¹ Дэ доя рат угия суно царёстыр, и пхэндя ёв тэ янэн лэскэ лыла дэ савэ зачиндэ сарэ рынды савэ кэрэнаспэ до царство, и лэн гинэнас ангил царёстэ. ² И попэнэ лыл дэ саво сыс зачиндо сыр Мардохеё допхэндя пал Гавафостэ и Фаррэстэ, пал дуендэ евнухэндэ царёскирэндэ савэ ракхэнас царёс, сыр ёнэ закамнэ тэ умарэн царёс Артаксерксос. ³ И пхэндя царё:«Соса плоскирдям и сыр гадыям Мардохеёс пал дова со ёв зракхья миро джюипэн?» И пхэндэ тэрнэ мануша царёскирэ: «Ваш лэскэ ничи на сыс кэрдо». ⁴ И пхэндя царё: «Кон до дворо?» А Амано явья до машкиратуно дворо ко царё тэ пхэнэл лэскэ, соб тэ ублавэн Мардохеёс по дэмбо саво ёв скэрдя ваш лэскэ. ⁵ И пхэндэ тэрнэ мануша царёскирэ лэскэ: «Гэна Амано тэрдо до дворо». И пхэндя царё: «Мэк заджял». ⁶ И загия Амано, и пучья лэстыр царё : «Со тэкэрэ манушэскэ савэс царё камэл тэ гадэл упрэ?» И пхэндя Амано кокоро пэскэ до ило : «Конэс скамэла тэ гадэл царё бутыр мандыр?» ⁷ И тэнче пхэндя Амано царёскэ: «Манушэс савэс ту камэс тэ гадэс, ⁸ мэк лэскэ янэн царско идя, дэ сави врелпэ царё, и дэн лэскэ грэс пэ савэстэ традэлас царё, и пошэро мэк врен царско корона; ⁹ и мэк дэн идя и грэс до васта манушэскэ саво барэдыр кэ царё, и мэк дава мануш урьел долэс конэс царё камэл тэ гадэл упрэдыр, и мэк вылыджян лэс пэ грэстэ машкир форо и мэк годлэн ангил лэстэ:" Дякэ кэрэл царё манушэскэ савэс камэл тэ гадэл упрэдыр!"» ¹⁰ И пхэндя царё Аманоскэ : «Сыгэдыр джя, лэ идя и грэс, сыр ту пхэндян, и кэр дава Мардохеёскэ, иудеёскэ саво бэшто пашэ царёскирэ вудары, и наумэк ничи одолэстыр со ту пхэндян». ¹¹ И лыя Амано идя и грэс, и вридя Мардохеёс, и вылыджия лэс пэ грэстэ и лиджия машкир форо и годлэлас ангил лэстэ:«Дякэ кэрэл царё манушэскэ, савэс камэл тэ гадэл упрэдыр!» ¹² И рисия Мардохеё кэ царёскирэ вудары, а Амано рисия до пэскиро кхэр ладжякирдо и обмэклэса шэрэса. ¹³ И роспхэндя Амано пэскирэ ромнякэ и другэнгэ саро со кэрдяпэ лэса. И пхэндэ лэскэ други и ромны Зерешь: «Мардохеё саво сын иудеё ёв тут ладжякирдя ангил сарэндэ, акана ту лэс на хаскирэса, а ёв тут хаскирла». ¹⁴ Ёнэ на пирьячнэ тэ ракирэн сыр явнэ евнухи царёстыр тэ отлыджян Аманос пэ свэнко саво скэрдя Есфирь.