¹ وذلحين شلولكم من الله هاذي الوصية ياكهنة . ² (( أذا كنتوا مابتسمعوش لي , ولا بتبالوا من القلب وتكرموا أسمي , أنا الله القدير , أرسل عليكم لعنة , وأخلي بركتكم لعنة لأني لعنتها لأنكم مابتبالوش بوصيتي . ³ هيا قدنا بين أمنع عليكم الزرع وأرجم وجيهكم بين القمامة , قمامة ذبايح أعيادكم , وبعدكم مني , ⁴ وتدروا أني رسلت لكم هاذي الوصية ويثبت عهدي مع بني لاوي أبنائكم * . ⁵ وكان عهدي معه للحياة والسلام , وأديتهم له علميد يفتجع مني , وأفتجع واهتاب من أسمي . ⁶ وشريعة الحق كانت في فمه ومانطقوا بالكذب , وسار معي بالسلام والأستقامة ورد خيرات من الناس عن الذنب .. ⁷ فم الكاهن بيحفظ المعرفة , ومن فمه تطلب الشريعة لانو رسول الله القدير )) .. ⁸ وقال الله القدير : (( أما أنتوا ابتعدتوا ذلحين من الطريق , وخليتوا خيرات من الناس بيفتجعوا من الشريعة , ونقضتىوا عهد أبوكم لاوي .. ⁹ وأنا والكل شا أخليكم منبوذين سفلة عند كل الشعب , مادام وانتوا ماحفظتوش طريقي وجاملتوا هاذا وذاك في حكمكم )) .. ¹⁰ أو مابش معانا كلنا اب واحد ؟ ومعانا رب واحد خلقنا ؟ وليش بيغدر كل واحد بالثاني وبنجس عهد الله مع أباْئنا ؟. ¹¹ وغدر بيت يهوذا وخيانتهم بالله , لأن يهوذا نجس البيت المقدس اللي بيحبه الله , وحبوا واتزوجوا بنات الهة غريبة .. ¹² وكل من عيفعل هاذا , حتى ولو بيدي قربان للمولى القدير , وأن المولى عيبيده من جماعة بني أسرائيل .. ¹³ وفعلتوا هاذا والكل : وبتغطوا منصة المولى بالدموع والبكاء , لانه ماعيبسرش للتضحية منكم ولا عيرضى بها من أيديكم . ¹⁴ وتقولوا : ليش ؟ وأقلكم : لآن الله كان شاهد بينك وبين أمراة شبابك الي غدرت فيها وهي شريكة حياتك والمرأة اللي عاهدتها بالوفاء . ¹⁵ لآن الله هو اللي خلاكم واحد في الجسم والروح . وليش ؟ علميد يوقع لكم اولاد وينتموا لله . واحذر من ان تخون مراة شبابك ... ¹⁶ وقال المولى : أنا اكره الطلاق, وأكره الرجال اللي بيظلم زوجته وكأنو بيلبس ثوبه ! واحذروا , لاتخونوا ,, هاذا كلام المولى القدير . ¹⁷ انتوا تعبتوا المولى بكلامكم وبتقولوا : كيف تعبناه ؟ اتعبتوه بقولكم : كل من عيفعل شر فهو طيب في نضر الله وعيجي له الفرج , أو بقولكم : وينهو آلآله العادل ؟ ..