¹ Пэ трито дэвэс посто Есфирь уридяпэ дэ царско идя, и гия дэ машкиратуно дворо ко царё. А царё сыс бэшто пэ пэскиро штэто дэ пэскиро кхэр. ² И удыкья царё Есфиря, сави сыс тэрды до дворо, ёй чялыя царёскэ и ёв сыс лошало тэ дыкхэл ла, и протырдыя царё кэ ёй сунавкуно пэскиро дэсто, саво сыс до васта лэстэ И подгия Есфирь кэ ёв и лыяпэ пал дэсто. ³ И пхэндя лакэ царё: «Со ту явьян царица Есфирь? И со ту камэс тэ мангэс? Кэ паш царство дава тукэ». И пхэндя Есфирь: ⁴ «Сыр скамэла царё, то мэк явэл царё Аманоса дадывэс по свэнко, саво мэ кэрава ваш тукэ». ⁵ И пхэндя царё слугэнгэ: «Сыгэдыр кхарэн Аманос, соб тэ джяс лэса по свэнко саво амэнгэ скэрдя Есфирь», ⁶ И сыр царё подпия вино по свэнко лыя тэ пучэл кэ Есфирь: «Пхэн мангэ со ту камэс? и со камэс тэ мангэс мандыр? мэ дава соро со ту мангэса? кэ паш царство авэла тыро». ⁷ И пхэндя Есфирь царёскэ: «гэна со мэ мангав и камам: ⁸ сыр мэ попэём дэ тырэ якха лачипэн и чялыём тукэ и ту лашало тэ дыкхэс ман, и ту камэс тэ джинэс, со мэ камам, тэнчэ яв ту Аманоса и тася по свэнко, саво мэ кэрава ваш тумэнгэ и мэ пхэнава со мэ камам тутыр» ⁹ И выгия Амано дэ дова дывэс лошалэ илэса, нэ сыр здыкья Амано Мардохеёс паш вудары царёскирэ, и ёв на вштыя ангил лэстэ и на здарандыя лэстыр, тэнче дрыван росхолясыя Амано пэ Мардохеёстэ. ¹⁰ Нэ зрикирдяпэ Амано и явья дэ пэскиро кхэр, скхардя пэскирэн другэн и пэскирья ромня Зерешь. ¹¹ И шарэлэспэ Амано лэнгэ пэскирэса барвалыпнаса, и пэскирэнса чявэнса, и пал саро дова сыр гадыя лэс царё, и чидя лэс барыдырэса машкир сарэндэ царёскирэндэ слугэндэ. ¹² И пхэндя Амано: «Бутыр пхэнава тумэнгэ, по свэнко саво скэрдя царица Есфирь, ни конэс на кхардэ екхэс царёс и ман, и тася пэ авир дэвэс ёй ман кхардя по свэнко кхэтанэ царёса. ¹³ Нэ адава саро на дэл лош дэ миро ило пал дава со мэ дыкхав Мардохеёс, адалэс иудеёс, саво бэшэл паш царска вудары». ¹⁴ И пхэндэ лэскэ Зерешь, лэскири ромны, и лэскирэ други: «Мэк кэрэн вучё дэмбо, а утроса пхэн царёскэ мэк ублавэн Мардохеёс пэ лэстэ, и джя царёса по свэнко. И чялынэ Аманоскэ далэ лава, и ёв скэрдя вучё дэмбо.