¹ Imma nye̱lo̱we̱ wa ize i̱i̱yo̱ ngati utungtek ol wak Israilo Masir lo̱o̱c, i̱vi̱ta̱k nege wazin neci ele, balal ci Sinai. ² Baling utungtek Revidim lo̱o̱c kar zin ki̱vi̱ta̱k balal ci Sinai, etehenyit ti̱te̱t balala kedevto ki be. ³ O̱tto̱d Mu̱sa̱ be uuk ngati Ta̱mu̱ta̱dde̱no̱. Utu Manyi nonno biya kar izek ne,"Du̱wa̱k tatok ci Jakobi, ki ol cik Israilo izek ne: ⁴ Icintu baliye niga gi̱i̱ ci u̱tu̱gu̱we̱ anna ol cik Masiru, kodongaung baliye tabane cik u̱ddu̱va̱nta̱k kar zin kanyahaung ele cinanni. ⁵ I̱yo̱ko̱ zin, ming aziknu muluk cinani kar zin o̱to̱ngo̱lte̱ya̱ng kar zin u̱zu̱te̱ olom wananni, kar zin niga izet kaal cigannik e̱e̱gi̱n taliu o̱lle̱ do̱o̱k, nginwa eene lo̱o̱ci̱ do̱o̱k cinanni. ⁶ E̱e̱gi̱nu̱ ati̱n niga alaat cik alaanzet wa ol cik ke̱le̱co̱ lo̱o̱ce wananni a̱li̱le̱. No̱ngi̱to̱n cik ovvo niga a̱du̱waku̱ ol wak Israilo neko." ⁷ I̱ki̱ya̱ zin Mu̱sa̱ utu di̱ki̱ryo̱k wak o̱llu̱. U̱du̱wa̱k nogo no̱ngi̱to̱n nek o̱do̱nyi̱k Manyi ko̱ do̱o̱k. ⁸ O̱bbo̱dde̱he̱ ol do̱o̱k nga̱to̱de̱ izetek ne, "ko̱go̱nna̱ atin kaal nek u̱du̱wa̱ Manyi ko̱ do̱o̱k." Kar zin Mu̱sa̱ i̱ki̱ya̱ o̱bo̱de̱ Manyi zoz neci u̱du̱kta̱ ol ke̱. ⁹ Izek Manyi Mu̱sa̱ ne, "Ka̱ku̱na̱ki̱ di̱i̱zo̱ce̱ ci a̱di̱ngdi̱nge̱ kar ol kizikta ming kozoziki inneta kar wo̱ye̱ ku̱tu̱ne̱t zoz cunne u̱du̱t." Kar zin Mu̱sa̱ ku̱du̱wa̱k Manyi zoz ci o̱llu̱. ¹⁰ Izek zin Manyi Mu̱sa̱ ne,"Bit o̱lle̱. wazin cu ki lo̱za̱ rezika nogo annita, kar zin anyik nogo kutunyet ru̱u̱ma̱ni̱ wagek. ¹¹ Ereyo ju̱rru̱m wazin wa een i̱i̱yo̱, ma̱rri̱t anna, Manyi, ming kaluccak atin Be wa Sinai. ¹² Arik lo̱ko̱ret kuburuwet be kalamit ol. Izek nogo ne, 'u̱zu̱tte̱ ma ottoddu icima u̱u̱mnyu̱ lokore. Ming u̱u̱m e̱e̱ti̱ imma be ettedonik daizi kadak.' ¹³ Irong a̱zzi̱ti̱ ci e̱e̱t imma u̱u̱m e̱e̱t ci ogon ki neci. Abarik, abunna ming o̱vo̱ce̱ kadak icima o̱vo̱ce̱. Icima ming een e̱e̱t ci di̱hi̱ri̱ icima e̱le̱gi̱t, abunna ming a̱ru̱we̱ kadak. Ming u̱tu̱bu̱we̱ tu̱re̱ ci o̱ro̱g u̱u̱mu̱c, o̱tto̱da̱ wo̱ye̱ nege ro̱k be vu̱ru̱t." ¹⁴ Kar zin Mu̱sa̱ kuluce biya ro̱k ol. Erezik zin enne ol Manyi, kar zin nege kutunyet ru̱u̱ma̱ni̱ wagek. ¹⁵ Izek zin enne ol ne,"A̱a̱vu̱t ju̱rru̱m wazin wa een i̱i̱yo̱; ma izaonniku ro̱k ngaai cigok bu̱k o̱jo̱nu̱n." ¹⁶ Wazin wa een i̱i̱yo̱, baling ngen een nge̱rre̱t, iziyet ol kar zin kicinet ju̱li̱ ki ba̱di̱ ci erec ki di̱i̱z ci a̱ri̱re̱ biya ta̱dde̱na̱, kar zin mului ci turo o̱ro̱g o̱ro̱o̱t. a̱bbrri̱te̱t ol do̱o̱k nya̱pe̱ri̱ta̱. ¹⁷ Anyaha Mu̱sa̱ ol do̱o̱k nya̱pe̱rita̱ kar ku̱ru̱mto̱ ki Ta̱mu̱ta̱dde̱n, kar zin nege kibilet vu̱rtta̱. ¹⁸ U̱bu̱nge̱ be ci Sinai ne minic ma̱rri̱t Manyi ming uluccak gooya ki bbu̱rre̱t. O̱tto̱d bbu̱rre̱ti̱ uuk ta̱dde̱na̱ ki wagon bbu̱rre̱ti̱ ci kojoron wa a̱ddi̱ki̱re̱, kar zin be do̱o̱k kotomo gerzet. ¹⁹ Baling otore mului ci turo oroot, ozo Mu̱sa̱, kar Ta̱mu̱ta̱dde̱n kobodek mulue immani. ²⁰ Uluccai Manyi biye ci een Mount Sinai, kar zin kutu Mu̱sa̱ be ta̱dde̱na̱. ²¹ O̱tto̱d zin Mu̱sa̱ uuk ta̱dde̱na̱. Izek zin Manyi Mu̱sa̱ ne, "Luce bit lo̱o̱ta̱ kar zin du̱wa̱k ol gerza ming a̱du̱lo̱ni̱ka̱ ki̱vi̱ta kicintan, gerza ming adai ol cik meelek ngatineng. ²² Anyik ddi̱ki̱ri̱o̱k wak ke̱le̱ca̱k wak i̱vi̱ta̱a̱ annit o̱jo̱nu̱n kederanit eleti-kereya annit ju̱rru̱m eci ka̱ku̱ne̱ kar abunna ming irong icihonik nogo." ²³ Izek Mu̱sa̱ Manyi ne, Irong ol o̱tto̱da̱ be ta̱dde̱n, ngiwa odonyiet inna aggeta: ' Artik lo̱ko̱re̱t kuburuet be kar zin reziye Manyi.'" ²⁴ Izek Manyi nonno ne, "Luce, bit be lo̱o̱ta̱, kar zin o̱tto̱dda̱ ki Aaron, ma zin anyik ddi̱ki̱ri̱o̱k wak ke̱le̱ci̱a̱k ki ol ku̱du̱le̱t kaal wak acaz ke̱ ki̱vi̱ta̱a̱, ming u̱tu̱gu̱zo̱ niko koyoi anna nogo." ²⁵ Kar Mu̱sa̱ kulucozik ol kar kozozik.