¹ Ming ogoroz e̱e̱ti o̱le̱ icima a̱zze̱t kar zin kotodong icima utene, abunna ming a̱ru̱k o̱le̱nya̱ tu̱r o̱le̱ co̱de̱ kar zin a̱zza̱ we̱c a̱zze̱te̱ co̱de̱. ² Ming agame ogoryaiti a̱du̱lo̱ni̱k ce̱e̱zto̱, ming u̱ru̱we̱ kadak, a̱zze̱ wo̱ye̱ bu̱tu̱ni̱ zoze ci ogon ki necu to̱. ³ Ming iyowa i̱i̱ ngati ngen enne ku̱du̱lya̱k ce̱e̱zto̱, aburconik wo̱ye̱ baci ci a̱bu̱tu̱ne̱ne̱ e̱e̱t ci a̱ru̱k nonno. Abunna ogoryaiti ming a̱ru̱k nga̱bo̱lo̱. Ming a̱zze̱ gi̱i̱ ci anyak to̱, anyik nonno kutuwozik tu̱ ogore neci ninne ke̱. ⁴ Ming umuddai e̱le̱gi̱ti̱ ci ogoroze ngen aruge azzine cignnek, icima ming eeni o̱le̱ icima zi̱gi̱i̱r, icima a̱zze̱t, abunna ming a̱ru̱k ngabolo lak ram. ⁷ Ming i̱ta̱ng e̱e̱ti̱ o̱ro̱bi̱ya̱ icima i̱jjo̱ le̱ca̱ri̱ cinne ka̱vu̱to̱ labak, kar zin kogoroze ce̱e̱ze̱ ci e̱e̱t neci, kar ogoryaiti urubjai, abunna ogoryaiti neci ming a̱ru̱k ngabolo lak ram. ⁸ Ma̱i̱je̱ ming ngen igoryaiti kumuddai, abunna ming akku manyi ce̱e̱z rok ol wakgon etted lokiko ko̱ ki̱ji̱ne̱t ming een nonno ci da attadik a̱zzi̱t cinne elleya kaal cik e̱e̱t ci le̱ca̱ri̱o̱. ⁹ Ming een dangonet ci obod ki gi̱i̱ imma, icima ming eeni o̱le̱, zi̱gi̱i̱r, icima a̱zze̱t, ru̱u̱m, icima gi̱i̱ imma ci obod ki ci wo̱ye̱ azi e̱e̱ti̱ ne, "Cinanni icu," abunna dangonet ci ol noko do̱o̱k ming anyayak ol wagon etted lokiko ko̱. Abunna e̱e̱ti̱ ci amuda ol wakgon etted lokiko ko̱ abaci, a̱ru̱k le̱ca̱ri cinne lak ram. ¹⁰ Ming a̱zu̱we̱k e̱e̱ti̱ le̱ca̱ri̱ cinne zi̱gi̱i̱r, o̱le̱, a̱zze̱t, icima e̱le̱gi̱t ̱imma ki̱ta̱ng, kar zin kadak icima ubucane, icima ogoroze ci orong bu̱k acini, abunna nege do̱o̱k ngati e̱e̱gi̱ne̱ ram ming i̱to̱n zar cik ¹¹ Manyoni, kar kaggac ming attadik e̱e̱ti a̱zzi̱t gi̱i̱ ci gononi icima nganne. Abunna manyi ming elemna, kar zin co̱de̱ irong a̱ru̱k ngabolo. ¹² Ma̱i̱je̱ ming ogorze ngatinne, abunna imma ming a̱ru̱we̱k ngabolo manyi gi̱i̱. ¹³ Ming errece e̱le̱gi̱ti̱ kizeto idice, anyik e̱e̱t co̱de̱ ke̱ kanyaha e̱le̱gi̱t kicinet ol. Irong wo̱ye̱ enne a̱ru̱k ngabolo ci gi̱i̱ ci errece. ¹⁴ Ming alawa e̱e̱ti̱ e̱le̱gi̱t ngati e̱e̱t ci le̱ca̱ryo̱ kize ngabolo kar zin e̱le̱gi̱ti̱ kubucane icima adai lo̱mu̱k, abuna e̱e̱ti̱ ci o̱de̱ ke̱ ming a̱ru̱k ngabolo. ¹⁵ ma̱i̱je̱ da ming aave manyi to̱, irong e̱e̱ti̱ ci o̱de̱ ke̱ a̱ru̱k gi̱i̱ imma; ming ijuraye da e̱le̱gi̱ti̱ neci, a̱ru̱we̱ ngabolo o̱ro̱bi̱ya̱i̱ nek bali ijuraine ke̱. ¹⁶ Ming imiciz e̱e̱ti̱ dolec ci ngaiye ngen kataguzo ki e̱e̱t imma, kar ming ataguzo ki nonno, abunna a̱tti̱k kize ngaa cinne ngati a̱ru̱we̱ kaal wak rucentak orong ol. ¹⁷ Ming utuburo be̱e̱ti̱ doleco, abunna ming a̱ru̱k o̱ro̱bi̱ya̱ cik e̱e̱gi̱n ki rucenet ci dolec ci ngen ngaiye. ¹⁸ Ma a̱nyi̱ku̱ aryak kuruget. ¹⁹ Ming a̱ta̱gu̱zo̱ e̱e̱ti̱ imma ki e̱le̱gi̱t, abunna ming a̱ru̱we̱ e̱e̱ti̱ neci kadak. ²⁰ Ming i̱bbo̱ri̱k e̱e̱ti̱ wawac gi̱i̱ ci anyik kize ta̱mu̱ta̱dde̱n cinne, kize Manyi do̱ niko, abunna ming e̱gerezane. ²¹ Ma a̱mi̱tu̱ e̱e̱t ci i̱do̱ng imma icima a̱ddu̱ku̱ ngen bali e̱e̱gi̱nu̱ niga bu̱k i̱do̱ngi̱ lo̱o̱ce̱ ci Masiro̱. ²² Ma a̱mi̱nyu̱ ngaa ci boye icima dolec ci a̱zze̱ ba̱a̱ti̱nne. ²³ Ming ogorgorantu kar nege ku̱tu̱ya̱ annita, Manyi, kazi atin anna tuwenet cinneng. ²⁴ A̱bu̱re̱ mo̱zzi̱ne̱t cinanne, kar wo̱ye̱ ku̱ru̱u̱ng nya̱tu̱ba̱ta̱; e̱e̱gi̱n atin ngai cigok boye, kar doli cigok ki̱zze̱c be̱e̱ti̱ge̱g to̱. ²⁵ Ming aanyik o̱ro̱bi̱ya̱ e̱e̱t imma kize ngabolo o̱lle̱ negannik ngatinong amati ko̱, ma ogoni ki e̱e̱ti wagon a̱gu̱rra̱ne̱ o̱ro̱bi̱ya̱ o̱lle̱ icima aanyik katadik u̱ge̱ oo. ²⁶ Ming agama ru̱u̱m ci e̱e̱t ci le̱ca̱ri̱o̱ kar ragoi, abunna ming a̱mi̱re̱ne̱ ming ngen ki̱tto̱ i̱i̱, ²⁷ obboc i̱yo̱ko̱ o̱de̱ ci a̱bu̱nge̱ne̱; ru̱u̱m ci a̱bu̱nge̱ enne ele cinne. Kar zin ucca bo̱do̱k enne ka̱ta̱ngu̱ ni̱ya̱? Ming utuwa enne annita, kazi wo̱ye̱ anna nonno, ngiwa kabunnane anna. ²⁹ Ma alamnyu mu̱ci̱ ci aciryaninu icima ci amaccai merta. Abunna ming aanyang abunya wagok macik. ³⁰ U̱tu̱gu̱z bo̱do̱k niko o̱le̱nya̱i̱ ki a̱zza̱ne̱ cigok. anycik ka̱vu̱to̱ ki e̱e̱ti̱ge̱k i̱i̱nya̱ torgerem, ma̱i̱je̱ wazin ci een tu̱rge̱ ko̱ anycang annita. ³¹ E̱e̱gi̱nu̱ atin ol cik atahalteu a̱vvu̱t do̱ i̱ze̱t ciggnnik. Ma zin a̱da̱kku̱ i̱di̱ng ci e̱le̱gi̱t ci a̱ga̱m e̱leg̱je̱ mu̱ra̱. Abarik, u̱ju̱kte̱k u̱rzi̱.