¹ Musu Paulus, do jaji rasul Yesus Kristus kerena puruntoh Tompo'u, punyelamoet to'u, ngen Yesus Kristus, pungarop to'u. ² Unto' Timotius, ena' do sah wa'ng imon, Punyugotn, kaseh kusiyotn, ngen damoei bujaya musu Tompo'u Samo'u to'u ngen Yesus Kristus, Tuhan to'u. ³ Mungenih oku'u nyungko'u ngen mu'u watu oku'u burangkot ko' Makedonia, totoplah ngunu'u nun Efesus agoe mu'u dopud suniyo'u kuduh ra'ng agoe dietn de' ngajoer pungajoer-pungajoer bukutn, ⁴ atou sumua purati dient nun tanun-tanun ngen datar abih remin do de' potud-potud. Setn justru nimul busuka'ng, bukutn nyaloetn tugos ngulayan Tompo'u do ngureja imon. ⁵ Pa', aruk'ng musu puruntoh setn oduhlah kaseh do burasoel musu toi do buroseh, owa'ng do paguh sereta imon do bujog. ⁶ Kuduh ra'ng moeh nyumpa'ng musu niyot ti'i ngen osot wa'ng sono'u do podo'u-podo'u. ⁷ Dietn ro'u jaji nya do mae kupm Taurat, pa' de' punaham enih do dietn nyono'u atou hoel-hoel do dietn pucayo'u. ⁸ Pa', to'u pu'otn kupm Taurat setn paguh kalou nya gununa'ou mungenih sumunu'ou, ⁹ ngen kusadoer bawa Kupm Taurat de' do noeh unto' nya munu'u, subukutn unto' pulagoer kupm ngen nya do buruntak, nya fasik ngen nya budusa, nya do de' cuci ngen duniawi, dietn do nobus samo'u ngen sunu'u odup'ou, pungobus, ¹⁰ purunte do ngulaku dusa bugula, susamoh jenis koyuh, tunoku, temi, pumula'u, sasi pulosu, ngen esih ja do ngurawotn pungajoer do paguh, ¹¹ Yuhlah pungajoer Injil do mulia musu Tompo'u asoel Burokot, do moeh do pucayo'u neko' ku'u. ¹² Oku'u busukur neko' Yuh do moeh kunuwot oku'u, yuhlah Yesus Kristus, Tompo'u to'u, kerena Yuh nang oku'u sutia ngen dasotn oku'u wa'ng pulayan ti'i. ¹³ Waloupun nyemin nyeh oku'u sura'ng pungki'a', punyaya, ngen nya do kojopm, pa' oku'u turumo'u kaseh kumasi'u kerena nyemin nyeh oku'u ngulaku'ou nya' ngureti ngen wang kude'pucayo'u. ¹⁴ Tompo'u jugotn neko' ku'u pumugotn do mulumpah, busamoh-samoh ngen imon ngen kaseh wa'ng Yesus Kristus. ¹⁵ Sono'u ti'i dopud do pucayo'u ngen laya' do turumo'u sururuh'ou bawa Yesus Kristus monug ko' dunia unto' nyulamoet nya-nya budusa; nun oncoh dietn, oku'u lah do gurumuh budusa. ¹⁶ Unto' aloes ti'i lah, oku'u dopud kaseh kusiyotn, yuhlah agoe nun wa'ng oku'u, nya do gurumuh budusa ti'i, Yesus Kristus tuju'u kusaboer-Ou do sumpuruna subagei cuntoe unto' dietn do akon pucayo'u neko'-Yuh unto' dopud mudip do kokoel. ¹⁷ Unto' Raja tunuh sugala jamon, do kokoel, ngen do de' mayan, ni'i-ni'ou Tompo'u, hormot ngen kemuliaan sampei kutuwoi-tuwoi'ou. Amin. ¹⁸ Puruntoh ti'i ku'u jugotn neko' mu'u, Timotius, ena' ku'u, susuai ngen ramoel do perenah do jugotn tenta'ng mu'u, ngen ramoel setn bujuwa'ng wang pujuwa'ng do paguh, ¹⁹ samb'el bupeguh nun imon ngen owa'ng toi do paguh. Kuduh ra'ng moeh nula' ngulaku'ou sampei kuubm imon dient. ²⁰ Nun oncoh'ou oduhlah Himeneus ngen Aleksander, do moeh ku'u sunoroh neko' Sutodn agoe dietn bulajoer unto' de ngki'a'.