¹ Ja̧wa̧nü̧ ja̧á̧nä̧ Tito, ucumä wo̧juȩti̧ ttü̧ja̧rü̧mä̧ adiwä juäi wȩnȩtä̧: ² tä̧mu̧ buäcuächäturumä wo̧juȩti̧ 'cuäopünä̧tä̧ adiu amücuädünü ttü̧ja̧, úcuo ju̧nä̧ ttu̧ȩpä̧rü̧nü̧ ttü̧ja̧, tta̧'cua̧ wȩnä̧rü̧ ttü̧ja̧ eseünü, wȩnȩ 'cuäopü mo̧ro̧ ttami 'quiächiunu ttü̧ja̧. ³ Ja̧wa̧ta̧nü̧ nä̧tü̧ tä̧mu̧ru̧ buäcuächäturuinä, wo̧juȩtü̧ jiäwi úcuotäcuäwänä ttü̧ja̧, suroju wȩnȩ korotu ttutu'cu ttucuocu juiyünä, vino isoya abo cuaounä ttawü juiyünä, adiwä juäi wo̧jȩcuä̧ isaju ju̧nä̧. ⁴ Nä̧tü̧ muäyotürümä ttu̧wo̧juȩta̧ päü ja̧á̧ ttirecuoruinä, tti̧tti̧mü̧rü̧i̧nä̧ eseü repeäcuäwänä ttü̧ja̧ päü, ⁵ ttu̧wo̧juȩta̧ päü ja̧á̧ adiu amücuädü jȩtta̧ päü, suroju juiyünä adiwä juäi úcuotu ttu̧jü̧nä̧, kojusode tta̧wa̧rä̧cuä̧wä̧ isaju ju̧nä̧, adiu fäädäcuäwä jȩjü̧nä̧, kirecuoruínä úcuotu ku̧jü̧nä̧, Dios i̧wȩnȩ toija̧á̧cu̧ ttucuocu juiyäcuaánü. ⁶ Ja̧wa̧ta̧nü̧, müäyoturumä jiäünü wo̧juȩti̧ wo̧juȩcu̧nä̧ ttamücuäda. ⁷ Ucutä o'cajuiyunä̧tä̧ i̧jȩcui̧ adiwä jueitä jȩpü̧, wo̧juȩcuä̧nä̧ yapare jiäwocunä úcuo ju̧nä̧. ⁸ ttü̧ja̧rü̧mä̧ adiwä juäitä wo̧juȩti̧ ya̧tȩi̧nä̧ koro wȩnȩtä̧ru̧ ucuocu juiyünä, dä̧bu̧ päü ttu̧ȩpä̧rä̧tü̧i̧nä̧ ttu̧jo̧cua̧á̧ttü̧ päü, korotumä suroju ttamücuädu juiyünä̧tä̧ jä̧cua̧á̧nu̧ ujuturu to̧pä̧ru̧ ttucuocu juiyünä. ⁹ Ja̧wa̧ta̧nü̧ weäwotü ju̧nä̧ ka̧cuä̧tü̧rü̧mä̧, wo̧juȩtä̧tu̧cui̧ tturuwotu wettümä jȩtta̧. Jiäwitü tturuwotu ttesewomenä ttü̧ja̧cua̧, karaácu pättä'chu juiyünä, ¹⁰ tturuwotu ttiäremä ji̧'qui̧cha̧nü̧i̧nä̧ ttü̧nä̧u̧cu̧ juiyünä, jua̧á̧nu̧ ja̧á̧ttu̧ jituruinä adiwomenä ju̧nä̧ pi̧yȩtä̧ jȩpä̧tu̧cui̧ korotu ttü̧ja̧rü̧ wo̧juȩcuä̧ ju̧nä̧ tu̧ru̧wa̧ Dios jäwänä jua̧á̧nu̧ jȩcuä̧tu̧cua̧á̧ topü ttu̧rä̧bȩwä̧cua̧á̧nü̧, Dios ujuturu fäädinu̧ru̧, ¹¹ O'catoiünä Diosrü esetinä̧tü̧mä̧ adiwomenä̧tä̧ ka̧cuä̧tu̧cui̧ Diosmä mifoünä fä̧ä̧dä̧cua̧ ya̧tȩi̧nä̧ ȩmo̧cu̧ jäwä i̧yä̧cua̧. ¹² Dios mifoünä fäädomenä̧mä̧, Ja̧u̧tä̧ u̧wo̧juȩtä̧cua̧ suroju jȩtu̧ cätädächa päümä jua̧á̧ta̧nu̧ ttü̧ja̧ surojunä jȩä̧cuä̧wä̧ ttu̧ju̧nä̧rü̧mä̧ ka̧á̧ Diosrü esetocotunä. Diostä u̧wo̧juȩtä̧cua̧u̧ adiwomenä jȩpü̧ ttü̧ja̧ päü. ¹³ Ja̧u̧tä̧ mo̧ro̧, Diosmä u̧wo̧juȩtä̧u̧jä̧ tta̧ä̧ru̧ ki̧ä̧cuä̧wä̧ ja̧ü̧tä̧ jueunä̧mä̧ jȩä̧cua̧ tä'canä jäwämä ujutu rü̧ȩnä̧ teseunä jȩä̧cua̧ pi̧yȩ ja̧á̧ fa̧wä̧chä̧cua̧ ji̧yȩtȩcu̧ rü̧ä̧nä̧ tȩa̧u̧cu̧ ji̧yȩtȩ Jesús Mesías jäwäcü, ujuturu re ki̧nü̧ Dios ju̧ru̧wa̧. ¹⁴ Ja̧ü̧mä̧ jä̧ttä̧pä̧ya̧ iyäwinu ujutu timicuänä, ja̧wa̧ta̧á̧nü̧ ja̧u̧tä̧ surojunä jȩä̧cuä̧wä̧ttu̧ ubarattü päü o'cajuiyünä tidepä weaácü tu̧ji̧nu̧ tucu icuatü päü. ¹⁵ Tito, ucuocui pi̧yȩ wȩnȩtu̧ i̧wȩnȩ päaácu esetäturu ttü̧ja̧cua̧ päü chi̧wȩti̧na̧á̧cu̧ jäyä päiomenä ji̧ä̧wä̧ri̧ru̧ jȩa̧ päocomenä jȩpü̧ kä̧nü̧ pa̧á̧nü̧ jȩo̧mȩbu jȩa̧á̧nu̧ jomebumä. ttü̧ȩpä̧ru̧ topi ya̧cu̧nä̧ ttu̧ȩpä̧ru̧nu̧ ttu̧ja̧cua̧ päü päütaánü.