¹ Eto Bada Iesu amo David ta ohihi, eto David amo Abraham ta ohihi ra, eto enana ta ohihi ta jajavo pepa ta kakajekari amore evira. ² Eto Abraham amo Isaac ta mama ra, eto Isaac amo Jacob ta mama ra, eto Jacob amo Judah te amita namei kamei te amita mama ra. ³ Eto Judah amo Perez te Zerah te amita mama, eto enana ta e amo Tamar ra, Perez amo Hezron ta mama ra, eto Hezron amo Ram ta mama ra. ⁴ Eto Ram amo Amminadab ta mama ra, Amminadab amo Nahshon ta mama, eto Nahshon amo Salmon ta mama ra. ⁵ Salmon te Rahab te amo Boaz ta e mamo ra, Boaz te Ruth te amo Obed ta e mamo ra, eto Obed amo Jesse ta mama ra. ⁶ Jesse amo Israel ta tihi jigari embo pajire David amita mama ra, David te Uriah ta ae amite amo Solomon ta e mamo ra. ⁷ Eto Solomon amo Rehoboam ta mama ra, Rehoboam amo Abijah ta mama, eto Abijah amo Asa ta mama ra. ⁸ Eto Asa amo Jehoshaphat ta mama ra, Jehoshaphat amo Joram ta mama, eto Joram amo Uzziah ta epe ra. ⁹ Eto Uzziah amo Jotham ta mama ra, Jotham amo Ahaz ta mama, eto Ahaz amo Hezekiah ta mama ra. ¹⁰ Eto Hezekiah amo Manasseh ta mama ra, Manasseh amo Amon ta mama, eto Amon amo Josiah ta mama ra. ¹¹ Josiah amo Jechoniah te amita namei kamei amiga umbuto Babylon enda ta tipura pahuera iji amite ta epe ra. ¹² Eto Babylon enda ta tipura umbuto pato ikihara amita ambota, Jechoniah amo Shealtiel ta mama ra, eto Shealtiel amo Zerubbabel ta epe ra. ¹³ Eto Zerubbabel amo Abiud ta mama ra, Abiud amo Eliakim ta mama, eto Eliakim amo Azor ta mama ra. ¹⁴ Eto Azor amo Zadok ta mama ra, Zadok amo Achim ta mama, eto Achim amo Eliud ta mama ra. ¹⁵ Eto Eliud amo Eleazar ta mama ra, Eleazar amo Matthan ta mama, eto Matthan amo Jacob ta mama ra. ¹⁶ Eto Jacob amo pamone Mary ta ivu Joseph amita mama ra, eto pamone amina Bada ingenu embo na mei amita javo Iesu ke ijera. ¹⁷ Avoeto ohihi peae Abraham ta igoi te eto puto David ta igoi na kane ena amo ohihi tapa potin (14) ra, David igoi te eto puto Babylon enda ta tipura umbuto pahuera amo ainge ohihi tapa potin (14), eto Babylon enda ta tipura mihere kevuja ai eto puto Iesu e na ingena iji amite vahi amo ohihi tapa potin (14) ra. ¹⁸ Eto Bada Iesu ta ingari avo dei einge ta ijekihaja. Amo kakara Mary avo Bada Iesu ta e aisuja mihei avo pamone be avo e mamo na embo javo Joseph amiga jimbaja kerihara, rate enana avo puto vahita evae mihei pamone be avo mahu Ahihi Otohu ta sovera na enu urete ena avo keguera. ¹⁹ Rate Joseph pamone amita ivu amo embo javotoho avoeto pamone avo embo peae ta tihi ta ari me kiari avo uje ae eto, enana jimbara kerari avo embo kiae be isimbata toasi hotembihaja. ²⁰ Eto ke peae erevi Joseph na hotembihe mihei, Mama Otohu ta anera na ehure ta embo amita dei puto, ke einge ijija, Joseph, David ta ohihi, pamone Mary no ae umbari avo mane joru aisoa, amita be amo mei evi pamone emita jota irerembiha amo Ahihi Otohu na ehi urete ere ua. ²¹ Eto pamone emo mei singa ingasuja, eto inena mei emita javo amo Bada ikejo, amita be avo mei emina tohota embomei avo enana ta ari vasiri sasamuna ta orekasuja. ²² Eto pure peae be erevi ijekihaja amo do Mama Otohu na harika embo Isaiah ta dei enu mahu kajari avo be ua, amo ke einge ijija, ²³ "eto keisi keisi evujo, kakara eha embo ga evae avo urete asuja eto mei singa ingasuja, eto enana na mei amita javo amo Immanuel ikasora." Eto javo Immanuel amita ke be amo " Mama Otohu ungotena moga mihia." ²⁴ Eto Joseph amita evo ta ereto Mama Otohu ta anera na pure do embo amina aja ena avo uija amo Joseph na pamone avo amita ae ainge jimbuna. ²⁵ Rate embo avo pamone amiga evae hoi kakane eto mihinu pamone avo mei singa ingihaja. Ainge enu Joseph na mei amita javo Bada ikihaja.