¹ ከእያይ ሃኣይቴ ጊታኬናካ ኣሽኪ ከባሪዮ ክየም ኣዬን ጉዋዩጝ፣ ኣይኔንካ ባሪዮ እን የቦቴዻ ከማርቴ ማም እያይ ሻምቴኑጝ ሃኤልቅምሼንያ እየው። ² እሺ ሺጝ፣ «ሃዋይያ ከዋዳ እን ኣይ ልኩጝ፤ ሃኬልሺያ ከሹካ ዻዓሾዻ። እየዎ፤ ዋዳ እን ኣይ ልኩጝ ሃጋን፤ ሹካ ባይሼንዻ ሃጋን። {ጋሎ እን ጳውሎስ ጌዮጝ} ³ ካማር ዋድማ ጉዋዩ ዻቢሺዬን፣ ካማቲቴ ውር ክየምጵንዻ ኦኬ ጋራጝ ሃዎሻኬን። ⁴ ካኣይባዬ ኦግታይካ ሻምቶጝ ፓይላ ሃቦፓይንቴባ ኡዋው ኤታጋን ከውርካ ውድማካ ባሪዮ፥ ከኦኬ ዶንሺዬን ጁዋኑ፣ ከጋሎ፣ ከኦኬ ጋራ፣ ከጫንቂዬን፣ ⁵ ከሙርኔን፣ ከቁምኔን፣ ከላላቅምኔን፣ ከጁዋንትካ ዋድማ፣ ከሩዋቱክ ካይሲዬን፣ ከካሽ፣ ⁶ ከጫንቃል ኣዬን፣ ከኦኬ እባጄን፣ ከኦኬ ዶንሺኔን፣ ከሹቃቲ፣ ከመንፈስ ቅዱስ፣ ከናሺማ ኬና ኣይ ኣኩሉክ፣ ⁷ ከክያጃ ኬና ኣይ ኣኩሉክ፣ ከቁዋቅትካ ባሪዮ፣ ከቡዋ ቡዎኔ ከዋርካታዬ ከኣንቲቲካ ፓር ኬና ኣይ ጫንቃል ጎሜን፣ ⁸ ከጎቢንታዬ ከቦዋዽዬኔ፣ ከጎሺዬኔ ከይሪኔኔ፣ ሃቆባያ፤ ፕርዻ ሃኣያ ውር ጊታኬና ኣይካ ኣኩሉክያጝ ዋይሼያ ኡዋው ውርካ ሾሮ፤ ⁹ ሃኣያባ ጊታኬና ጊባጄዬ ሃማቲያያ ጊታኬና ማሬ እባጄን፤ ሺጚሺኒን ኡዋው ጋርሻያጝ እየዎ ሃኣንቴባ ከዻቆ፤ ሙርኒን ኡዋውጝ ሃካና ግያምናኬን፤ ¹⁰ ሃኣያ ጊታኬና ሞይካዽዬንያጝ ሹ ጮል ሃኣያካ ዋዛ፤ ሃኣያ ኩፓንያጝ ሃሻማባ ውር ጁዋናን ሆድሞ፤ ሃኣያ ጊታኬና ማር ኦኬ ክየምጵንዻ ኣኔንያጝ ፓይላ ሃጉዋዩ። ¹¹ ውርካ ቆሮንቶስ ዮ፤ ሃሜይቴያ እየው ኦኬ ፓይላ ጃ፤ ሃሻማ ሻን ጉዩ [ወለሌ] ሃቦውቴያ እየው። ¹² ዛልሜንኬ ናሺማ ጉዩጝ ሃእየው ዬ ኡዋው ሃካና ዛሊምቴኬን እየው ናሺማ ጉዋዩ። ¹³ ከእያይ የኣይቴ ሃንታ ናኑጝ ሃሜይሼባ እየው ይጝ፤ እየውዻ ከእያይ ልኪ ሻም ሻን ጉዩ [ወላሌ] ቦውቴ ኡዋውባ። {እን ማሬኬ ውር ጊታይ ማር ኣምኒዬን ክየም ማቲዬኑጝ} ¹⁴ ከውር ጊታይ ማር ኣምኒዬኑጝ ኦይድኬ ጉዋር ኬና ኣይ ልኪ ፓዬን፤ ውር ጫንቃል ከውርካ ሴሶ ኣና ጌይኔንካ ኦ? ኦሜሌልካ ከድሙጉ ኣና ኦ ከጋጝ ኣዬን? ¹⁵ ክርስቶስካ ከቤልሆር ኣና ኦ ከጋጝ ዋይሺኔን? ውር እን ኣምኒ ከውር እን ማር ኣምኒዬን ኣና ኦ ከጋጝ ክየም ኣዬን? ¹⁶ ቶኦካ ባሪዮ ከኦግታይ ኣይኬ ኦካ ባሪዮ ሹኑኩጝ ኣና ኦ ከጋጝ ዋይሺኔን? ኡዋው ሃኣያ ቶኦካ ይሁኔንካ ባሪዮ፤ ባሪዮ ሺጝ እያጌ ሃሳዋ፤ ሃኡፊባ ከእንግን፤ ሃጃላጆልባ ከኦካ ጫቃን ጊዬይዻ፤ ሃማቲባ ኣምላክ ጊዬይ እንግንዻ ማቲባ ዛርሲ ናኒ። ¹⁷ ዬ ቱልባ ከኦካ ጫቃን ጊዬይ፤ ጌይ ዋና ማቲባ ናኒ፤ ኦይድ ኦኬ ጋራ ጊታይ ዱሜን፤ ኣንዻ ሃቦው እየውባ። ¹⁸ ኣን ሃማቲባ ሹቡጊን፤ እየውዻ የማቲያባ ሃንታካ ጁሙዬ ሃንታካ እጛሽ ናኒዬ፤ ሺጝ እያይ ታቺ እን እባጂ ኦኬ ፓይላጝ።