¹ Nítorí èmí fẹ́ kí ẹ̀yin mọ ìjàkadì tí mo ní fún yín, fún àwọn tó wà ní Laodíkìa, àti fún ọ̀pọ̀lọpọ̀ tí wọn kò tíì rí mi lójúkojú. ² Mo tiraka kí á ba lè mú wọn lọ́kàn le nípa mímú wọn parapọ̀ nínú ìfẹ́ àti sínú gbogbo ọrọ̀ ẹ̀kúnrẹ́rẹ́ òye Rẹ̀ tó dájú, sínú ìmọ̀ àṣírí ìjìnlẹ̀ Ọlọ́run, àní Krístì. ³ Nínú ẹnití a fi gbobgo ìsúra ọgbọn àti ìmọ̀ pamọ́ sí. ⁴ Mo sọ èyí kí ẹnikẹ́ni má baà fi ọ̀rọ̀ dídùn tàn yín jẹ. ⁵ Bótilẹ̀jẹ́'pé èmi ko sí pẹ̀lú yín lójúkojú, síbẹ̀, mo wa pẹ̀lú yín nínú ẹ̀mí. Mo yọ̀ láti mọ ètò dáradára yín àti ìdúróṣinṣin yín nínú Krístì. ⁶ Gẹ́gẹ́ bí ẹ ti gba Krístì ní Olúwa, ẹ rìn nínú Rẹ̀. ⁷ Ẹ fi gbòngbo múlẹ̀ nínú Rẹ̀, kí á gbé yín ró lóríí Rẹ̀, kí ẹ fi ẹsẹ̀ múlẹ̀ nínú ìgbàgbọ́ gẹ́gẹ́ bí a ti kọ́ yín, ki ẹ sì pọ̀ si nínú ìdúpẹ́. ⁸ Ẹ f'iyèsi kí ẹnikẹ́ni má fi ọ̀rọ̀ àròsọ àti ọ̀rọ̀ ẹ̀tàn tó dá lórí àṣà ènìyàn mú yín ní ìgbèkùn, eléyìí tí ó ní ìdàpọ̀ àwọn ẹ̀mí ìpìlẹ̀ ayé yìí ṣùgbọ́n tí kò bá ìlàna Krístì mu. ⁹ Nítorí nínú Rẹ̀ ni ẹ̀kúnrẹ́rẹ́ Ọlọ́run ń gbé nínú ara. ¹⁰ A sì ti sọ yín di kíkún nínú Rẹ̀, ẹnití ó jẹ̀ orí lórí gbogbo ipá àti agbára. ¹¹ Nínú Rẹ̀ ni a sì kọ ẹ̀yin náà n'ílà pẹ̀lú, ìkọlà tí a kò ti ọwọ́ ènìyàn ṣe níti mímú ẹran ara kúrò, ṣùgbọ́n gẹ́gẹ́ bí ìkọlà Krístì. ¹² A ti sin yín pẹ̀lú Rẹ̀ nínú ìrìbọmi, àti nínú Rẹ̀ ni a jí yín dìde nípa ìgbàgbọ́ nínú agbára Ọlọ́run, enití ó jí Krístì dìde nínú òkú. ¹³ Nígbàtí ẹ̀yín jẹ́ òkú nínú àwon ẹ̀ṣẹ yín àti nínú àìkọlà ẹran ara yín, Ó sọ yín di ààyé pẹ̀lú Rẹ̀ bẹ́ẹ̀ni ó dárí àwọn ẹ̀ṣẹ yín jìnyín. ¹⁴ Ó fagilé àkọsílẹ̀ gbogbo gbèsè ẹ̀ṣẹ̀ tí ó dúró lòdì sí wa pẹ̀lú àwọn ìlàna rẹ̀. Ó mú kúrò nípa kíkà-án mọ́ àgbélèbú. ¹⁵ Ó gba ipá lọ́wọ́ àwọn agbára àti aláṣẹ, bẹ́ẹ̀ni ó dójútì wón ní gbangba, bí ó ti ṣe ṣẹ́gun wọ́n lórí àgbélèbú. ¹⁶ Nítorínà, ẹ má ṣe jẹ́ kí ẹnikẹ́ni dá yín l'ẹ́jọ́ lórí àwọn ohun tí ẹ̀ ń jẹ tàbí àwọn ohun tí ẹ̀ ń mu, tàbí ní ti ọjọ́ ayẹyẹ kan tàbí ti oṣù tuntun, tàbí ní ti àwọn ọjọ́ ìsinmi. ¹⁷ Àwọn wọ̀nyí ni àwòjíji àwọn ohun tí ó ń bọ̀'wá, ṣùgbọ́n Krístì ni ara. ¹⁸ Ẹ má ṣe jẹ́ kí ẹnikẹ́ni tí ó ń fẹ́ ìwà ìrẹ̀lẹ̀ àbí ìsìn àwọn ángẹ́lì ṣe ìdájọ́ yín kúrò nínú ère yín. Irúfẹ́ ènìyàn báyìí a máa wọnú àwọn ohun tí ó rí àti pé a sì máa gbéraga nípa èro ẹran ara rẹ̀. ¹⁹ Òun kò sì di orí nnì mú ṣinṣin. Láti ara orí ni gbogbo ẹ̀ya ara pẹ̀lú àwọn oríkèríkèé atí iṣan ti ń gba ìpèsè tí wọ́n sì so papọọ̀; ó ń dàgbà pẹ̀lú ìdàgbà tí Ọlọ́run fi fún. ²⁰ Bí ẹ̀yín bá ti kú pẹ̀lú Krístì sí àwọn ẹ̀mí ìpìlẹ̀ ayé, kílóde tí ẹ̀yin ń gbé bí ẹnití a fi ipá mú láti gbọ́ ti ayé: ²¹ "Máṣe gbámú, tàbí tọ́wò, tàbí fọwọ́kàn"? ²² Gbogbo ìwọ̀nyí ni yó parun pẹ̀lú ìlo wọn, gẹ́gẹ́ bí àwọn ìlànà àti ẹ̀kọ́ àwọn ènìyàn. ²³ Àwọn ìlànà yìí ni ọgbọ́n àdábọwọ́ ẹ̀sìn àti ìrẹ̀lẹ̀ àti ìpọ́nra-ẹni-lójú. Ṣùgbọ́n wọn kò ní èrè láti dín ìfẹ́kùfẹ́ ara kù.