¹ "Ngen, neko' maleket umot nun Sardis nulislah: Ti'i lah sono'u Yuh do oduh ju'u Roh Tompo'u ngen ju'u binta'ng setn: Oku'u pu'otn pubuwot-pubuwot mu'u. Nya nyono'u bawa mu'u mudip, pa' sumunu'u'ou mu'u kobus. ² Ati-atilah, ngen kunuwotlah hoel-hoel do gi'e oduh, do amper kobus, kerena Oku'u bayuh dopud kereja mu'u sumpurna wa'ng pungurujuh Tompo'u. ³ Kerena setn, tuyutlah enih do moeh mu'u turumo'u ngen kurungoh, nurutlah setn ngen butobotlah! Kalou mu'u de' ati-ati, Oku'u akon monug mun seura'ng pungongku ngen mu'u nya' akon pu'otn jopm kuduh Oku'u akon monug ko' mu'u. ⁴ Pa', mu'u oduh kuduh ra'ng nun Sardis do bayuh nokus bukokos dietn, ngen dietn akon ponu busamoh Oku'u nengi bukokos budo'u kerena dietn pantoes. ⁵ Nya do menang akon do ungkasuk bukokos budo'u ngen Oku'u de' akon ngapus gonon'ou musu Kitob Pumudip. Oku'u akon ngaku'u gonon'ou nun jowi Ma'u-Ku'u ngen nun jowi maleket-maleket-Yuh. ⁶ Yuh do oduh kepik'ng soolah kurungoh enih do nyono'u Roh neko' umot-umot. ⁷ "Ngen, neko' maleket umot nun Filadelfia nulislah: Ti'i lah sono'u musu Do Cuci ngen Do Munu'u, do toguh kunci Daud, do duka'u ngen nya' seura'ng pun dopud tutu'ou, do' tutu ngen nya' seura'ng pun dopud duka'u'ou: ⁸ Oku'u Pu'otn pubuwot-pubuwot mu'u. Ngurujuhlah, Oku'u moeh duka'u untubatn unto' mu'u, do nya' seura'ng pun dopud tutu'ou kerena kukuwot mu'u cu', pa' mu'u moeh nurut sono'u Ku'u ngen de' nyangkoel gonon-Ku'u. ⁹ Ngurujuhlah, Oku'u akon noeh suna umot sutotn setn do ngaku'u subagei nya Yahudi , pa' sumunu'u'ou bukutn, subukutn ngurako, Oku'u akon noeh dietn monug ngen bulutut nun kojo'u mu'u, ngen bodo'u dietn pu'otn bawa Oku'u kunaseh mu'u. ¹⁰ Kerena mu'u moeh nguria sono'u kurajitn-Ku'u, Oku'u akon nguria mu'u musu watu kususoh do akon monug ko' sururuh dunia, unto' norei dietn do ngunu'u nun bumi. ¹¹ Oku'u jagu'u monug. Toguhlah enih do oduh ngen mu'u agoe nya' seura'ng pun akon nomi' surouk'ng turomot mu'u. ¹² Yuh do menang, Oku'u akon jaji'ou tungka'ng punyanga Romin Cuci Tompo'u-Ku'u, ngen yuh de' akon ponu agi'e musu itn, ngen Oku'u akon nulis ngen'ou gonon Tompo'u-Ku'u ngen gonon kuta Tompo'u-Ku'u, yuh mah Yerusalem ba'uh, do munga'u musu suruga, musu Tompo'u-Ku'u ngen gonon-Ku'u do ba'uh. ¹³ Yuh do oduh kepik'ng soolah kurungoh enih do nyono'u Roh ngen umot-umot." ¹⁴ "Ngen, neko' maleket umot nun Laodikia nulislah: Ti'i lah sono'u Sang Amin, sasi do sutia ngen munu'u, miratn musu sugala pungunoh Tompo'u: ¹⁵ Oku'u pu'otn pubuwot-pubuwot mu'u, bawa mu'u de' modud atoupun poros. Supaguh'ou kalou mu'u mudud atou poros. ¹⁶ Jaji, kalou mu'u gunguh, de' poros atoupun modud, Oku'u akon nguto'u mu'u musu bobo'u-Ku'u. ¹⁷ Kerena mu'u nyono'u, 'Oku'u kaya raja ngen de' kura'ng enih-enih,' ngen de' pu'otn bawa sumunu'u'ou mu'u mundurita, mala'ng, musuketn, bokop, ngen runto'ng. ¹⁸ Oku'u suniyo'u mu'u unto' burih musu-Ku'u emos, do nguroseh nengi opui agoe mu'u jaji oduh manon, ngen bukokos-bukokos budo'u agoe mu'u dopud nengi'ou sampei nyom moyo'u kerena runto'ng mu'u de' akon mayan, ngen nuntos minya' nun botuh mu'u agoe mu'u dopud ngurujuh. ¹⁹ Dietn do Ku'u kunaseh, Ku'u suniyo'u ngen Ku'u ngajoe, kerena setn relalah toi mu'u ngen butobotlah! ²⁰ Ngurujuhlah! Oku'u mujog nun adop untubatn ngen nutog. Kalou oduh nya do kurungoh yu Ku-u ngen duka'u untubatn, Oku'u akon murut neko' yuh ngen man busamoh yuh, ngen yuh busamoh-Oku'u. ²¹ Yuh do menang, Oku'u akon ngijetn yuh nguru'u busamoh-Ku'u nun takhta-Ku'u, samoh mun Oku'u moeh menang ngen nguru'u busamoh Ma'u-Ku'u nun takhta-Yuh. ²² Yuh do oduh kepik'ng soolah kurungoh enih do nyono'u Roh ngen umot-umot."