Tompo'u. Dietn setn dokus, de' nurut, ngen de' Sangup ngulaku enihpun do paguh.