¹ "Neko' maleket umot nun Efesus nulislah: Ti'i lah sono'u Yuh do toguh ju'u bunta'ng nun tengen untouh-Yuh ngen do ponu nun oncoh ju'u kojo'u puluta emos setn: ² Oku'u pu'otn sumua kereja mu'u ngen kereja koros mu'u ngen kurajitn mu'u, mungenih mu'u de' tadn turadop do bi'a', ngen mu'u norei nya-nya do sobut odup'ou rasul, pa' sumunu'u'ou dietn bukutn lah rasul, ngen dopud dietn ngurako. ³ Mu'u oduh kurajitn ngen butahatn unto' gonon-Ku'u ngen de' konoel kunyoh. ⁴ Pa' Oku'u suniyo'u mu'u kerena mu'u moeh konteg kaseh mu'u do miradn. ⁵ Kerena setn, tuyutnlah musu opih mu'u robu'u ngen butobot sereta ngulaku enih do moeh mu'u noeh miradn. Kalou de', Oku'u akon monug ko' mu'u ngen nemi'kojo'u puluta mu'u musu antuk'ng'ou, kucuali mu'u butobot. ⁶ Pa', ti'i do mu'u oduh: Mu'u tigi'i pubuwot-pubuwot suna pungukut Nikolaus, do gi'e Ku'u tigi'i. ⁷ Yuh do oduh kepik'ng soolah kurungoh enih do nyono'u Roh ngen umot-umot. Neko' yuh do menang, Oku'u akon jugotn kumakotn musu beta'ng koyuh pumudip do oduh nun koboet Firdaus Tompo'u. ⁸ "Ngen, neko' maleket umot nun Smirna nulislah: Ti'i lah sono'u musu Do Miradn ngen Do Sunih, do moeh kobus ngen mudip agi'e: ⁹ Oku'u pu'otn kususoh ngen kusasi'u mu'u, pa' sumunu'u'ou mu'u oduh manon! Oku'u pu'otn rotuh do tuju'u ngen mu'u bodo'u dietn do sunobut odup'ou Yahudi, pa' sumunu'u'ou bukutn, dietn setn oduhlah umot Sutotn. ¹⁰ Soh toru turadop enih do akon mu'u durita. Ngurujuhlah, sutotn akon nongkod kuduh ra'ng musu mu'u ko' punjara agoe mu'u do norei, ngen mu'u akon ngalopm do sunisa kutuwoi sumung on'u. Sutialah sampei kobus, ngen Oku'u akon jugotn ngen mu'u surouk'ng turomot pumudip. ¹¹ Yuh do oduh kepik'ng soolah kurungoh enih do nyono'u Roh ngen umot-umot. Nya do menang de' akon mundurita bodo'u pungobus do kuduwuh." ¹² "Ngen, neko' maleket umot nun Pergamus nulislah" Ti'i lah sono'u Yuh do umpu'u pada'ng rojo'u bubotuh duwuh: ¹³ Oku'u pu'otn nun opih mu'u ngunu'u, nun antuk'ng takhta Sutotn ngunu'u; pa' mu'u bupoguh ngen gonon-Ku'u ngen de' nyangkoel imon-Ku'u bawa nun jamoen Antipas, sasi-Ku'u do sutia do nobus nun oncoh mu'u, antuk'ng Sutotn ngunu'u. ¹⁴ Pa', Oku'u suniyo'u mu'u kerena oduh kuduh nun oncoh mu'u do mo pungajoer Bileam, do ngajoer Balak unto' dasotn pungkokotn nun jowi ena'-ena' Israel, unto' man kumakotn do sunomoh neko' koyuh ngen noeh dusa-dusa ngagei. ¹⁵ Musetn gi'e, oduh kuduh ra'ng nun oncoh mu'u do bupoguh ngen pungajoer Nikolaus. ¹⁶ Kerena setn, butobatlah! Kalou de', Oku'u akon jagu'u monug neko' mu'u ngen punera'ng dietn nengi peda'ng musu bobo'u-Ku'u. ¹⁷ Yuh do oduh kepik'ng soolah kurungoh enih do nyono'u Roh neko' umot-umot. Neko' yuh do menang, Oku'u akon jugotn manna do nya mayan ngen Oku'u akon jugotn ngen'ou subuwoh batuh budo'u, ngen subuwoh gonon ba'uh tutulis nun batuh setn, do nya' nya pun pu'otn'ou kucuali nya do nurumo'u'ou." ¹⁸ "Ngen, neko' maleket umot nun Tiatira nulislah: Ti'i lah sono'u Ena' Tompo'u, do botuh-Ou mun nyalib opui ngen kojo'u-Ou umbuko'u mun tumogo'u wa'ng dapur: ¹⁹ Oku'u pu'otn pubuwot-pubuwot mu'u, kaseh ngen imon mu'u, pulayan mu'u ngen kusabor mu'u, ngen bawa kereja-kereja mu'u do sunih mulampou do putama. ²⁰ Pa', Oku'u suniyo'u mu'u kerena mu'u bunuyor dayuk'ng Izebel setn, do ngaku'u subagei nabi dayuk'ng, ngajoer ngen nyosot pulayan-pulayan-Ku'u agoe bugula ngen man kumakotn do moeh do sunomoh ngen koyuh. ²¹ Oku'u moeh jugotn'ou watu unto' butubot, pa' yuh go'ou butobot musu bugula'ou. ²² Ngurujuhlah, Oku'u akon nongkod yuh ko' tunuh antuk'ng buus pundurita ngen dietn do bugula ngen'ou akon Ku'u nongkod ko' wa'ng kususoh do baas, kucuali dietn do butobot musu pubuwot-pubuwot dayuk'ng setn. ²³ Ngen, Oku'u akon nobus ena'-ena'ou nengi pungobus, ngen sumua umot akon pu'otn bawa Oku'u lah do norei pumuker ngen owa'ng nya, ngen Oku'u akon jugotn neko' mu'u masik'ng-masik'ng munurut pubuwot mu'u. ²⁴ Pa', neko' mu'u do bukutn nun Tiatira, do de' nyalotn pungajoer ti'i, do bayuh pu'otn rahasia-rahasia Sutotn, Oku'u nyono'u: Oku'u de' akon dasotn purupa'ng bukutn ko' tunuh mu'u. ²⁵ Pa', bupoguhlah terous nun enih do moeh mu'u umpu'u sampei Oku'u monug. ²⁶ Ngen, neko' nya do menang ngen bubuwot kereja-kereja-Ku'u sampei aker, Oku'u akon jugotn kuasa tunuh banca-banca, ²⁷ ngen dietn akon muruntoh banca-banca setn nengi suoh besi, do ngancur lebur mun bahatn tano'u tuka'ng santek'ng, kerena Oku'u gi'e moeh nurumo'u kuasa musu Ma'u-Ku'u. ²⁸ Ngen, Oku'u akon jugotn ngen mu'u bunta'ng timur. ²⁹ Yuh do oduh kepik'ng soolah kurungoh enih do nyono'u Roh ngen umot-umot."