¹ وأشتي أذكرك بأنه بالأيام الأخيرة شتجي أوقات صعبة. ² فيكون الناس مُحبين لأنفسهم ، محبين للفلوس، متكبرين، مغرورين، شتامين ، مش مطيعين للوالدين، ناكرين للجميل، فاسدين، ³ بلا شفقه، مش متسامحين، مفترين، متهورين ، شرسين، يكرهوا الخيرات ⁴ خاينين، طايشين، متكبرين،يحبوا الملذات أكثر من الله، ⁵ يتمسكوا بمظاهر التقوى بس هم يرفضوا قوتها الفعالة.فابتعد عن هاذم الناس. ⁶ فمن هاذم الناس يدخلوا البيوت سكته، ويوقعين في حبالهم بعض البنات الضعيفات اللي هن مثقلات بالذنوب، اللي تجرفهن شهوات مختلفة، ⁷ يتعلمين دائماً ، بس هن ما يقدرنش أنهن يعرفين الحق أبداً. ⁸ ومثلما قاوم السحرة اللي هم ينيس ويمبريس موسى، كمان هاذم الناس يعارضوا الحق، عقولهم فاسدة، وهم غير أهل للإيمان. ⁹ بس هم ما شيزدادوش تقدم، لأن غباؤهم شيظهر بوضوح للجميع مثلما أنكشف غباوة ينيس ويمبريس. ¹⁰ أما انت فأنت تعرف كل شيء على عقيديتي وسلوكي وهدفي وإيماني وصبري ومحبتي وثباتي ¹¹ والتعذيب والأوجاع اللي حصلتها. أنت تعرف كل اللي حصل لي بأنطاكية وإيقونية ولسترة. كان تعذيب شديد ،بس المسيح أنقذنا منها كلها. ¹² فكل اللي يشتي إنو يعيش بالتقوى كمؤمن بالمسيح يسوع، يضطهدنه الناس. ¹³ اما الناس الأشرار والمحتالين فيزدادوا شر،يخدعوا غيرهم ويخدعوا انفسهم. ¹⁴ أما أنت أثبت على المبادئ اللي تعملته وآمنت فيبها. وتذكر على يد من تعلمت هذا. ¹⁵ لأنك من يوم لما كنت طفل كنت تعرف كتاب الله اللي يجعلك حكيم علشان تلاقي النجاة بالإيمان بالمسيح يسوع. ¹⁶ كل الكتاب هو موحى به من الله ، ونافع لتعليم الحق وتوبيخ الظلال، وتصحيح الخطأ ، والإرشاد الى الصلاح. ¹⁷ علشان يكون الشخص اللي ينتمي لله مُجهز ومؤهل ليقوم بكل عمل صالح.