¹ Putama-tama, oku'u ngurajoer mu'u unto' sunampei punyungko'u, du'a, du'a syafaat ngen ucop sukur unto' nya kopa, ² unto' raja-raja, ngen sumua nya do nguru'u nun pumuruntoh agoe to'u dopud nyalotn mudip do mun ngen damoei wang sugala kurajitn ngen hormot. ³ Hoel ti'i paguh ngen do turumo'u nun adop Tompo'u, Punyulamoet to'u, ⁴ do ro'u sumua nya do sulamoet ngen sampei neko' pumpu'otn akon kumunu'u. ⁵ Sobob, anya oduh ni'i Tompo'u ngen ni'i pungontud oncoh Tompo'u ngen musia, yuhlah musia Yesus Kristus, ⁶ do moeh jugotn odup-Ou wadadup subagei pumayoer unto' sumua nya. Punyasi ti'i do payatn nun watu do tunotop-Yuh. ⁷ Unto' setnlah, oku'u do tonotop subagei pungkotbah ngen rasul ako'u nyono'u munu'u, oku'u de' ngurakoer ngen subagei guru wa'ng imon ngen kumunu'u unto' banca-banca bukutn. ⁸ Kerena setn, oku ro'u dari nun sugala antuk'ng budu'a sam'el dokot tegen'ou do cuci nya' punoruh ngen budoruh. ⁹ Mungsetn gi'e, oku'u ro'u budayuk'ng bupakei do laya', tumos kutabi'u ngen punahan odup. Sukop'ou bukutnlah buruh do sunumpei, emos, mutiara, atou bukokos maha, ¹⁰ subukutn pubuwot-pubuwot paguh mungonih sumunu'ou budayuk'ng do oduh kualepm. ¹¹ Seura'ng budayuk'ng aruslah bulajoer wa'ng kutenang ngen wa'ng sugala kupatuh. ¹² Pa', oku'u de' ngijetn budayuk'ng ngurajoer atou ngurutoh dari. Pa' budayuk'ng arus totop tenang. ¹³ Kerena Adam do noeh putama, ba'uh mus setn Awa, ngen bukutn Adam do tunipu, ¹⁴ subukutn budayuk'ng do tunipu ngen robu'u wang purangor. ¹⁵ Pa', budayuk'ng akon do nyulamoet ngulalu pumayan ena' kalou dietn toroes mudip wa'ng imon, kaseh, ngen kucuci ngan punahan odup.