¹ Ttü, Pablo, cuyäru isojä wȩyu̧tu̧ wedäcujä, Tito. Dios u̧mu̧wä̧ya̧ Jesucristoinä pojopu weinä̧cu̧. Diosma chu̧wo̧juȩta̧ päü weinä̧cu̧sä̧, chutä pojopu eminä̧u̧ru̧ churutä tta̧'cua̧ wȩnä̧rü̧ ttü̧ji̧ya̧ru̧ päü. ² Juätürümä jo̧mȩnü̧ tta̧'cua̧ ttu̧wȩna̧ro̧mȩna̧ma̧ Diosmä yaparewocü ja̧á̧ttü̧ pi̧jä̧ aditäcuaá ä'canä̧tä̧ i̧wȩnȩ iyinü 'cuäopünä tu̧ja̧cui̧ya̧ru̧ päü. ³ Ja̧u̧nu̧ o'caá amücuädü ü̧jü̧ni̧nü̧ pätecuächü mo̧ro̧ i̧jȩpi̧nü̧ i̧wȩnȩ jidäwa päü iyinümä. Pi̧yȩma̧ jiäwusä Dios, ujuturu fäädinü, weina̧á̧ttü̧. ⁴ Tito, ucuru wȩyu̧tu̧ weüsä, jitämä Jesucristorü ya̧tȩru̧tä̧ ta̧'cua̧ tu̧wȩnä̧ro̧mȩnä̧ chi̧tti̧ ju̧nä̧tä̧ juocuächina̧á̧ttü̧. Jäo Dios-inä i̧tti̧ Jesucristoinä surojuttü tu̧ji̧pü̧nä̧ fäädinümä yabocutä re ru̧jü̧nä̧ topü eseü u̧nu̧chä̧rü̧ cu̧ju̧nä̧ fäädäcu. ⁵ Cresta kä'co i̧sä̧sa̧nä̧mä̧ pa̧á̧nü̧ päü chu̧ju̧ni̧í̧nä̧cü̧jä̧: jo̧mȩnü̧ päiocü ji̧nü̧ cäcuäda päü ja̧wa̧ta̧nü̧ ütawiyättü Dios esetinä̧tü̧rü̧ ottipäcuoturu pojopu cuta päü, ucuru wedinü ta̧á̧nü̧. ⁶ Pide ttü̧ja̧ ttu̧ru̧wa̧ ju̧nä̧ pätecuächinä̧cu̧mä̧ suroju wȩnȩ juiyunä̧tä̧ kü̧ ja̧á̧. Irecuamä yajuterutä kü̧, i̧tti̧mü̧rü̧mä̧ Diosrü tta̧'cua̧ wȩnä̧rä̧tu̧ru̧ ku̧nä̧rü̧ ja̧wa̧ta̧nü̧ ttucuotocaá jiturutä pä̧wä̧ru̧ja̧á̧cu̧ ttu̧ja̧á̧ ttu̧cuo̧co̧co̧u̧ru̧. ⁷ Ä̧tȩcuä̧nä̧tä̧ ttü̧ja̧ ttu̧ru̧wa̧ ju̧nä̧ oipümä suroju wȩnȩ juiyunä tta̧á̧rä̧cuä̧u̧ kü̧, Dios aditäwä tta̧á̧rü̧mä̧ u̧wo̧ju̧ a̧mü̧nä̧ úcuo teäcuäwocu, ju̧ru̧nä̧ ra̧wa̧ri̧o̧cu̧, tä̧mä̧cuä̧wä̧mä̧ ku'cocu, korotu ttiäremä pä̧wä̧ru̧ju̧mä̧ topocu, ja̧wa̧ta̧nü̧ korotucu pää'chäcuäu u̧ja̧ päüinä ku'cocu. ⁸ Pärocuaácu, karaáttü ichäturumä ojusodenä äepü, eseu kä̧cuä̧wä̧tä̧ ku̧nä̧rü̧. 'Cuäopünä̧tä̧ ttu̧ȩpä̧rä̧cuä̧u̧tä̧ kü̧, koroturu adiu jueunä̧tä̧ tta̧ä̧rü̧. 'Cuäopünä suroju juiyunä kü̧, a̧'cua̧pu̧nu̧ tta̧ä̧rä̧cuä̧u̧ta̧ kü̧. ⁹ Ja̧wa̧ta̧nü̧ Dios i̧wȩnȩ 'quiyünä 'chuädu ä̧ju̧cu̧, i̧wȩnȩ päaácu yobocu ro̧ȩpä̧rä̧cuä̧ü̧nü̧ jueunä, toicu ucuocuäturu esetu tticua päü. ¹⁰ Recuätü jarodiätü ka̧cuä̧tü̧, ja̧á̧tä̧ yapare wȩnȩtä̧ jiäwätü jitutä jittäütä ttesetiyatü päü, juätümä Jesucritorü esetätürümä circusion jȩtti̧ya̧tu̧ päätü, ¹¹ Ucuínä ja̧wa̧ta̧nü̧ ttü̧ja̧ tturuwotü päiünä cu̧ju̧nä̧ü̧i̧nä̧ pa̧á̧nü̧ wotu Diosrü esetätürü ttu̧wo̧juȩta̧á̧nä̧mä̧ ja̧á̧tä̧ to'cuätucuä. Juätümä o'catoiünä isode jinä yodetenä ka̧cuä̧tu̧ru̧ i̧wȩnȩ päocaácu ttesetunä jȩpä̧tu̧. Jinäisomä pärätä ttiyatü päütä ¹² Ya̧tȩ Cresta ttü̧ja̧sa̧, jitutä profeta ju̧nä̧ tottäicumä, päinü: ¡Cresta kä'co i̧sä̧sa̧ ttü̧ja̧mä̧ yaparetä ucuocuätü! ¡Dea i̧sa̧ pä̧i̧cua̧ jä̧i̧nü̧a̧nü̧ wotü! ütäwätü ttaánä ttu̧cuä̧tä̧ rü̧ȩnä̧ cuätü. ¹³ Pi̧yȩ päinümä jueutä ja̧á̧. Pa̧á̧nü̧ pä̧i̧cu̧nä̧ jiäunä̧nü̧ ro̧ȩpi̧tü̧, jueunä jueécuächü esetu koroturu Dios utu'cu ttu̧wo̧juȩtä̧cua̧á̧nü̧. ¹⁴ Juätümä judio ttü̧ja̧ täbo weäwänä ttu̧ji̧nü̧nä̧mä̧ cäädiächu ttü̧ja̧ päü ja̧á̧ ja̧wa̧ta̧nü̧ ttü̧ja̧ weäwä wȩnȩ amücuädü ttu̧ji̧nü̧nä̧mä̧ ttu̧ji̧yu̧a̧nü̧ ja̧á̧ ja̧ü̧mä̧ Dios weocü ji̧nü̧, pitümä úcuotu ttu̧jä̧i̧yu̧mä̧ cäädiächinä̧tü̧ isopäiünä weäwä wȩnȩnä̧mä̧. ¹⁵ O'cajuiyü ttü̧ja̧ suroju amücuädäwä juiätürümä adiwä juäitä jä̧u̧. Ja̧wa̧nü̧ ja̧á̧nä̧ ttü̧ja̧ surojunä amücuädäcuäwä ku̧nä̧rä̧tü̧mä̧ adiwocaá Jesucristorüinä ttesetocaámä, o'cajuiyünä ttamücuädümä suroju juottächina̧á̧tä̧ ja̧á̧. Surojunä jȩtta̧á̧nä̧ surojunä jȩpä̧tü̧jä̧ pättümä juiyünä jä̧ü̧. ¹⁶ Diosrümä wo̧juä̧tü̧jä̧ pättaánä, jerupätü 'cua̧ru̧nä̧ toija̧á̧cu̧tä̧ jȩpä̧tü̧. Dios weümä jo̧mȩnü̧ pätia päümä jȩpo̧co̧tü̧ rü̧ȩnä̧ surojunä amücuädäcuäwätä jȩpä̧tü̧.