¹ ከእን ናሹጝኬ ክየም ኣዬን ጉዩ ከክርስቶሱጝ ቁዋቅትሼን ኬና ኣይ ናዻ፤ ከሌምሲዬን ኬና ኣይካ ናሺማ፣ ከክየም ኣዬንካ መንፈስ፣ የኣንቴያ ሾዕሺዬኔ ዻዹጝኔንያጝ፤ ² ከቃቦ ክየም፣ ከናሺማ ክየም፣ ከመንፈስ ክየሜ ክያጃ ክየሜ ኣዬን፣ ሻምቴ ኣንባ ዋዛ ናኒ ካሎን። ³ ውር ዶክ ከኦጉዩ ጋዬ ላሻጝ ኮምቴባ ከዴንታ ሹቃ ዬ፤ ከኣርግማካ እን ኤምኑ ናሺዬን ወይ ከጎሺካ ማም እያይ ጌዬን ኦይድ ኦኬ ክየምጵንዻ ሙኔን። ⁴ እየው ክየም ክየም የኣያ ጊታኬና ጠቅምሼ ውር እንቃ ዬ፤ ኦይድ እን የጠቅምቴ እየው ኤታጋንጵን ቶዬን። ⁵ ቃቦ እን ኣኔንኬ ኢየሱስ ክርስቶሱጝ ካኣኒንቴባ ከየውዻ፤ ⁶ እሺ ከዴንታ ኔኒ ኣይባ ኣምላኬ ኣኔባዬ፤ ከባሪዮ ልኪ ኣዬን ካጌጳዽዮጝ ሻምኬ ኦኮኑጝ ካማሬ ሁሉኬኔ ካኒ ኮምኬን፤ ⁷ ኣይባዬ ቦው ዴንታካ ውርካ ዋድማዬ፤ ጌዬንኬ ዴንታካ ውርዻዬ፤ ሻማ እሺ ኤምኑ ማም እያይ፤ ⁸ ማቲኬ ውርዻዬ ዹዋልሼንባዬ፤ ሻማ እሺ ኤምኑ ይርክ፤ ሌይ ሃምካ ኣርሼኑጝ፤ እያይ ሌይ ሃምካ ኣርሼ ጻጵኔን ክያኑጝ ማቲያ ውር ኬና ካዋይ ኤርጎካ ውር። ⁹ ዬ ሻማ ባሪዮ ካሎን ዼጝ፤ ከሮጝዻ ፓይላ ኣያ ሮጝ እን ኣይ ዼጉጝ፤ ¹⁰ ይንዻ ከፎላዬ ከዳሊዬ፣ ከዳሊ ቱዎጝዻ፤ ኩዋምን ፓይላ ካኮምፓርሲሼ ሮጝካ ኢየሱሱጝ፤ ¹¹ ካትዳ ፓይላ ካጎቢዬ ባሪዮ ሹኖጝ፤ ኢየሱስ ክርስቶስ ኣዬ ታቹጝ ካጋዬ ማኝዬ ጊያ። {ከቢሊ ላሉጜን} ¹² ዬ ውርካ ናሺዺ ናኒ ዮ፤ ሹ ጮል ከእያይ የኣይቴ ውር ጊታኬና ዋይሼን ውር ፓይላጝ፤ ካንዻ ኣን ሃኣኔንባ ኦካ ቋጩር ጉዩጵኔኔ፣ ሳጊዻ ጋን ከሹ እን ሃማሬ ኣኔኑጝ ከሪግዬ ከሪጅኔኔ ሹዋጵሽባ ባይሼን ጉዩ። ¹³ ኬካ ክያጃ ሹቃ ዎሼኔ ኣሽጅዬኔ ከኣሽኪ ኦጉዩ ቱዎጝ ሃባሪዮዬ። ¹⁴ ኦኬ ክየምጵንዻ ከማር ጉንዱምኔኔ ዜርምኔኔ ኣሽኪባ፣ ¹⁵ ይንዻ ከኦካ ጫቃንካ ጅሼን ቆሬጜ ጋራጜ ኣይ ጊታኬና ኣይ ጫንቃሌ ማር ዻባሞ ኣንኔኔ ማር ኦኬ ጋራዻ ኣኔኑጝ ሃሃንታካ ባሪዮ፤ ከቢሊ ሃእን ከላሉጝቴ ፔን ፓይላ ክያኑጝ። ¹⁶ የቱቱካያ ክያጃ እንካ ዻቆዻያጝ፤ ከማር ማም እያይ ጉኩኔ ወይ ከማር ማም እያይ ዻቼኔ ከሹካ ክርስቶስ ማቲባ ኬናካ ቃይሲ ኣን። ¹⁷ ኣይባዬ ከእምነት ጉዩ ጋላዬ ዋድማዬ ክያኒ እሬኔ ኬካ ቁርባንካ ማቴንያጝ ከእየው ፓይላ ዋዝንሲ ኣንባ፤ ሃዋዝንዽባዳ። ¹⁸ እየውዻ እያይ ከኣን ከዋዝንዽቴዬ ከሻምቴ ዋዛጝ ሁሉኩሼባ። {ጢሞቴዎሴ ኣፍሮዲጡዬ} ¹⁹ ሃዋይ ናንዳካ እየወ ዋዝንሲባ ኣን፤ ካይዕሲሼ ጢሞቴዎስ ሃሚን ጉዩ ይሪካጝ ከኢየሱስ ታቺ እኑጝ ሃሻሚባ ቃቦ ሹቃ። ²⁰ ናንዳካ እየው ሹቃ ሻሜን ውር ኬና ቃቢኬ እሺ ኬሸን ኣኔኬን፤ ²¹ ውር ፓይላ ማር ናንዳካ ኢየሱስ ክርስቶሴኔ ጉኬ ጆል ናንዳካ ኦኬ ጊዬይ ቋቁሼን። ²² ኣይባዬ ከእያይ የእባጅቶጝ ጢሞቴዎስ ሃውር ኬና ማኚሺ ኒን ኣዬን ኔኒ፤ ሃንታ ከእያይ ዋድምዬ ከሹኖጝ፤ ኣሽክያ ከኣን ዋድማካ ክያጃ ሹቃ። ²³ ኣኪ ከእያይ ሃእያሜ ኣዬን እን ናኒ ካሌሜኑጝ ካይዕሲዬውጝ ሃሻሚባ ቃቦ። ²⁴ ኣንዻ ካኩዋዌ ይሪካጝ ሃኤርሜንያ ከታቺ እን። ²⁵ ፕርዻ ጪኔ ናኒ፤ ውር ጊታይ ሃኣሽክንቴ ከጋጝ፤ ጊታይ ኣይኬ ኣን ፓፃኖጝ፤ ኦይን ካዎሺሽ ኣን ፓይላ ከሹሹምቢቴ ኣኑጝ፤ እን ሃይዕሲሼ እየውዻ፣ ውር እን ኣይካ ሜርሜር ጉዩ ኣፍሮዲጡ ካዋሻ ይዕሲሼ እየው ማቲ ኬናካ ዎሺሼ ሃጌይያ። ²⁶ እሺ ፎሽካዽባ እየው ፓይላዬ፤ ናንዳካጝ ዋዬ ዴምኔን ጊዬይዻ ጫንቂያ። ²⁷ ከኣኩሉክዻ ዴምኔ ሄክሻ ሃምካ ኣርሼኑጝ ዬ ባሪዮ ሻምሼያ እሺ ሺዕሺዬን፤ ከኦካ ሞይካዾ ሞይካዾ ካማርሼ ኣን ጎኩምኔን፤ ሃኬ ኣንዻ ፓይላ ዬ ማር ኔኒጵኔን። ²⁸ ዬ የቶያያ እሺ እንቃያጝ ካዋዝንሲዬ እየው ጫኒቂዬን ናኒዻ ካኣዬኬ ባዶጝ ሃጊቢያ ይዕሲዬን። ²⁹ ከዋዛ ቦባ ከታቺ እን፤ ውር ጊታይ ኣይኬ እሺዻ ጎቢባ። ³⁰ እሺዻ እን እየው የማርቴ ኣን ኣዬን ቻሊዬኑጝ ሺጝ ናንዳካ ዋድማ ኔኒ ቋቁሼንያጝ፤ ኣይን ናንዳካ ዻቆ ኔኒዻ ማር ቃቢዬኔ፤ ናንዳካ ዋድማካ ክርስቶስ ሄክሻ ሃምካ ቶካ ኣርሼኔ።