¹ Salopm musu Paulus, Silwanus, ngen Timotius, unto' umot nun Tesalonika, nun wa'ng Tompo'u Samo'u to'u ngen Tompo'u Yesus Kristus. ² Punyugotn ngen damoei bujaya unto' to'u nun Tompo'u Samo'u to'u ngen Tompo'u Yesus Kristus. ³ Omi'u arus sulalu busukur unto' mu'u, Purih-purih, ngen mumang musetnlah suarus'ou. Sobob, imon mu'u mudip ngen bulimpoh ngen kaseh do oduh ngen mu'u masik'ng-masik'ng turadop susamoh mu'u sumakin baas. ⁴ Kerena setn, odup mu'u ngumong ngen magoh mengenei mu'u nun jowi umot-umot Tompo'u kerena kusabor ngen imon mu'u nun todo'u sumua punyisa ngen durita do mu'u kunyom. ⁵ Ti'i rugu'u pungadel do adel musu Tompo'u, bawa mu'u do angop pantos nun Kerajaan Tompo'u kerena mu'u gi'e moeh mundurita. ⁶ Agi'e pula'u, adel musu Tompo'u unto' bunaros ngen punindos ngen dietn do bodo' mu'u mundurita, ⁷ pa' jugotn kupuwos ngen mu'u do tunindos, ngen ko' omi'u, watu Tompo'u Yesus Kristus do payatn musu suruga busamoh suna maleket-Ou do kuwot, ⁸ nun opui do nyalib, unto' bunaros dietn do de' konoel Tompo'u ngen de' tuno' ngen Injil Yesus Tompo'u to'u. ⁹ Dietn acopm kunyom kupm pungancu do kokoel, jo'u musu Tompo'u ngen musu do pudatuh kuasa-Yuh ¹⁰ watu Yuh menug unto' do pudatuh nun oncoh nya-nya cuci-Ou ngen unto' do kunagum nun oncoh sumua nya do mus pucayo'u, sobob punyasi omi'u ko' mu'u do pucayo'u. ¹¹ Kerena setn, omi'u sulalu budua unto' mu'u, sukira'ou Tompo'u to'u nangop mu'u pantoes akon pungabo'u mu'u ngen tunumos sutiyop kumau'u unto' bubuwot paguh ngen kereja imon ngen kuasa-Yuh, ¹² agoe gonon Tompo'u Yesus to'u do pudatuh nun wa'ng mu'u, ngen mu'u nun wa'ng Yuh, susuai ngen punyugotn Tompo'u to'u ngen Tompo'u Yesus Kristus.