¹ ኣይባዬ ውርካ ቶካ ባሪዮ ጊታይካ ሾሮጝ ጋኒኔ ኦካ ጫቃንካ ውሬ ፕርዻ ከኦካ ጫቃን ጉዩ ውርካ እርርሲኔንካ ሾሮ ናሹጝጋ፤ እንግንዻ ኣይኒን ታቺ እን እየው የኬራፍቶጝ ቡዲዬ እርርሲኔን ጊታይካ ቦፓይኔ ካዮጝ ዾቁሼባ ከድኬን፤ ከይንዻ ቦሼባ እንግን ኤታጋን ካዮ ኬና ኣይ ሉጉድ። ² ውር ጁዋኑ ዻዬባ ዴንታ ጊታኬና ኣይ ጋራጋራ ከክያጃ እን ጊዬይዻ ይርባ ጉዋር እን ኣይ ኣኩሉኩጝ። ³ ውርካ እርርሲኔን ጊታጝካ ሾሮጝ ዛንዽዬኔ ከኦግታይ ጊዬይ ሙኖጝ ላላቅሲ እንግንባ። ኮምሼን ጊዬይ ካርሲኬ ኦባዬ ሃሼኪሚ፤ እንካ ካይሲ እንግንዻ ኡጝኬን። ⁴ ጊታይ ኣሽክዬን ሴሶጝ ባሪዮ ውርካ ኤርጎ ማር እንግን ዻዹጝኔኔ ፓቅሼ እንግን ሃምካ ገሃነሜ ናንዳካ ኮምሼን ኣጁጛ እንግን ሃምካ ይግን እን ኣይ ድሙጉያጝ ⁵ እን ሜይሼን ውር ጫንቃላን ክያጃዻጝ ኖኀ ከውር ጊታይ ኣይ ሶጳ ዶክ ባይሺሼ ማር ፔን ጊታባካ ሌሜን ዻዹጝኔኔ ከኦካ ውር ጊታይካ ሴሶጝ ቦኩኔ ሙዋካ ካዮጝ፣ ⁶ ፕርዻ ናንዳካ ጊታይ ኣሽክዬን ሴሶጝ ፓይላ ካማቲዬ ሄክንሶጝ ከተማ ጊታይካ ሶዶሜ ካገሞራጝ ሌይ ሃንካ ማቲዬ ቡዎሉጝ ኮምሼ እንግን ኡዱቤኑጝ፣ ⁷ እን ኣይ ጫንቃሌ ከእን ቃጋዽዬ ከሴሶዬ ከውር ጊታይ ኣሽክዬን ኩጳሞዬ ኡፌን ዻዓሺዬ ሎጡጝ፣ ⁸ ውር ጫንቃል እን ኡፍ ኦካ ጫቃን ጊዬይያጝ ናንዳካ ኦግታይ ጌዬዬ ናንዳካ ኦግታይ ዋዬዬ ናፒሴ ኔኒ ሹ ጮል ከሴሶ ጊታይ ጊዬይ ጋሽክዬ ጆሎጝ ጫኒቅህንዻጝ፣ ⁹ ታቺ እን፣ ከኣኩሉክ ጊታይ ኣኔን ይያሪ ኪውኔኔ ቆቤኑጝ ከፓታና ሻም እያን ካባይሺሼ እንግኔ ቃጢ ውር ጊታይካ ሴሶዬ ከሹ እንካ ኮምሼን ሻም እያን ካማንክዬዬ ካኡፑሺሼ እንግኑጝ ጊባጃ። ¹⁰ ሳጊዻ ከኣርግማ ጋራ ጊታይ ጊዬዩጝ ኦግታይ ኣሩጝ ጊዬይ ዎሺሾጝ ጊታይካ ዻዬዬ ጊታይ ቦውዬን ጌጳሞዬ ማንኪ እንግኔ ኡፑሽባ ናንዳካ ኮምሼን። ውራን ጊታጝ ናንዳካጝ ጋዬ ሾዩዬ ጋዬ ውር ጊታይ ኣሽክዬን ኦኬ ጋራጋራጝ ይራ ኦግታይ ሙኔ ፎላ ዾዮክያጝ ሪግሼንኬን፤ ¹¹ ኣይባዬ ውርካ ኤርጎ ከኦግዬይ ሳሲ ጋይባ ቁዋቃኔ ሳጋኔ ጋኔብባዬ፣ ከኦካ ማሪካ ታቺ እን ሜይሼኬን እንግን ክያጃካ ይርኔን። ¹² ዬ እንግን ውራን ጊታጝ ከኦይን ማሬ እባጄኑጝ ሳወ ይሬንባ፤ ከእያይ ጅሼ እንግን ናንዳካ ጎሜኔ ናንዳካ ኒሼኑጝ፣ ከፓዬኬ ጵራጵራ ጊዬይጵኔ ጋይ ዳቢካ ጊታይ ጊታይ ማር ቃቦካ ሻን ኣኔኑጝ፤ ካክህዬዻጝ ሃኬ ዳቢ። ¹³ ናንዳካ ሴሶ ጊይዬይ ካሺዬንካ ሴሶ እንካ ሁሉኩሾጝ ቦባ፤ ሼሊያ እንግን ከኡሼንካ ሹሽያጝ ኮምባ ከዋዛ፤ ጋኔና ኦካ ኣማያጝ ማቲ ውር ጊታይ ኣይ ጋራዬ ኣሽክዬን ኦኬ ጋራዬ ቆባ ከእየው ኦካ ኣማካ ናሺማ፤ ¹⁴ ከእን ካርቡ ጊዬይ ክያኒ ቋቋ ኣርግማጝ ከኦካ ሴሶ ኣሽክዬን ዺያንኬን፤ ጊያምሺሽባ ውራን ጊታይ ኣይ ቁዋቃጝ፤ ጋኔ ሻን ጊታኬና ዱሲ ኦኬ ጊያምሼን፤ ጋይ ጊታኬና ጋሺዬ። ¹⁵ ጎይድ ጉዋር እን ኣይ ልኪዬ፣ ዻዬ ጉዋርካ ውዋካ ቢዖርን እን ናሺዬን ካሺዬንካ ሴሶዬ ጉዋያ፤ ¹⁶ ዬ እሺ ጎሪያ ናንዳካ ኦኬ ሳስክዬን፤ ኡኩሊ ሃማር ሃሳውኔን ቻሊዬን ሃሳወን ከቶግካ ውሬ ሪባ ጮዬንካ ውር እንካ ቶግካ ባሪዮጝ። ¹⁷ እንግን ውራን ጊታጝ ጋይ ጱሉ እን ጼዽዬ ሉፍ ጊታይ ቦወኬ ፑጉዬ፤ ጫንቃል እን ካሊያ እንግንዻ ሃኦኬ ድሙጉ፤ ¹⁸ ከኦካ ጫቃንካ ጊታይ ሃሳወን ክያጃ ጊታይ ኣይ ማም እያይኔ ቆቡጝ ውር ጊታይ ዻቄ ፓዬኑጝ ከኦካ እንካ ሺጜ ከኣርግማካ ኣሩጝካ ኩጳሞጝ ቱዋኔንባዬ። ¹⁹ እንግን ናንዳካ እንግን ኤታጋን ጋይባ ውርካ ዋድማካ ካዮዬ ጋኔባዬ፣ ዋይሼንባ ውር ዶክ የቱላባ ነጻዬ ጋይባ እንግን ቃቦ ሹቃ፤ ውር ናንዳካ ኦይን ሻምሼ እሺ ሃሚኑጝ ናንዳካ ዳቢ እን ሃካይሲ። ²⁰ ከኢየሱስ ክርስቶስ እን ኣይ ታቺ ጉዋዩዬ ኣይካ ባይሼን ጉዋዩዬ ከእባጄን ዻቄኬ ኦኬ ጋራ ጊታይካ ፔኑጝ ጩዋ ፕር እንቃ ካይቄ እንግኔ ካዻቺሾጝ ከኦካ ባካ ሌሜን ሳጊ ዴንታ እን ጊዬይ ካታካ ሁሩጝ ማቲሼባ እንግን ሳጊ። ²¹ ጊባጄ ጉዋርካ ጫቃንላን ጩዋ ከኤርጎ ቅዱስ እን ሜይሼ እንግኑጝ ከኦይንካ ዋክሼ ሁሩጝ፣ ጉዋርካ ጫንቃላን ባካ ሌሜኑጝ ዋንቲ ማራ እባጄንያጝ ኣይሼያ እንግን ባሺ። ²² ክያኒ ዋክሼባ ኦኑጝ ኔኒ ቡሊኔ ካቱጝ» ፕርዻ «ቾፑ ሮኬናያጝ ዋኬ ጱልጱቴንባ ሲሮ ኪያኒ» ሄክንሴ እን ሺጚ እያይ ማቲሼባ እንግን ኣኩሉክ።