² 'Ming u̱tu̱wa̱ du̱ca̱i̱t ci een Hebrew, abunna ming a̱li̱ngli̱ng e̱rki̱nya̱ torkonom, kar zin e̱rki̱te̱ wa een turgerem ka̱jja̱l enne kuuk o̱lli̱n ci irong a̱ru̱k ro̱k gi̱i̱ imma bu̱k. ³ Ming a̱kku̱ da enne do̱, abunna ming okko enne o̱lli̱n do̱; ming uruco, kar ngaa cinne bu̱k kuk o̱lli̱n ko̱rko̱ri̱t ki nonno. ⁴ Ming aanyik da ddi̱ki̱riyo̱i̱ti̱ nonno ngaa kar zin kanyak logoz ki bu̱we̱ci̱, ovo ngaa ki do̱o̱li̱ e̱e̱gi̱n cik ddi̱ki̱ryoḵta̱k, kar zin enne kajal eleye cinni do̱. ⁵ Ma̱i̱je̱ ming ize du̱ca̱i̱ti̱ mu̱lu̱we̱ aliba ne,"Kilemi anna ddi̱ki̱ryo̱i̱t wananni, ki ngaa, ki do̱o̱li wagannik; irong ki̱yo̱i̱ kuk renna o̱lli̱n, ⁶ " kar zin ddi̱ki̱ryo̱i̱ti̱ wanne kanyahak nonno Ta̱mu̱ta̱dde̱n. Abunna ming anyaha ddi̱ki̱ryo̱i̱ti̱ nonno ta̱tu̱g icima lolac ci ta̱tu̱gu̱, kar zin ddi̱ki̱ryo̱i̱ti̱ wanne kavardange i̱ta̱t cinne ki u̱mu̱mo̱. Kar zin du̱ca̱i̱ti̱ ki̱li̱ngli̱ngo̱zi̱k nonno ngint adakne. ⁷ Ming u̱tu̱we̱k e̱e̱ti̱ buwenyinne kize du̱ca̱i̱t ci ngaye, irong enne owo do̱ ki du̱ca̱i̱ti̱ ci maci. ⁸ Ming irong enne anyik ddi̱ki̱yo̱i̱t katalo, wa erezik nonno ele cinne, a̱mi̱re̱ne̱ zin enne du̱ca̱i̱t neci. Irong bo̱do̱k wo̱ye̱ enne u̱te̱k nonno ol cik reng. Irong lo̱ti̱no̱wa̱ azi niko, ngiwa u̱lu̱te̱ enne nonno. ⁹ Ming atahala ddi̱ki̱ryo̱i̱ti̱ wanne nonno kize ngaa ci ngerrinne, abunna enne ming aggam nonno ki wagon buwenyinne. ¹⁰ Ming i̱ti̱k enne ngaa imma, abunna ming irong i̱ta̱ny ahate, ru̱u̱ma̱ni̱ne̱, icima ogolan rucenet cinne. ¹¹ Ming irong enne aanyik nonno kaal nek e̱e̱gi̱n i̱i̱yo̱ ko̱ do̱o̱k, okko wa̱ye̱ enne do̱ o̱lli̱n ngati irong ̱a̱ru̱we̱ o̱ro̱bi̱ya̱ u̱gge̱. ¹² Ming u̱ru̱k e̱e̱ti̱ imma kadak, abunna ming a̱ru̱we̱ e̱e̱ti̱ neci bu̱k kadak. ¹³ Ming irong e̱e̱ti̱ a̱ru̱k e̱e̱t i̱ba̱ti̱ne̱, ula da a̱vu̱rto̱ne̱i̱, kahala atin anna nginti okko a̱vi̱ro̱ni̱k kuk ku̱lu̱gu̱nye̱. ¹⁴ Ming icihozik e̱e̱ti̱ le̱ca̱ri̱ cinne i̱ba̱ti̱ne̱ kar ku̱bu̱tu̱n, otte niga nonno, ming aave wo̱ye̱ i̱te̱le̱ ci Ta̱mu̱ta̱dde̱no̱ nu̱nu̱n, aanycik kadak enne bu̱k. ¹⁵ Ming u̱ru̱k e̱e̱ti̱ imma baatinne icimma yaatinne, a̱ru̱we̱ e̱e̱ti̱ neci kadak. ¹⁶ Ming i̱vi̱re̱ e̱e̱ti̱ e̱e̱t imma kar zin kutuwoi, imma umuddai e̱e̱ti̱ anyak enne, abunna ming a̱ru̱we̱ e̱e̱ti̱ neci a̱vi̱re̱ e̱e̱t ke̱ kadak. ¹⁷ Ming otor e̱e̱ti̱ baatinne icima yaatinne abunna ming a̱ru̱we̱ e̱e̱ti neci kadak. ¹⁸ Ming oyoho ol ugga kar zin imma kovoc gonni biya icima akiv a̱tta̱, kar zin e̱e̱ti̱ neci ngen kadak, abarik oong ngatode; ¹⁹ kar zin enne kubunna uul koto ngati omtine ki̱ri̱ya̱, abunna ming itab e̱e̱ti wa bali a̱ru̱k nonno i̱i̱nya̱ balik onge enne lo̱o̱ta̱ ke̱; kar zin bo̱do̱k kitab di̱le̱ne̱t cinne do̱o̱k. Irong zin e̱e̱ti neci abaci ngati a̱bu̱tu̱ne̱ e̱e̱t. ²⁰ Ming a̱bi̱c e̱e̱ti du̱ca̱i̱t ci maci icima ci ngaye keeta, kar zin du̱ca̱i̱ti̱ kadak pa̱ni̱ne̱t neci, abunna e̱e̱ti̱ neci ming e̱de̱ze̱. ²¹ Ma̱i̱je̱ zin, ming urug du̱ca̱i̱ti̱ wazi icima wazinok ram, irong wo̱ye̱ ddi̱ki̱ryo̱i̱ti̱ e̱de̱ze̱, ngiwa wo̱ye̱ da i̱pi̱ra̱ enne zi̱we̱ne̱t ci o̱ko̱lozi̱ne̱ du̱ca̱i̱ti̱. ²² Ming oyokto ol ugga ngatode ku̱vu̱rto̱zti̱k ngaa ci anyakce kitivica do̱o̱le̱c, kar zin ki̱zzi̱ re̱ci̱ne̱t imma ngatinne to̱, abunna zin e̱e̱ti̱ wa abaci ming e̱de̱zo̱ni̱k tabinet, ming a̱ji̱n mac ci ngaa neci ngatinne, abunna enne ming i̱ta̱bje̱ goole ci odolta ol wa etted lo̱ki̱ko̱. ²³ Ma̱i̱je̱ ming aave re̱ci̱ne̱t ci gerze to̱, anycik ruget korkorit ki ruget, ²⁴ e̱be̱re̱ci̱ ki e̱be̱re̱c, nyigitat ki nyigitat, a̱zzi̱ti̱ ki a̱zzi̱t, zo̱ci̱ ki zo̱c, ²⁵ ngo̱ddo̱co̱ ci go̱yo̱ ki ngo̱ddo̱co̱ ci go̱yo̱, ngo̱ddo̱co̱ ki ngo̱ddo̱co̱, ti̱hi̱re̱ne̱t ki ti̱hi̱re̱ne̱t. ²⁶ Ming otokoca e̱e̱ti̱ ̱e̱be̱re̱c ci du̱ca̱i̱t ci maci icima ci ngaiye kize gerza, anyik kutunga du̱ca̱i̱t neci koto do̱ kize ta̱bi̱ne̱t ci e̱be̱re̱c cinne. ²⁷ Ming i̱li̱ba̱ ngigitat ci du̱ca̱i̱t ci maci icima ci ngaiye, abunna ming ungna du̱ca̱i̱t neci koto do̱ kize ta̱bi̱ne̱t ci nyigitato. ²⁸ Ming akat o̱le̱ e̱e̱t ci maci icima ngaa kadak, abunna ming o̱vo̱cce̱ o̱le̱ neci biyene, kar zin i̱di̱ngi̱ cinne irong adakce; ma̱i̱je̱ manyi o̱le̱ neci oogjai ba̱ci̱no̱we̱. ²⁹ Ming akati da gon o̱le̱ neci ol la̱du̱n, kar zin ol u̱du̱kta̱k manyi ma̱i̱je̱ enne irong bu̱k alaami, kar zin o̱le̱ neci u̱ru̱k e̱e̱t icima ngaa kadak, abunna ming o̱vo̱cce̱ o̱le̱ neci bi̱ye̱ne̱ kar zin manyi bu̱k ku̱ru̱we̱ kadak. ³⁰ Ming irong enne ki̱ta̱bo̱, abunna zin ming a̱ru̱k gi̱i̱ neci orongnye ku̱ru̱we̱ ke̱ ³¹ Ming akat o̱le̱ neci ngerrti e̱e̱to icima buwenyinne, abunna manyi o̱le̱ neci ming ogon gi̱i̱ ci orong lo̱ti̱ne̱t cu nonno ku̱tu̱gu̱. ³² Ming akati o̱le̱ du̱ca̱i̱t ci maci icima ci ngaiye, abunna manyi o̱le̱ ming i̱ta̱bje̱ ziik cik voorik e̱e̱gi̱n shekels mo̱te̱n i̱i̱yo̱ kar zin o̱le̱ ko̱vo̱cce̱ biyene. ³³ Ming oo e̱e̱ti̱ imma lo̱o̱k, icima adaa lo̱o̱k kar zin irong a̱bu̱ngi, kar o̱le̱ icima zi̱gi̱i̱r ki̱tta̱k ecito, ³⁴ abunna manyi lo̱o̱k ming i̱ta̱b gi̱i̱ neci okoloze ke̱. Abunna ming aanyik o̱ro̱bi̱ya̱ manyi e̱le̱gi̱t ci wa adak ke̱ kar enne kuwe e̱le̱gi̱t neci adak ke̱. ³⁵ Ming akat o̱le̱ ci e̱e̱t imma o̱le̱ imma kadak, abunna ming utene o̱le̱ ci aruge ko̱ kar zin kengerit o̱ro̱bi̱ya̱, kar zin bo̱do̱k kengerit o̱le̱ wanai adak ke̱. ³⁶ Ma̱i̱je̱ ming agawe moot da gon o̱le̱ la̱du̱n, kar bu̱k manyi irong ngen alaami, abunna ming i̱ta̱b o̱le̱ neci ngati, kar zin e̱le̱gi̱ti̱ ci adak ko̱ kize cinne.