¹ ውርካ ዋድማ ጊታይ ኣይካ ኢየሱስ ክርስቶስ ጳውሎሴ ጢሞቴዎሴ፣ ከኦካ ቶኦካ ይሁኔን ኣይ ኤጴስ ቆጳሳታኔ፤ ጋይኬ ዲያቆናኔ ከውርካ ኢየሱስ ክርስቶስ ጊታይ ኣኔን ፊልጵስዩስ ፓይላ፤ ² ከባሪዮ ከሹባጋን ጉዋዩ፤ ከኢየሱስ ክርስቶስ ታቺ እንዻ ኣይኔኔ ሆፎዬ ካኣይሼ እየውባ። {ጎሺዬ ይሁኔኔ} ³ ከእያይ ሃጶቅሲዬ እየው ሃጎሺባ ኣምላክ ናኒ። ⁴ ሹ ጮል ሃይወንያ ናንዳካ እየው ፓይላያጝ፤ ሃይወንባ ከዋዛ፤ ⁵ ካርሲኬ ሹ እንካ ሌሜኔ ሌይ ሄክሼ ሹጝ ከዋድማካ ክያጃ ሹቃ የማቲያ ጊታኬና ኣሽኪኬ ጋጜ። ⁶ ከእየው እን ካርሲ ዋድማ ሹቃጝ እሺ ሌይ ሃምካ ሹካ ኢየሱስ ክርስቶሱጝ ካሄክሺሼ ሃምካ ቱንሱጝ ሃኣይ ኣኩሉክ። ⁷ ናንዳካጝ የኣኒንቴ ሻን ናኒ ክያኑጝ፣ ናንዳካ እየው ፓይላ እያጝ ቃቢዬን ናኒ ሃሊኪ፤ ኣይባ ከቁሜን ናኒዻዬ ናንዳካ ክያጃ ሹቃ ኣሽክዬኔ ቁዋቅትሼኔ፤ እየው ፓይላ ከኣን የኣያ ጊታኬና ካሻሜን ኣይኔንካ ባሪዮዬ። ⁸ ከናሺማካ ኢየሱስ ክርስቶስ ሃፎሽካዽዬ እየው ፓይላ እያን ባሪዮ ሃማኝ ናኒ። ⁹ ናሺማ ጉዩ ካኣዬኬ ኦኬ እባጄን ካሎኔ ጶቅሲዬኔ ፓይላ ካቆቃ ሾዽዮጝ ሃይወንባ። ¹⁰ ይንዻ ከፓይላ ኣዬ ላሻዬ ከሻምቴ ዋናዬ ከእብጅቶጝ፤ ሌይ ሃምካ ሄክሼ ሹካ ክርስቶሱጝ ካኣይቴ ጫንቃሌ ጊታኬና ማር ዻቢ ኣኔኔ፤ ¹¹ ናንዳካ ባሪዮ ጎቢንታዬ ጎሺዬ ከታካ ኢየሱስ ክርስቶስ ካቆቅኬ ካርቡ ጫንቃል እንካ ጌዬዬ ጊያ። {ከቁምኔንካ ጳውሎስ እን ክያጃ ሹቃ ጌጳዽዮጝ} ¹² ካንዻ ጪኒጌን ናኒ ዮ፤ ከኦይን ሄክሽ ኣኑጝ ክያጃ ሹቃ ካሎን ካጌጳዽዮጝ ከእባጅቶጝ ሃናሺያ። ¹³ እን ናሹጝኬ ኦጝ ቁምኔን ናኒ ናንዳካጝ ኣዬ ናንዳ ክርስቶሱጝ፤ ከውርካ ባኬን ጊታይካ ቶኦካ መንግስቴ ከኦካ ዶኬ ፓይላ ጊባጃ። ¹⁴ ከናንዳካ እን ቁሜ ኣኑጝ ጪኒጌን ጊታይ ናኒ ኣኔንኬ ታቺ እኑጝ ጁዋናን ክያጃካ ባሪዮ ሪጊ ኣኔኬኔ፤ ከሾያሞ ሃሳውኔን ጌያ ቁዋቅቲ። ¹⁵ ውር ክየም እን ናሹጝኬ ቦውንታዬ ፎኮሬ፤ ዬ ዶክ እን ናሹጝኬ ክያጃ ሹቃጝ ክሊህዬንባ ናንዳካ ኢየሱስ ክርስቶስ። ¹⁶ ጊታጝ፣ ኣን ከክያጃ ሹቃ ዜርምኔን ኦጝ ሃኣኒኖጝ ናንዳካጝ ጊባጆጝ፤ ሻምባ ይጝ ከናሺማ፤ ¹⁷ ዬ ጊታጝ ሃኣኔንባ ከቁምኔን ናኒዬ ዎሻ እን ጋሎ ካዴጪሼ ኣኔ ማርኬ ሹቃዬኔ ሺጝ ናንዳካ ኣርግማ ጊዬይያጝ ክሊህዬንባ ናንዳካ ክርስቶስ። ¹⁸ ኣኪ ችግር ኔኒ ኣኔን ኦ ክያኒ? ክያጃ ኣኩሉክ ኔኒ ካኣይባ ከሹቃዻ ከሙኒሼኔን ከጉዋር ኬና ኣይ እያንዻ ሃኬ እን ክሊህኔ ክርስቶሱጝ። ከይንዻ ዋዝንሲያ ኣን። ይንጌ ዋዝንሲያ ኣን፣ ¹⁹ ከኦይን ሄክሺ ኣኑጝ ከታካ ይሁኔን ጉዩዬ ከኬልሾ እን ጋዬ ኣን ከመንፈስካ ኢየሱስ ክርስቶሱጝ ካኣይሼ ኣን ዻቆጝ ሃእባጅያዬ። ²⁰ ከጉዋር ሃይነት ክየምጵንዻ ካሪግሺንቴዬ ካማር ጌይኔኔ ሃኣኔ ፎሽካዽኔን ካሎኔ ቃቦዬ፤ ኣይባዬ ኬካ [ወትሮ] ፓይላ ሹጝዻ ኣይኒን ከዻቆጝ ኣይኒን ከኣርሼኑጝ ካጎቢዬ ክርስቶስ ኦካ ኣሩጝ ናኑጝ ሃኣኔ ሾያሞ ፓሲ። ²¹ ኡፔን ናኒ ሃክርስቶስ፤ ኣርሼንዻ ሃዻቄን። ²² ሃኡፌንያ ከኣሩጝያጝ፣ ሃኣኔ ኦኬካ ካርቡ፤ ኣይባዬ ካእድዬ ናጝ ሃእባጅኬን። ²³ ሃጫንቂባ ከኦኬ ዻ ጊታጝ፤ ካካሞጝ፤ ካኣዬ ከክርስቶስዻጝ ሃፎሽካዽባ፤ ይጝ ካሎን ሃእን ኣይ ላሻዬ። ²⁴ ኣይባዬ ከኣሩጝ ኡፌን ናኒ ናንዳካ እየው ሳጊ ዎሺሽባ። ²⁵ ይን ከጶቅሲዬን፤ ከኣሽክቴ ከእምነቴ ካኣይሼ እየው ዋዛዬ፤ ከኦካ እየው ፓይላ ካኡፑኔዬ ካኡፎጝ ሃእባጅያ። ²⁶ ፕርዻ ሃኩኒዬ ከሹካጝ ሃኣዬ ሃሚን ጉዩጝ ከናንዳካ ክያጃ ናኒ እየው ጊታይ ኣይካ ኢየሱስ ክርስቶሱጝ ዋዛ ቋቅባ ኦጉዩ። ²⁷ ቆብባ ከውር ጊታኬና ካሁሉኩሼ ክያጃ ሹቃጵን፤ ይጝ ማቲያያጝ ሃኩና ቶይያ እየውያጝ ወይ ሃኣኔን ዹኬ ሃዋይያ ናንዳካ እየውያጝ፤ ናንዳካ እምነትካ ክያጃ ሹቃ ማቲ ውር ክየሜ ከኣርሼን ከቁዋቅትሽቴ ጎርቴ ከመንፈስ ክየሙጝ ሃእባጅያ። ²⁸ ከጉዋር ኬና ኣይ እያንዻ ኦይድ ከው ጊታይ [ወርቅሲኔን]፤ ይንዻ እንግን ካካይዮጝ፤ ዬ እየው ከባይሽቶጝ ሃዹዋልሽኔን ኬና ጋይኔ ከሃምካ ባሪዮጝ። ²⁹ ሃእንኬ ኣምኒቴ ከታቺ እንጵኔኔ ናንዳካ እሺ ከጌይቴ ጋሎጝ ጋያ እየው ኣይኔን ይጝ፣ ³⁰ የሌማዬ ከእይያይ የጌይቶጝ ካንዻ ከእያይ ኣኔ ኦናኑጝ ከእን የዋይቶጝ ከናሺኔን ሃይነት ኬና ኣይ እያይ እየውዻ የኣያ ጊታኬና ሳጊዬ።