ሜርሜርካ ሐዋርያ ጳውሎስ እያጝካ ውርካ ቆሮንቶስ እንካ
1
ከክያጃካ ባሪዮ ከጳውሎስ እን ኣይ ሐዋርያካ ኢየሱስ ክርስቶስ፣ ከጪኒጌን ጉዋዩዻ ከጢሞቴዎስ፤ ናንዳካ ቶኦካ ይሁኔንካ ባሪዮ እን ኣኔን ቆሮንቶስ ፕርዻ ከውርካ ይሁኔን ጊታይ ቆቤን ኣካይያ ፓይላ፤
2
ከሹኔ ጉዋዩ ከባሪዮ፤ ከታቺ እንዻ ኣይኔንካ ኢየሱስ ክርስቶሴ ሆፎዬ ካኣይኬ እየው። {ኣምላክ እንካ ሌሞጝ}
3
ሹኔ እንካ ቶይኔኑጝ፣ እን ኣይ ኣምላካ ሌሞዻ ፓይላ ኣምላካ ኢየሱስ ክርስቶስ ታቺ እን ጉዋዩጝ ካጉዋንባ።
4
ኡዋዻ ከሌሞ ኣዬን እን ሃቦቴኬ ኦካ ባሪዮ፣ ካቻሊቴ ጊታይ ኣኔን ጋሎ ክያኒ ሌምሲዬኑጝ፣ እሺ ሌምሲባ ኡዋው ከኦካ ጋሎ ጉዋዩ ፓይላ።
5
ጋሊዬንካ ክርስቶስ ከእያይ ጁዋንቲሼ ኦጉዋዩጝ ሌምዬን ጉዋዩዻ ጁዋንቲሼ ኡዋባ ኬታይ ኔኑጝ።
6
ካጌይ ጋሎጝ ናንዳካ እየው ሃሌሞዬ ባይሼኔ። ከሌሚ ጋሎ እን ኡዋው ሃጌይቶጝ ከቦወን ከሌምቴ ከዶንሺዬኑጝ ናንዳካ እየው ሃሌምዬን።
7
ቃቦ እን ጉዋዩ ኣይ ናንዳካ እየው ሃቁዋቃ ናንዳካ ኦ ከእያይ የኣይቴ ከኦካ ጋሎ ጉዋዩ ፓይላጝ ከኦካ ሌምዬን ጉዋዩዻ ከኣንቶጝ ሃእባጃያ።
8
ጪኒጌን ናኒ ዮ፤ ሃዎሻ እንኬ እባጅቴ ጋሎ እን ሄክሽ ኡዋው እስያጝ፤ ኣይን እንካ ቆብቴኬ ዻቆጝ ሌይ ሃምካ ቱምቴ ቃቦጝ ጋሎ ቁዋቃ ኬና ኣይኬ ኦካ ካንታ ጉዋዩ ሳጊ ሄክሻ ኡዋው።
9
ከኣኩሉክ ኮምሼ ኡዋው ኮምሼንካ ኣርሼኑጝ ሃኣኒና ዋዬን፤ ይንዻ ኣዮጝ ካኤርምንቴ ከባሪዮ እን ቲት ጊታይ ኣርሹጝ ዬ፣ ካማርኬ ኡዋው ኤታጋን ኤርምኔኔ ጊያ።
10
እሺ ሺጛ እያይንያጝ ባይሺሻ ኡዋው ከኦካ ኣርሼን፤ ባይሺሽባ ኡዋውዻ፤ ከታካ ሌሜንዻ ካባይሺሼ ኡዋውጝ ሃሻምቴያ እሺ ቃቦ ጉዋዩ።
11
እየውዻ ኬልሺ ኡዋውባ ከይሁኔን ጉዩ፤ ከይሁኔንካ ውር ጁዋናን ናንዳካ ኣይኔን እን ጋዬ ኡዋውጝ ውር ጁዋኑ ካሻምባ ጎሺ ናንዳካ ኡዋው። {ጳውሎስ ኦኩንሲያ ቃቦ ኔኒ}
12
ኣኪ [ቃያ ጉዋዩ] ሃይዕጝ፤ ከኦካ ፔኑጝ ሳጊዻ ከጋጝ ኣዬን እን ጉዋዩ ኣይኬ እየውጝ፣ ከይሁሺኔን ኬና ኣይኬ ባሪዮ ካብቴ ሹቃጝ መንፈስ ጉዋዩ ማኝሼ ኡዋባ፤ ይንዻ ማርኬ ፓካልማሞካ ውሬኔ፣ ሃኬ ኣይኔንካ ባሪዮ።
13
ሃቶኩቴኬን እየው ኦይካ ከማርቴ ኮሜን ወይ እባጄን ቻሊዬኑጝ፤ ከእባጅቴ ፓይላጝ ሃሻማባ ቃቦ።
14
እየው ከእያይ የቃይቴኬ ኡዋው ፓይላ ኡዋዻ ካቃይቴ እየው ጋን እን የእባጅቶጝ ኣይኒን ዋናዋናጝ፣ ከሹካ ኢየሱስ ታቺ እን የእባጃባ ፓይላ።
15
ከይን ናንዳካ ጋዬ ኣኩሉኩጝ ከጠቅምቴ ጆፉጝ፣ ከሌሜን ሃቃቢያ እየው ኩዬ ቶዬን።
16
ሃኩይሼያ እያጝካ መቄዶንያያጝ ከጉዋር ኩዬን ናኒ ካቶዬ እየወ ከመቄዶንያዻ ከዋኬኬ ታይ ጉዩዬ ሃኩይሼ እያጝካ ይሁዳያጝ ከጃሌን ናኒ ከኬልሺቴ ኣኑጝ ሃቃቢያ።
17
ሃቃቢያ ይጝያጝ የዋሻኬ ኦኮኑጝ ሃማሬ ቃቢዬኔ ሃሻሜኪ? ሞ ከዱሱምኔንካ ፔኑጝ ሃሺጚ ይንጌወ፣ ይንጌ» ሺጜን ፕር ይሪካ ኣይኬን፣ የዋሻኬ ኦኮኑጝ ሃሺጜ ኣይኬኒ?
18
ባሪዮ ከእያይ ኣዬ ሹቃጝ ፓይላ፣ ክያጃ እንካ ሜይቴ እየው ካኣዬ ይንጌ፣ ወይ ኣይኬኑጝ ቻሊሜንኬን፤
19
ናንዳካኦ ኣይኒን ኣኑጝ ኣይኒን ሲላሴ ጢሞቴዎሱጝ፣ ኢየሱስ ክርስቶስ እን ኡዋው ሃሜይቴ እየውጝ ማር ኬና ኣይ ይንጌወ፣ ኣይኬኔን፤ ኣይባዬ ሹ ጮል ከእሺ ሃይንጌ።
20
ቃቦ ጊታይ ጋይኔ ከባሪዮጝ ፓይላ፣ ካኣዬ ይንጌውጝ ሃኬ እሺ፤ ኡዋዻ ኬታይ ኔኑጝ ናንዳካ ጎቢንታካ ባሪዮ ሃሺጝቴ ኣሜኑጝ ሃናንዳካ እን።
21
ኣኪ፣ ኡዋዻ እየውዻ ካቁዋቅትሽቴኬ ክርስቶሴ ካጎርቶጝ ሻሚ ኡዋውጝ ሃባሪዮ፤ ጵሺ ኡዋዻ ሃእሺ፤
22
ካኣይቴ ኔኑጝ ሻምሼ ኡዋው ማኅታሙጝ ፕርዻ ናንዳካ ኦይን ካጌይቴኬ ታካ ሌሜኑጝ ኣጁጝ መንፈስ ኔኒ ሻን ጉዋዩ ክያኑጝ ሃእሺ።
23
ሃማሬ እያጝካ ቆሮንቶስ ዋኬ ኩኔኑጝ ሃሺጚ ካማር እየው ቦኩንሲዬኔ ጊያ፤ ይን ማራ ኣኩሉክ ኣዬንያጝ ባሪዮ ካማኝሺሼ ኣንባ።
24
ከቁዋቅትሼ ጎርቶጝ ናንዳካጝ ኣዬኬ እምነቱጝ፣ ከዋዝንዽቶጝ ሃኣሽክያባ ከእየው ዬ ማር እን ካጌጳዽቴኬ እምነት ጉዩዬን።