¹ وقال الله القدير : أوذا انا ش أبعث رسولي , يهيئ الطريق قدامي , والمولى اللي انتوا مراعيين له يجي فجئة لا بيته , عيجي رسول العهد اللي انتوا تشتوه., هاذا كلام المولى القدير . ² لكن من اللي عيتحمل جيته . ومن اللي عيثبت حين يظهر ؟ فهو مثل النار ينقى , وكصابون ينظف . ³ ويجلس سعما اللي بينقي الذهب والفضة , وعينقي بني لاوي ويصفيهم ساع الذهب والفضة ويقربوا القربان لله صادقين . ⁴ ويقبل المولى قربان يهوذا والقدس , سعما الايام اللي سارت والسنين السابقة .. ⁵ وأقرب منكم واحكمكم واكون شاهد عليم على السحرة والفاسدين واللي بيحلفوا زور . واللي بيشلوا أجرة العمال وحق المرملات والايتام وبيظلموا الغرباء ومابيفتجعوش مني . ⁶ (( وانا المولى مابين اتغيرش , ولا انتوا يا عيال يعقوب*ماقد نفيتكمش ⁷ من ايام أبائكم بتهربوا من فرايضي ومابتعملوش بها . أرجعوا لي وانا أرجع لكم . لكن انتوا بتقولوا كيف عنرجع ؟. ⁸ وسئلكم : البشر بيسرقوا الله ؟ أنتوا سرقتوني , وبتقولوا ايش سرقناك ؟ سرقتوني العشور والقرابين . ⁹ فلذلك لعنتكم , ولعنت الأمة كلها , لانو انتوا بتسرقوني . ¹⁰ هاتوا كل العشور للمخزن علميد يوقع في بيتي أكل . واختبروني بهاذي , لاني أفتح لكم أبواب السماء , وافيض عليكم بركة وماتقدروش تسحبوها من كبرها.. ¹¹ وأمنع عليكم الحشرات , وعلى الأمة بكلها , ولا تاكل محصول الارض , ولاتفسد عليكم ثمار أراضيكم , ولا يسقط العنب من الكرم قبل ماينضج في الحقول , هاذا كلام المولى القدير ... ¹² وكل الآمم تداعيكم بالشعب المبارك . لان بلادكم ع تكون بلاد الفرح . ,, هاذا كلام المولى القدير .. ¹³ وقال المولى : أنتوا قلتوا فيني كلام قاسي . وبتسئلوا : أيش قلنا عليك ؟ , ¹⁴ وقلتوا : مابش فايدة من عبادة الله . وايش ربحنا من تنفيذ أوامره , ومن ندمنا قدامه على اللي فعلناه ؟ ¹⁵ مابلا لقينا أن المتكبرين مرتاحين , واللي بيفعلوا شر بيفلحوا , واللي بيتحدوا الله بينجوا . ,,, ¹⁶ وحاكي اللي بيتقوا الله كلهم , أن المولى بيسمع ويصغي لكلامهم . وبيتم تسجيل هاذا في كتاب في وجوده , علميد يذكر اللي بيتقوا المولى وبيكرموا اسمه ¹⁷ وقال المولى القدير : هولاء هم لي . وفي هاذك اليوم اخليهم شعب خاص لي . واشفق عليهم سعما يشفق الاب على أبنه اللي بيخدمه .. ¹⁸ وبعد هاذا تقدروا تميزوا مرة ثانية بين الصالح والخبيث , وبين من بيعبد الله ومن مابيعبدهش ..