¹ Na Foruini, nono Timotini naini, uwa da Yesu Kerisonu waiya amara fuakayai. Godinu tamuaru uwara, Yesu Kerisonu ibi roma ya yesina Firifi suro ibinita, yanu dai sosi su yawoeta uwaraini, nono yanu dikoni uwara bairo ewe owawa, yanae yabairo mataituba eyawe. ² Iyanu Baba Godini, Yesu Keriso iyanu maowere muneta amaraini umanu ure nuda totori sina iya bairo maisi. ³ Nana yabaue imutada, Godi bairo wema irau aiye utautane. ⁴ Aine wabara ure, nanu nui yabaue wautane yaru bobo. ⁵ I botai kowa roma , Godinu waiya gonuro uwe ewa, ewa arebe eweda are farita, iba yabairo yaru daiwere matautane. ⁶ Na iwata, i emeru da ainama waiya ubirite uwe arebi, i amarama waiya uwe maitua reifiro Yesu Kerisonu nono owere fareta kowa idua fafisu. ⁷ Nanu ofero tara tautane, ewe darei da irau aiye rau, danu ubi da ya yesina nanu toto tai ubarenaro ibinita. Na dumu suro ibitararo, yana nabaue Godi bairo nui webitaba, iba ya yesina nanu ure nuda waiya gonuro uwara,nanu ofe garauini nono Godinu sina we ma boroya reibisi. ⁸ Iba Godi da ibai iwata, anene ya yesina baue totori utebitara i. Iyari enoba Yesu Keriso daini, iyaba totori daiwere utasu. ⁹ Enoba ewe da nanu we siboro yabaue utautane: Ibaue yanu baimueta imue gowo uforo iba yanu iwataini, nono yanu Godi baimueta yesina daiwere sifisu. ¹⁰ Enoba, me irau aiye toto mane imufote, maba ufoita iye da irau aiye rau, iba nono ya irau imueta mane imteifoitaba, Yesu Kerisonu nono owere fafisu wabararo yabaue wayai da wefiyeita. ¹¹ Irau aiye uweta sinetanu ana taima wate fafisu iyanu ofeni uburo, i rao da Yesu Keriso bai roma arasu, Godinu arioni nono danu yaru daiwere aratasu. ¹² Awoina nanu unu kakamutu, ewe sina, ya iwata siyawe. Ane ure yanae nanu ofero farite, Godinu sina madaiwere ui. ¹³ I dai gamani uwaranu aineta orofa yawoeta uwarama naba eno weita,na Yesu Keriso sina naue gowo utasu amara, iba da dumu suro ibinua eno iwata sinaita. ¹⁴ Mui kakamutu, nana dumu suro ibinero erada, umanu baimueta Yesu Keriso bairo ba imutda,danu sina we gowo utaita, uma mui uwaraini iyarawa. ¹⁵ Mui uwara uma Yesu Kerisonu sina wefitae ba naini dua da utaita, roma nono mui uwara uma Yesu Keriso ba imutada danu waiya uwe gowo utaita. ¹⁶ I duburo, Godinu sina waita uwara uma iwata sinaita, nana Yesu Kerisonu sina mune derena siyanada inare kekei utautane. ¹⁷ Nono dako wene uwara uma Yesu Kerisonu sina irau toto imutada wetawa, nono taigorai imueta imutawa. Umana imutaita i da nana Yesu Kerisonu sina we madaira umaua eno imutate iba na mune dumu suro oitaro ibine. ¹⁸ Nono ane sina wemau? Sina da idua imane i uwara umanu imueta irau aiye imutaitaba, nono me ayari--- umadeina meo,meo sina waitaba, nono ba Yesu Kerisonu sina waitaro na yaru daiwere utautane. Uma yesina Yesu Kerisonu sina waita iba na toto yaru daiwere utautane. ¹⁹ Iyari enoba na iwata sinautane, ya yesina naba Godibairo we siboro utaiba iba Yesu Kerisonu irau aiye imumuma na mawirofite, na dumu suroma mune wawaro odifiro amumau. ²⁰ I da nanu unu daiwere, toro utautane, imutautane, ibauwe na maru daumau, roma inare kekei umau, awoinaini, nono aine wabara ure Yesu Kerisonu ibi we madai ute mau, nanu oferoini, nanu mauriro, nanu uiyetaroini. ²¹ iyari enoba, na ewe duboro ibimau i da Yesu Keriso bauwe ibimau, nono uwie mau i da Yesu Kerisonu irau aiye araeta maowere mumau. ²² Roma na ewe ofero ibimau i da, nanu uweta sineta da ana tai uwane basu enanari uwanasu da nanu waiya uweta uwara. Iba ane maowere mumau? Na iwatawa. ²³ Enoba na i abanaro mameta da kekei were. Nanu unu da animate Yesu Kerisoini, ibimau, i da irau aiye rau, ²⁴ Enoba ofero ibeta ini da irau, anu ibi roma. ²⁵ Iba nanu toto muniba, na iwata sineba na eweda yaini gonuro ibada yanu unu waiya uteimaro, yanu Godi ba imueta kekei sifiro, ya i rao, rao efote yaru daiwere ufoita. ²⁶ Ibaue nabai roma, iwata daiwere mufote, Yesu Kerisonu ibi wema daiwere utada yaru ufoita. ²⁷ Yanu mane, Yesu Kerisonu sina naue gowo utaita uwaraba, irau aiye uweta sineta mane uwe gowo uwawe. Iba yabairo famauba nono me ariba, yanu irau aiye uweta sineta mane nana naumau. Ibaue ya yesina Godinu sina nauwe gowo ufote danu imumuro inare kekei ufote, imueta taigorai roma i waiya utada yanu baimueta Godinu sinaro inare kekei uwawe. ²⁸ Yanu wasai uwaraba da iyawe wete, umanu unu da uwawe. I yanu wasai uwaranu maoweta sina da eweda, uma da Godima mufite i me yarene, yarene inaro siyafiro inama yafiro nono ya yesina Godima mawirofite, me ibene ibene orofaro odifiro ibifoita. Iba Godinu sina ewedaya eyawe. ²⁹ Iyari enoba, Godima me sara yabairo mai, Yesu Keriso ubi roma, yanu baimueta mane meroma nono ya ure yanae ufiyeita. ³⁰ Nabairo daira urane yarane fariro eri, i da nono awoina ana nautasu.