¹ Ti'i lah punyampei Yesus Kristus do jugotn Tompo'u ngen-Yuh unto' tuju'u neko' lutn-lutn-Ou tenta'ng hoel-hoel do jagu'u arus tujadi. Yesus Kristus jugotn punyampei ti'i luwot maleket-Yuh unto' do sunampei ngen Yohanes, jungos-Ou. ² Yohanes moeh jaji sasi sono'u Tompo'u ngen gi'e Yesus Kristus, tunuh sugala koyuh do moeh do ngurujuh'ou. ³ Do murokotlah nya do bunaca nengi yu jodn sono'u ramoel ti'i ngen do murokotlah gi'e dietn do kurungoh'ou ngen ngulaku enih do nulis nun wa'ng'ou, kerena watu'ou moeh susuk. ⁴ Musu Yohanes, neko' kuju'u umot do oduh nun Asia. Punyugotn ngen damoei bujaya unto' mu'u musu Yuh Do Oduh, Do moeh Oduh, ngen Do akon Monug; sereta musu kuju'u sumengi do oduh nun adop takhta-Yuh, ⁵ ngen musu Kristus Yesus, Sasi do sutia, do putama kali mangkit musu oncoh nya do kobus ngen Punguasa raja-raja nun bumi. Unto' Yuh, do kunaseh to'u ngen puropos to'u musu dusa-dusa to'u nengi doyo'u-Ou, ⁶ ngen moeh bodo'u to'u jaji ni'i kerajaan, imom-imom unto' Tompo'u ngen Samo'u-Yuh, unto Yuhlah kemuliaan ngen kuasa sampei kutuwoi'ou! Amin. ⁷ Ngurujuhlah, Yesus monug ngen remang-remang, ngen sutiyop botuh akon ngurujuh Yuh, bakan dietn do moeh tamo'-Yuh ngen sumua banca nun bumi akon aru kerena Yuh. Eu', ti'i akon tujadi! Amin. ⁸ "Oku'u oduhlah Alfa ngen Omega, sono'u Tompo'u, Do Oduh, Do moeh Oduh, ngen Do akon Monug, Do Mahakuasa." ⁹ Oku'u, Yohanes, purih ngen susamoh mu'u do nomi' dodeg wa'ng kususoh wa'ng kerajaan ngen wa'ng kurajitn nun wa'ng Yesus, oduh nun purou Patmos kerena sono'u Tompo'u ngen punyasi Yesus. ¹⁰ Oku'u do nguasa Roh nun On'u Tompo'u, ngen oku'u kurungoh yu do jodn musu kenang ku'u mun yu surumpit, ¹¹ do nyono'u, "Nulislah sumua do mu'u ngurujuhko' wa'ng subuwoh buku'u ngen kiripm setn neko' ju'u umot: Efesus, Smirna, Pergamus, Tiatira, Sardis, Filadelfia, dan Laodikia." ¹² Lalu, oku'u nyurok'ng unto' ngurujuh yu do ngumong ngen ku'u. Watu oku'u nyurik'ng oku'u ngurujuh ju'u kojo'u puluta emos, ¹³ ngen nun todo'u-todo'u kojo'u puluta setn, oku'u ngurujuh nya mun Ena' Musia, nengi bojuh surangkus sampei ko' kojo'u ngen sobuwoh supunga'ng emos ngulilit nun sudo-Ou. ¹⁴ Baa ngen buruh-Ou budo'u mun buruh domba, subudo'u salju ngen botuh-Ou mun nyalib opui. ¹⁵ Kojo'u-Ou mengkilot mun tumogo'u do budoyo'u wa'ng abuh ngen yu-Ou mun gumuruh pi'itn baas. ¹⁶ Nun tengen untouh-Ou, Yuh toguh ju'u bunta'ng ngen musu bobo'u-Ou ruwoh subuwoh peda'ng do rojo'u bubotuh duwuh, ngen jowi-Ou umbuko'u mun botuh on'u do terik. ¹⁷ Watu oku'u ngurujuh Yuh, oku'u robu'u nun kojo'u-Ou mun nya do kobus. Pa', Yuh dasotn tengen untouh-Ou ko' tunuh ku'u ngen nyono'u, "Soh toru, Oku'u lah Do Tayu'u ngen Do Sunih, ¹⁸ ngen Do Mudip. Oku'u moeh kobus, pa' ngurujuhlah Oku'u mudip sampei kutuwoi'ou, ngen Oku'u toguh kunci kobus ngen kunci Hades. ¹⁹ Kerena setn, nulislah hoel-hoel do moeh mu'u ngurujuh, ngen hoel-hoel do tujadi titi'u ngen hoel-hoel do akon tujadi ko' jowi'ou. ²⁰ Ti'i lah rahasia tenta'ng ju'u binta'ng do mu'u ngurujuh nun tengen untouh Ku'u ngen ju'u kojo'u puluta emos setn. Ju'u binta'ng setn oduhlah suna maleket musu ju'u umot ngen ju'u kojo'u puluta setn oduhlah ju'u umot."