1
1
Лава́ Неемиё́скирэ саво́ исы́н чяво́ Ахалиё́ско. Адава́ исы́с до чё́н саво́ кхарэ́лпэ кисле́во до би́што бэ́рш, мэ исы́с до фо́ро Су́зы,
2
и явья́ Хана́но е́кх мирэ́ пшалэ́ндыр, и лэ́са мануша́ Иудея́тыр. И мэ пучя́вас лэ́ндыр па́л иудее́ндэ савэ́ зракхнэ́пэ, плено́стыр, и па́л Иерусали́мо.
3
И ёнэ́ пхэндэ́ ма́нґэ: “Иуде́и савэ́ зракхнэ́пэ плено́стыр ачнэ́пэ дэ Иуде́я, – ёнэ́ дживэ́н до пхарипэ́н и до баро́ ладжяипэ́н. И сте́ны Иерусалимо́скирэ розмардэ́ и вуда́ра ла́кирэ схачкирдэ́ яґа́са”.
4
И сы́р мэ шундё́м адалэ́ лава́, бэстё́м и лыё́м тэˍрова́в, явнэ́ пэ ма́ндэ пхарэ́ дэвэса́, и мэ до по́сто манґа́васпэ анґи́л Дэвлэ́стэ,
5
и ракира́вас: “О Я́хвэ, Дэвэ́л болыбны́тко, Ту баро́, и Ту зрикирэ́с Пэ́скирэ лава́ и камлыпэ́н, саво́ Ту дыя́н одолэ́нґэ, ко́н камэ́л Ту́т и шунэ́л одова́, со Ту припхэндя́н!
6
Манґа́в Ту́т, причи́в Тырэ́ кана́ кэ мэ и откэ́р якха́ Тырэ́ пэ ма́ндэ, со́б тэˍшунэ́с манґипэ́н Тырэ́ слуґа́ско, саво́ манґэ́лпэ Ту́кэ анґи́л Тыро́ му́й дадэвэ́с, дэвэ́с и ра́т, па́л Израильсконэ́ндэ чявэ́ндэ, савэ́ исы́н Тырэ́ ра́бы и манґа́в па́л лэ́нґирэ бэзэха́, савэ́ амэ́ кэрдя́м анґи́л Ту́тэ. И мэ пэ́скирэнса дадэ́нса – кэрдя́м бэзэ́х.
7
Дрыва́н нанэ́ ку́ч амэ́ кэрдя́м анґи́л Ту́тэ, и наˍзракхья́м саро́, со Ту припхэндя́н, и зако́ны Тырэ́, и сы́р тэˍджива́с анґи́л Ту́тэ, сы́р Ту пхэндя́н Моисеё́скэ Тырэ́скэ рабо́скэ.
8
Манґа́в Ту́т, зри́пир ла́в, саво́ Ту пхэндя́н Моисеё́скэ, Тырэ́скэ рабо́скэ: ‘Сы́р тумэ́ наˍавэ́на чячюнэ́ Ма́нґэ, Мэ розчюрда́ва тумэ́н машки́р сарэ́ндэ манушэ́ндэ.
9
Нэ сы́р тумэ́ обрисё́на кэ Мэ и лэ́на тэˍракхэ́н лава́ Мирэ́ и тэˍдживэ́н пи́р лэ́ндэ, и сы́р тумэ́ авэ́на пи́р саро́ свэ́то розчюрдымэ́, и отдотхы́р Мэ скэда́ва тумэ́н и яна́ва пэ штэ́то, саво́ Мэ выкэдыё́м, со́б тэˍуджинэ́н одо́й ла́в Миро́’.
10
И ёнэ́ Тырэ́ ра́бы и мануша́ Тырэ́, савэ́н Ту выкиндя́н барэ́ зорья́са и Тырэ́ зоралэ́са вастэ́са.
11
Дэвэ́л миро́! Манґа́в Ту́т, причи́в Тырэ́ кана́ ко манґипэ́н тырэ́ рабо́ско и ко манґипэ́н Тырэ́ рабэ́нґо, савэ́ лошалэ́ одолэ́са, со дарэ́н анґи́л Ту́тэ. Манґа́в Ту́т блаґослови́ ма́н дадэвэ́с, и дэ ма́нґэ ми́лость анґи́л адалэ́стэ манушэ́стэ!” Мэ исы́с одова́ ко́н подэ́л ви́но царё́скэ.