¹ Eige Agrippa raki Paul kironu, "Avahu ai dainehe gena ana gavisa, Eige Paul raki au ada inugi hakivanu au mageve dainehe. ² " Daka hegiri vime daki, King Agrippa, di meve dainehe daki o rogi ai vagotonehe Jew gahavaia a boriti gahane gava dainehe, ³ badivara aka Jew yau maguri ve aubougi renu berebe va gainage dibana ra, eige daki a imigima aka di gare ihi mage gahisa. ⁴ Jew yabera dibanara dana orena kimena da di aviehe maguri vi orogi negu, di matamehe renu Jerusalem uhura. ⁵ Yauka di maguri ganaive dibanara yauna riaga gahisa romena yau, daka Pharisee koita vara, yau magurivera bera beta ra ni aena meve uhura. ⁶ Eduge dakamu o yai vagotonehe ramanu, badivara di ananave ra ominuo uhurage Dirava ni iahu yauni kinera. ⁷ Ominue ora ni toneta ve utube abu misa roare iaga vara yauka Dirava vahimi vanimi imigisa. uhu anana e uhurahe gera, King, Jew yaberaki da inara gaha. ⁸ Otavado be dainehe gena ya berabe ragoha, guma oreigena Dirava hoge, maguri gahi gevenu?" ⁹ Negubutu gera, davahu gera daki anana vima, daka iaga dadaga kisa Iesu Nazareth koitava ihehe daure gahisa. ¹⁰ Dakamu ena kinu Nazareth uhura. Dirava Aena koita mudago daki vadibu yagava gosigevenu, dubu baugeva yau ga hedokehe; renu yau gahi gevege, di anana vera beta yau rutagera. ¹¹ Nega mudago vara daki huhu mohi gevenu dubu uhura renu daki ganai berebe gahigevenu yauka avanage vagera yauki me mia. Yaukera daki ga gahigei ga berebeva renu yauka besibe ragohanu daka dagedage besugei ogo nuneva otinu. ¹² Da me e kiege dainehe, daki Damascus otege, dubu biava yabeki hedo da moimane dainehe; ¹³ King eige daki guma tanahe vani iahu uhura, abaga be eraganu vani abaga tage auki soiganu, vava seni ge auki uguhi rogare no ori gevenu da renu da ruta otege atavaia. ¹⁴ no ni bouge vata arirago hege, daki eno be ihige auki da ga-gahi ronu, Hebrew ga tahu, "Saul,Saul esemena a da daure gahima? a idi garena te rahavare, auka ai berebe goigoara ¹⁵ Ge daki,ronu, Ana unuhunu, Rohi Bauge? Rohi Bauge raki ronu, daka Iesu ra aki da daure gahima. ¹⁶ urimare rama, Dakamu ai vagotonehe gagae goinu, makavara aka di besube meve kiki koitava goime aki vanu, renu a eragevene iaganiva mati da ai gagae kiogevere yabera ana gagae rogeisa; ¹⁷ dakena Jew mati koita nune yau vagahe a maguri gahisa. badivara yau gasina ge daki a besugima. ¹⁸ Ge yau nie ramu bao rage-ge, yauma vadibu garehare abaga iagoisa renu yauma Satan hedoke garehare, Dirava gasina otisa. Eige yauna yau daureve geigevara mati yau gahune yauna misa, da riaga gahare gahavaia mati Aena gaha yau vagahe. ¹⁹ E dainehege King Agrippa, vava dai gagae goine iaganiva, daka besibe gahiga veitera. ²⁰ Eduge urigoi daki hari mage mi Damascus uyare koitava boriti gahi gevenu, mati Jerusalem, renu Judea matava inuhati,renu koita nune ya, daki hari mage boriti gahi gevenu makavara yauma maguri emene gare gevare Dirava gasina anigahare, maguri mage kisa. ²¹ e dainehege Jew yabeki dubu uhura da mare da gami hoekisa roege. ²² A yaheyahe vara Dirava gasina ge daki manu, vani ei ate negu butu. eige daki ramira berebe vare koita avie mati koita bauge Dirava gare boritiva vima daka iaga nune be gava veitera eduge Peroveta koitava renu Mose rone iaganiva yabera daki ro geima. ²³ Keriso ra huhu nagina vara, badiva auki urigoi hoge maguri vanu mati aukenaabaga gava visa ni koita th he yau mati koita nune yau. ²⁴ Paul ga netuege uhura, Festus raki enoge raho gahare ronu, "Paul, ai tinabe mina daurera; ai uhuvakehe raho veraki ai tine daure gahanu." ²⁵ Eduge Paul raki ronu, di tine ra daure goigo veitera, di Rohite Festus. e dainehege daki ga riaga mati uhu baobao gavara daki roma. ²⁶ King ra iaga o inuhati dibanara; e dainehege da ga-gahanu daka sigo veitera, makavara da me o kinera au vagotone hegera, badiva beta iorena ge daki ge daki kinu. ²⁷ King Agrippa, Ana Peroveta gahavaia riaga gahi geima? Daka dibanara akamu riaga gahi geima." ²⁸ Agrppa raki Paul kironu, aka di uhure iege daka vani tuake o uhura ekalesia goisa? ²⁹ Paul raki ronu, Dirava vagtone hege daki da gahara vare ganaga va vima,auna vani tuakenu se vani egevanu, beta a avahu eduge egu vani oi di gare ihare koitava inuhati yaka da nagate gahisa, eduge beta vadibu seiniva." ³⁰ King raki urimi ramanu,Governor, mati Bernice tage, renu yau ruga gurahege gahavaia; ³¹ yau berabe iaga bauge garehare hakiragane yauki bebe ga-ga gei roege," Koita ora riaga hoge me se isuke be kiki veitera." ³² Agrippa raki Festus kironu," Ata o Caesar ihe roro veite goinebe noka arige-ge auka otinu.