¹ ውርካ ናሺዺ ናኒ ዮ፤ ይን ጋን ሃቶኩሼ እየው ሃሜርሜር ናኒ እንካ ላንሳጝ። ሃቶኩሼ እየው ሜርሜር ዻ ጊታጙጝ ከጬይሺ ቃቦ ሹቃ እንጉዩ ካሻኔ ቃቢዬ ጊያ። ² ፕርዻ ከሌሜን ከውርካ ቶካ ባሪዮ ክያጃ እን ሃሳዎጝ ፕርዻ ከታካ ሐዋርያታን ሃኤርጎ እን ጋይኔ ከታቺ እን ጉዋዩዬ እንካ ባይሺሽ ኡዋወ። ³ ከኦካ ፓይላ ሌምሺዬ እባጅባ ይዕጝ፤ ከቦን እንካ ቱንሱጝ ኣርግማ እን ጉዩ ኣይ ጋራጝ ኦግታይካ ላሊ ፓዬንባ። ⁴ «እንግንዻ ሺጝ፣ «ሃኩንባ» እን ሺጝ እያይ ኣኪ ኣኔን ኦን? ሹቡጋን ጋርሾጝ ካርሲኬ ሌሜንካ ኦግታይ ሙኔዬ ሌይ ኣይ ጋኑጝ ኦኬ ፓይላ ከእያይ ኣኖጝ ቆባ። ⁵ ኣይባዬ እንግን ውራን ጊታይ ፎላ ካርሲኬ ኦባዬ ከእያይ ሙኔኬ ክያጃካ ባሪዮዬ ቆቦጝ፣ ዳሊዻ ሙኔ ኦካ ጫቃንካ ሙዋዌ ሙኔኬ ሙዋዻ ቡዲባ ይሪካ እያይ፤ ⁶ ከሹዋን ጊታይ ፔን እን ኣኖጝ ላላቂኬ ሙዋዌ ካይያ። ⁷ ፕር ከክያጃ እን ፎላን ጊታይ ኣኔን ጋኔ ዳሊዬ፣ ሌይ ሃምካ ውርካ ሴሶ ካካህዮጝ ሌይ ሃምካ ሹካ ኮምሼኑጝ ካሊያ እንግን ከጉ። ⁸ ውርካ ናሺዺ ናኒ ዮ፤ ከታካ ታቺ እን ሹ ክየም ከቦን ሺ ክየም፣ ቦን ሺ ክየምዻ ካማቲዬ ከሹ ክየሙጝ ኦይዲ ክያጃ ክየም ይጝ ጌርሺንቴን። ⁹ ውር ክየም ክየም ዋሽኬ ኦኮኑጝ ካኡፑኔዬ ታቺ ክያጃ እን ኔኒካ ቃቦጝ ሹዋጵሼን ኡፔንኬን፤ ኣይባዬ ዎሽ እን ውር ክየምጵንዻ ካማሬ ካህዬኔ፣ ውር ፓይላ ካሄክሼ ሃምካ ይሁኔኑጝ ዶንሺባ ናንዳካ እየው። ¹⁰ ዬ ሹካ ታቺ እን ኩንባ ኬጓርጉ፤ ከሹ እን ጊታይካ ፎላግ ሳጊባ ከናቅዲ ታቺ፤ ኦግታይ ሙኔ ፎላ ዾዮክዻ ካይባ ከጉ፤ ከዳሊዬ ከኦግታይ ኣኔን ኦኔኒዻዬ ፓይላ ጉዱባ። ¹¹ ኣኪ ኦኬ ፓይላ ሃኦኬናካ ካህኬ ዴንታጝያጝ፣ ካሁሉኩሻ እየው ውር ሃይነት ኬና ኣኔን እያን ማቲዬን? ይንጌ፣ ከቆብቴኬ ይሁኔኔ መንፈስካ ኣኩሉክ ሁሉኩሼ እየውባ፤ ¹² ፕርዻ የካሊና ሹካ ባሪዮዬ ኩኔን ኔኒ ካኩዋው ይሪካዬ ከሻምቶጝ ሁሉኩሼ። ከሹ እን ፎላ ጉዱብኬ ጉወ ካህባ፤ ኦግታይ ሙኔ ፎላ ዾዮክዻ ኣቲባ ከቄጭቲ ኬና ኣይ ታቺ። ¹³ ዬ ኡዋው እንካ ቆብቴ ጫንቃሉጝ ፎላ ሃሊ እኔ ዳሊ ሃሊ እኔ ከክያጃካ ቃቦ ሹቃ እኑጝ ሃካሊያባ። ¹⁴ ዬ ውርካ ናሺዺ ናኒ ዮ፤ ናንዳካጝ የኣይቴ ጊታኬና ካሊዬን ኦኬ ጊታጝ ፓይላጝ፣ ከኣይ ጊታኬና ማር ኦኬ ጋራ ኣኔኔ ጊታኬና ማር ዻባሞ ኣኔኔ ከጌይንቶጝ ቁዋቅትሽባ። ¹⁵ ኦኬ ዶንሺዬንካ ታቺ እን ጉዋዩጝ ኣዬ እን እየው ከባይሽቶጝ ቃቢባ፤ ፕርዻ ጪኔ ጉዋዩ ጳውሎስ ከእያይ ጋዬ እሺ ፓካልማሞጝ ቶኩሼያ እየው፤ ¹⁶ እሺ ናንዳካ ኦግታጝ ቶኳ ከሜርሜር ኔኒ ፓይላ፤ ከኦካ ሜርሜር ጊታይ ኣኔ ኦግታይ ከእባጅቴ ይርካጝ። ውር ጊታይ ኦኬ እባጄን ጆጊሼዬ ጊታይ ሌምዬን ማር ኣኔኔ ናንዳካ ወርቀት ውርካ ባሪዮ እንቃ ጊታይ ከእያይካ ሻሜ ቆሮጝ፣ ጊታይዻ ፕር ከሴሶ ጊታይ ጊዬዩጝ ሻምባ ቆሮ። ¹⁷ ኣኪ ውርካ ናሺዺ ናኒ ዮ፤ ናንዳካጝ የሌምሼ እባጅቴ ይኑጝ፣ ከኦይን የቁዋቅትሼ ጎርቶጝ ካማር እየው ከኦኬ ጊያምሼንካ ውር ጊታይካ ሴሶዬ ከማርቴ ቡዴኑጝ ኣጅቴባ። ¹⁸ ኣይባዬ ከታቺ እን ጉዋዩዬ ከእን ኣይካ ባይሼን ጉዋዩዬ ጌጵሺባ ከኣይኔንካ ኢየሱስ ክርስቶሴ ኦኬ እባጄኔ፤ ናንዳካ እሺ ካንዻ፣ ጎቢንታካ ቦን ጮል ካኣይባ፤ ኣሜን።