¹ Eto mei Jesus avo Mary na da Bethlehem dei Judea amita jota ta mihia eto tihi jigari embo Herod amita iji te avo ingena, eto ainge enu, avo kuro ehekari embomei iji bihari hena ta iriora amina tohota kuro bihina avo kito avo Jerusalem putuhara, eto ke etoingari einge uera, ² ''Jews ta jihi jigari mei ingehera amo davore? Amita be amo nango tohota kuro iji bihari hena ta bihei kehera, eto nango embo be avo jakeka aisi ije puvera.'' ³ Eto ke erevi tihi jigari embo Herod na ingina , amo embo be amo osaga ena, eto embomei peae Jerusalem aita mihera amo bara osaga uera. ⁴ Ainge eto avo Herod na giu pari tihi jigirikari embo pepeni te avotari ke pepeni kakajeokari embo pepeni peae avo umbunu puto vahita uera, eto avo enana etoingari einge ena,''Iesu mo dei daige hena ta ingara ke ari re avo ungona na be ke avo keisi erena?'' ⁵ Ainge ehei avo enana na Herod hena ke einge ijera,''Da Bethlehem dei Judea amita jota ingasora, amita be amo Godi ta kiane embo na iji ku beta ke einge kajena, ⁶ 'Rate ungo da Bethlehem embomei enda Judah amita jota miheva, amo Judah ta da pepeni mihera avo inono ra, amita be amo ungo hena eto avo tihi jigari embo purusuja amina nau embomei Israel re simba aisuja.''' ⁷ Ainge eto avo Herod na kuro ehekari embomei avo embo kiae onjikari ta iji deina kuro amo bihinu avo etoingari ena. ⁸ Eto avo enana be amo Bethlehem ikenu pahore, avo ke einge ena,''Pambuto kito amo mei Jesus avo etokogobe eto ahe evujo. Eto mei avo hambuto kito, amo na ke ikevujo purou ingito, avo na bara pambuto mei be amo jakeka ane.'' ⁹ Eto Herod na ke ehei ingito amita ambota, amo enana be amo pahuera, eto pahuera amita jota, amo kuro enana ta da mihere bihunu kegara amina kihi enu kegue hae eto pahore pato mei Jesus mihia aita heteto jamo ena. ¹⁰ Eto enana na kuro avo pato hetenu kegara, amo enana amo hanana uve osa pajire be uera. ¹¹ Aingeto avore enana amo bande jota horeto avo mei Jesus amite tohota eh Mary ga kegara. Eto mei amo paunge tetereto avo jakeka uvera. Eto enana ta donda hande ikasi hambeka ta umputuhara amo peseto avo donda gold na ari, frankincense, eto myrrh avo hande ikihara. ¹² Eto enana be avo mume te ai evere avo Godi ta arnera ehure ta puto enana avo mane Herod hena egerembara ke enu ingito , avo dei ohu neita tiuketo avo enana ta da ta pauhera. ¹³ Eto enana avo pauhera amita ambota, avo Joseph mume te evei avo Godi ta arnera na ehureta puto ke einge ena, Joseph umo ere, ereto mei Jesus te tohota eh ga umba, eto avo da Egypt pambujo. Eto ai mihijo avo nane dei avo toae ano avo toasoa, amita be amo Herod re mei avo jombure eto tau sari aja ije uva ro.'' ¹⁴ Aingeto avo mume amite avo, Joseph be amo ereto mei te eh te umbuto avo da Egypt aita pahera. ¹⁵ Eto enana be amo da Egypt ai irisi mihere Herod amo sari ena. Eto pure emore do Godi na tohota kiane embo na ke einge aja enu ena aravo be ijekena,'' Nane da Egypt ai eto nau mei aravo jage ehena.'' ¹⁶ Eto Herod be amo embomei iji bihari hena ta eto putuhara amina embo be avo urumba ehera ainge avo kina, eto embo be amo hini kambari samuna be ena. Eto aingeto avo mei hatira singa peaebe Bethlehem ta eto da engihita peambe ai mihera jua tahavo nei eto amita huta behija avo tohota isoro embomei ikenu pato tetekehere sasari uvera, iji do kuro kegara amina inono beta ehere ingina ai heteto ena. ¹⁷ Eto kiane embo Jeremiah na iji ku beta ke do ari mihia avo be ijeekena, eto ke amore einge ari ra, ¹⁸ '' Da Ramah aita haveve pajire be avo ingihera, eto haveve amore si erera eto sorara pajire ra, eto Rachael na tohota mei hatira embo si eria, eto pamone be amo kekota aro amo uje ae uva, amita be amo enana re peaesasari ehera.'' ¹⁹ Eto eha Herod avo sari ehei, avo pure einge uvera, Joseph Egypt mihei avo Godi ta arnera naehure ta putuhaja, eto puto ke einge ena, ²⁰ '' Umo ereto avo mei te eh te umbuto avo Israel embo ta enda ai pambujo, amita be amo mei amo evi taro sari aja ije uvera embomei amo mahu sari ehera.'' ²¹ Aingeto arnera na ke ainge enu avo Joseph be amo ereto, mei te eh te uhaja, eto avo Israel embomei ta enda ta puto horihaja. ²² Rate Joseph na ke ingina amo Archalaus avo tohota mamo ta besi avo amina umbuto avo da Judea avo simba uva, eto embo be avo ai pambari avo joru be ena. Eto amita ambota Godi na ehure ta embo be avo ke enu inginu, avo embo be amo da avo toto Galilee pahuija ²³ eto pato da pajire javo Nazareth ai mihaihija. Eto pure erevi ari amore do Godi ta kione embomei na iji ku beta Jesus avo javo Nazarene ke ara ari mihia aravo be puto ijekehija.