¹ ስምዖን ጴጥሮስ እን ኣይ ውርካ ዋድማካ ኢየሱስ ክርስቶሴ ሐዋርያዬ፤ ከኣምላክ ጉዋዩዬ ከእን ባይሼን ኡዋወ ከታካ ጫንቃልካ ኢየሱስ ክርስቶስ ከሃይነትካ ጎቢንታ እን ሃጌይቶጝ ናንዳካ ጊታይ ኣኔ እምነቱጝ፤ ² ከባሪዮዬ ከኢየሱስ ታቺ እን ጉዋዩዬ እባጄን ኣይኔኔ ሆፎዬ ካጁዋንትሼ እየውባ። {ሺወኔኔ እድኔኔ እባጄን} ³ ከጎቢንታ ኔኒዬ ከሹቃ ኣዬን ኔኒዬ ከእን ሺው ኡዋውጝ ከእሺ እባጄን ናንዳካ ዻቆዬ ናንዳካ መንፈስ እንካ ኣኩሉኬ ኦይንካ ዎሺሽ ኡዋው ፓይላ ኣያ ኡዋው ቁዋቅትካ ሃሳዋ ኔኒ። ⁴ ከእን ናሹጝኬ ኣርግማ ጋራጝ ከዴንታ ጋራ ጊታይ ኣኔን ፔኑጝ ክያኑጝ ዻቆ ዻቅኬ ኦጉዩዬ ከዴንታካ ሃሳዋ ኔኒ ከኣይቴ ጊታኬናካ ካሺምንቶጝ ከታካ ኦግታጝ ኣያ ኡዋው ቃቦ ሹቃ እን ካሎን ኣይ ታቺዬ ጎቢንታዬ። ⁵ ከክያጃጝ ከቁዋቅትሼን ኬና ኣይ ፓሲ ከኦካ እምነት ጉዩ ኦኬ ሹቃ ሌሜን ዎሺባ፤ ከኦካ ኦኬ ሹቃ ኦኬ እባጄን፣ ⁶ ከኦካ ኦኬ እባጄን እን ኤምኑ ሹቃሹቃ ሻሜን፣ ከኦካ እን ኤምኑ ሹቃሹቃ ሻሜን ከሌምዬን፣ ከኦካ ሌምዬን ውርካ መንፈስ እን ኣይካ ኣኩሉክ ማቲዬን፤ ⁷ ከኦካ ውርካ መንፈስካ ኣኩሉክ ማቲዬን ከጪኔካ ጋጝ ቃቢዬን፣ ከኦካ ከጪኔካ ጋጝ ቃቢኔን ሌምቴባ ናሺማ። ⁸ ዴንታን ጊታጝ ዋንቲ ጁዋንቲሼ ሺዽዬ ኣኔያ ኦጉዩያጝ ከኢየሱስ ክርስቶስ ታቺ እን እንጉዋዩ እባጄን ከኦይን ከኣይቴ ውርካ ማሜ ከማርቴ ካርቡ ኣኔኑጝ ማንኪ እየውባ። ⁹ ዬ ውር ጊታይ ማር ዴንታ ጊታይ ኣኔን እያጙጝ ሃጊታይ ማር ኦግታይ ኣኔን ዹክ ጌዬን ወይ ጋይ ሙሙዾ፤ ጌርሺኔያ ከኦካ ሴሶ ባካ ሌሜን ጊዬይ ጫንቃል ጌዬን። ¹⁰ ዬ ጪኒጌን ናኒ ዮ፤ ከእን ሺወ እየወ ከእን ግዲዬ እየወ ከኦካ ሌሜንካ ሌምዬን ሳጊ ቁዋቅትሽባ፤ ናንዳካኦ የሻማያ ኦግታጝያጝ የካትምናኬን ክየምጵንዻ፤ ¹¹ ከይንዻ ሃምካ ታቺ እን ጉዋዩዬ ሃምካ እን ባይሼን ኡዋወ ሃምካ ኢየሱስ ክርስቶሱጝ ሃምካ መንግስት እን ኣይካ ቦን ጮል ሻወን ኣይ እየውባ። {ሃሳዋካ ወርቀትካ ውር ጊታይካ ይሁኔን] ¹² ዬ ኣይኒን እን ከእባጅቴ ኦግታጜ ከኣኩሉክ እን የጎምቴዬ ከቁዋቅትሹጝ፣ ናንዳካ ኦግታጝ ሹ ጮል ከናንዳካ እየው ቃቢዬን ሃድርክትሼኬን። ¹³ ሌይ ሃም ካኣንቴ ኦካ ዱንኪዬንካ ዳሉጙጝ [እየው ጁጁሬ ጃሌን] ማቲ ሊኪዬ ጌዬንባ ኦናኒ፤ ¹⁴ ናንዳካኦ ዹዋልሼባ ኣን ኢየሱስ ክርስቶስ ታቺ እን ጉዋዩጝ ካኦይዴ ዱንኪዬን ይንካ ዳሊ ይሪካዬ ካካሞጝ ሃእባጅያ፤ ¹⁵ ኦግታጝ ሻማ እየው ዋናያጝ ጩዋ ሹ ጮል ከቃቢቶጝ ሃቁዋቅትሽባ። ¹⁶ ናንዳካ ቁዋቅትካ ኢየሱስ ክርስቶስ ታቺ እን ጉዋዩዬ ከእን ሃሜይሼ እየው ናንዳካ ኩኔን ኔኑጝ ይንጌ ሃጌያ ጌጳሞ ኔኒዬ ጊያ ዬ፣ ሃማራ ኦግታይ ጋሽክዬ ከፓክልማሞካ ውር ዻዬን፤ ¹⁷ ናንዳካኦ ከጎቢንታ እንካ ጌጳሞ ኔኑጝ «ከእሺ እን ዋዝንሲ ኣኑጝ ውዋ እን ናኒ ሃናሺዮጝ ሃይዕጝ» ናቅዲ እን ሺጚ እያይ ከሹ እን ኩኖጝ ከኦካ ባሪዮ ሹኔ ቦዋ ጎቢንታዬ ጌጳሞዬ፤ ¹⁸ ኡዋዻ ከሹ እን ሃኣኒንቴ ኦካ ጋግ እንካ ይሁኔኑጝ ናቅዲ ይን ኩንኬ ፎላ ዾዮኬ ሃዋያያ። ¹⁹ ኣኪካ ክያጃ እን ኣይካ ሃሳዋጝ ሜይሼያ ኡዋው ጃ፤ ምክር ሌይ ሃምካ ሃሪሼዬ ቢሊ እንካ ሃሪሻጝ ሌይ ሃምካ ላሉጜ ሻን ጉዩ ክያኑጝ፣ ናንዳካ ፓኖስ እን ላሉጚ ኦካ ራቅ እን ኣይ ድሙጉጝ ከእያይ ጋጅሾጝ እየውዻ ናንዳካ ክያጃጝ የኣጅቴያጝ የሻማባ ሹቃ። ²⁰ ከኦካ ፓይላ ከሌምሺዬ ከእባጅቴ ይጙጝ ሁሉኩሼ እየውባ፤ ክያጃካ ሃሳዋ እን ኣኔን ወርቀት ክያኑጝ ውር ክየምጵንዻ ማርኬ ጉዋር እንካ ሆኮልዬ እሺጵኔን፤ ²¹ ናንዳካኦ ሃሳዋ ከውር ጊታይ ይዕሲዬ ከሃምካ ባሪዮጝ ሻም እንግን ከመንፈስ ቅዱሴ ጊያ ሃሳወ ዬ ማር ኦኬና ኩንኬ ክያጃካ ውሬን።