¹ Èyí ni Ìbẹ̀rẹ̀ ìhìnrere ti Jésù Kristì, Ọmọ Ọlọ́run. ² Gẹ́gẹ́ bí a ti kọ ọ́ nínú ìwé wòlíì Isaiah pé: “Wò ó, Èmi ń ran oníṣẹ́ mi síwájú rẹ, Ẹni tí yóò tún ọ̀nà rẹ ṣe.” ³ “Ohùn ẹni tí ń kígbe ní ijù, ‘Ẹ tún ọ̀nà Olúwa ṣe, ẹ ṣe ojú ọ̀nà rẹ̀ kí ó tọ́.’ ⁴ Johanu dé, ẹni tí ó ń tẹnibọmi ní aginjù, tí ó sì ń wàásù ìtẹ̀bọmi ìrònúpìwàdà fún ìdáríjì ẹ̀ṣẹ̀. ⁵ Gbogbo ilẹ̀ Judea àti gbogbo ènìyàn Jerusalẹmu jáde tọ̀ ọ́ lọ, a sì ti ọwọ́ rẹ̀ tẹ gbogbo wọn bọ omi ni odò Jordani, wọ́n sì ń jẹ́wọ́ ẹ̀ṣẹ̀ wọn. ⁶ Johanu sì wọ aṣọ irun ìbákasẹ ó sì di àmùrè awọ mọ́ ẹ̀gbẹ́ rẹ̀, ó sì ń jẹ eṣú àti oyin ìgàn. ⁷ Ó wàásù wí pé, “Ẹnìkan ń bò tí ó lágbára jù mí lọ, èmi kò tọ́ ní ẹni tí ń wólẹ̀ láti tú okùn bàtà rẹ̀. ⁸ Èmi ń fi omi ṣe ìtẹ̀bọmi yín, ṣùgbọ́n Òun yóò fi Ẹ̀mí Mímọ́ ṣe ìtẹ̀bọmi yín.” ⁹ Ó sì ṣe ní ọjọ́ wọn nì tí Jesu ti Nasareti ti Galili wá, a sì ti ọwọ́ Johanu ṣe ìtẹ̀bọmi fún ní odò Jordani. ¹⁰ Bí Jésù se ti inú omi jáde wá, ó rí ọ̀run tí ó ṣí sílẹ̀, Ẹ̀mí Mímọ́ bí àdàbà sọ̀kalẹ̀ lé e lórí. ¹¹ Ohùn kan sì ti ọ̀run wá wí pé, “Ìwọ ni àyànfẹ́ Ọmọ mi. Inú mi dùn sí o gidigidi.” ¹² Ẹ̀mí Mímọ́ náà sì darí Rẹ̀ sí inù aginjù. ¹³ Ó sì wà ní aginjù fún ogójì ọjọ́, ti Satani ń dán an wò. Ó sì wà pẹ̀lú àwọn ẹranko ìgbẹ́, àwọn angẹli sì ń ṣe ìránṣẹ́ fún un. ¹⁴ Nísinsìyí lẹ́yìn ìgbà tí a mú Johanu sínú ẹ̀wọ̀n, Jesu wá sí Galili, ó ń wàásù ìhìnrere ti Ọlọ́run. ¹⁵ Ó ń wí pé, “Àkókò náà dé wàyí, ìjọba Ọlọ́run kù sí dẹ̀dẹ̀. Ẹ yípadà kí ẹ sì gba ìhìnrere yìí gbọ́.” ¹⁶ Nígbà ti ó ń rìn létí Òkun Galili, Ó rí Simoni àti Áńdérù arákùnrin rẹ̀, wọ́n ń fi awọ̀n wọn pẹja, torí pé apẹja ni wọ́n. ¹⁷ Jesu sì wí fún wọn pé, “Ẹ wa, ẹ tẹ̀lé mi, Èmi yóò sì sọ yín di apẹja ènìyàn.” ¹⁸ Ní kánkán wọ́n fi àwọ̀n wọn sílẹ̀, wọ́n sì tẹ̀lé e. ¹⁹ Bí Jésù sì ti rìn síwájú díẹ̀, Ó rí Jakọbu ọmọ Sébédè àti Jòhánù arákùnrin rẹ̀, wọ́n wa nínú ọkọ̀ wọ́n ń tún àwọ̀n wọn ṣe. ²⁰ Ó ké wọn, wọ́n sì fi Sébédè baba wọn sílẹ̀ nínú ọkọ̀ pẹ̀lú àwọn alágbàṣe, wọ́n sì tọ̀ ọ́ lẹ́yìn. ²¹ Lẹ́yìn náà wọ́n wọ Kápérnáúmù, nígbà tí ó di ọjọ́ ìsinmi, Jésù lọ sínú Sínágọ́gù ó sì ń kọ́ni. ²² Ẹnu sì yà wọ́n nítorí ìkọ́ni rẹ̀, nítorí pé ó ń kọ́ni bí ẹni tí ó ní àṣẹ, kì í ṣe bí àwọn olùkọ́ òfin. ²³ Nígbànáà ọkùnrin kan tí ó wà nínú Sínágọ́gù wọn, tí ó ní ẹ̀mí àìmọ́ bẹ̀rẹ̀ sí í kígbe, ²⁴ wí pé, “Kí ni àwa ní se pèlu rẹ, Jésù ti Násárẹ́tì? Ṣé ìwọ wá láti pa wá run ni? Èmí mọ ẹni tí ìwọ í ṣe; Ìwọ ní ẹni Mímọ́ Ọlọ́run!” ²⁵ Jesu si bá èmí èsù náà wí, ó wí pé, “Pa ẹnu rẹ mọ́, kí ó sì jáde kúrò lára rẹ̀!.” ²⁶ Ẹ̀mí àìmọ́ náà sì gbé e sánlè, ó sì jáde kúrò lára ọkùnrin náà bí ó ti ń ké ní ohùn rara. ²⁷ Ẹnu sì ya àwọn ènìyàn, tó bẹ́ẹ̀ tí wọ́n fi ń bi ara wọn pé, "Irú kíni èyí? Ẹ̀kọ́ tuntun pẹ̀lú àsẹ? Ó tún pàṣẹ fún àwọn ẹ̀mí àìmọ́ wọ́n sì gbọ́ tirẹ̀!” ²⁸ Ìròyìn nípa rẹ̀ tàn ká gbogbo agbègbè Galili. ²⁹ Nígbà tí wọn sì jáde kúrò nínú Sínágọ́gù, wọ́n lọ sí inú ilé Símónì àti Áńdérù pẹ̀lú Jákọ́bù àti Jòhánù . ³⁰ Ìyá- ìyàwó Simoni tí ó dùbúlẹ̀ àìsàn ibà, wọ́n sì sọ fún Jésù nípa rẹ̀. ³¹ Ó sì wá, ó fà á lọ́wọ́, ó sì gbé e dìde; ibà náà si fi sílẹ̀, ó sì ń ṣe ìránṣẹ́ fún wọn. ³² Ní àṣálẹ́, tí oòrùn ti wọ̀, wọ́n gbé gbogbo àwọn aláìsàn àti àwọn tó ni ẹ̀mí àìmọ́ tọ̀ ọ́ wá. ³³ Gbogbo ìlú si péjọ ni ẹnu-ọ̀nà. ³⁴ Ó sì wo ọ̀pọ̀ tí ó ní onírúurú ààrùn sàn, ó sì tún lé ọ̀pọ̀ ẹ̀mí àìmọ́ jáde, ṣùgbọ́n kò jẹ́ kí àwọn ẹ̀mí àìmọ́ náà sọ̀rọ̀ nítorí tí wọ́n mọ̀ ọ́. ³⁵ Ó sì dìde ní kùtùkùtù òwúrọ̀, kí ilẹ̀ tó mọ́, Ó kúrò ó sì lọ sí ibi tí ó dákẹ̀ láti lọ gbàdúrà. ³⁶ Símónì àti àwọn tí ó wà pẹ́lu rẹ̀ lọ láti wá a. ³⁷ Wọ́n rí I wọ́n sì wí fún pé, “Gbogbo ènìyàn ń wá ọ!” ³⁸ Ó wí pé, “Ẹ jẹ́ kí a lọ sí àwọn ibò mìíràn, sí àwọn ìlú tí ó wà ní agbègbè, kí ń lè wàásù níbẹ̀ pẹ̀lú. Nítorí èyí ni mo ṣe wá.” ³⁹ Ó ń lọ káàkiri gbogbo agbègbè Galili, ó ń wàásù nínú Sinagọgu Ó sì ń lé àwọn ẹ̀mí àìmọ́ jáde. ⁴⁰ Ọkùnrin adẹ́tẹ̀ kan tọ̀ ọ́ wá. Ó sì ń bẹ̀ẹ́; ó kúnlẹ̀ níwájú rẹ̀ ó wí fún n pé, “Bí ìwọ bá fẹ́, ìwọ lè sọ mí di mímọ́.” ⁴¹ Àánú sì se é, Jésù na ọwọ́ rẹ̀ ó sì fi ọwọ́ rẹ̀ bà a, ó wí pé, “Èmí fẹ́. Di mímọ́.” ⁴² Lójúkan náà ẹ̀tẹ̀ náà fi sílẹ̀ lọ, ó sì di mímọ́. ⁴³ Jésù sì kìlọ̀ fún un gidigidi ó sì rán an lọ. ⁴⁴ Ó wí fún n pé, “Rí i dájú pé o kò sọ ohunkóhun fún ẹnikẹ́ni, ṣùgbọ́n lọ fi ara rẹ̀ hàn àlùfáà, kí o sì mú ẹ̀bùn lọ́ fún ìwẹ̀nùmọ́ rẹ èyí tí Mósè pàṣẹ, èyí tí í ṣe ẹ̀rí fún wọn.” ⁴⁵ Ṣùgbọ́n ó jáde lọ, ó bẹ̀rẹ̀ sí í pòkìkí, ó ń tan ìròyìn kálẹ̀ tóbẹ́ẹ̀ gẹ́ tí Jésù kò sì le wọ ìlú kankan mọ́. Ó sì dúró ní ibi ìdákẹ́jẹ́, àwọn ènìyàn tọ̀ ọ́ wá láti ibi gbogbo.