¹ IESU loi ivage ata voleu vaevage niveu bavualeta uva. ² Disaiboloea ivai IESU laviai avoe, Tisa, oleu kalau toelaluga aia mama luga ata kou ui nie solilu. ³ IESU lavigei avoe kaleva, aia mama kea toela olie solilu isito DILAVAu haukalave ke vai letatavage ataeau ivai. ⁴ Lai hauai ata keu da hanavale ke hauve ai, vali kalui usege vau loige atau ba haualivelu bele. ⁵ Daa vata koveo uge dau vata kou ataga dala kou. ⁶ IESU ke louito vatale tioai votage tobana olisege vai nive behaumalu. ⁷ Isi laviai avoe talivelu tabu lavuale ivi Sailomu kele ai ni totoa, ige eu tialeu au ni totoai niai kuialai lolu. ⁸ Ige ata keu oo biageabea ke ivai loui avoe au ata kela keu bela ata volela avo late, bela kuvala ugulumai daluava kela keu. ⁹ Ata volea loui avoe ata kela keu isege volea lou avoe be keu avo late. Igeto ba ataleu loui avoe dala. ¹⁰ Ige abo belai avoe ai niu esisiai nialu. ¹¹ Eu lavigei avoe ata IESU keu tobana ai vai di ni vavui loui avoe tai Sailomu ele ai ni totoa ige da tai ni totoai niai lolu. ¹² Ige ea loui avoe au oleveo, ige eu loui avoe da iva solilu. ¹³ Ige ea ata kevai Balisesea ataea tilu. ¹⁴ Kateivaleu bulalegau ke alu. IESU vatale tioai vai votaige tobana olisege vai nive vavui laviai avoe tai ele ai ni totoa, ige eu keai nialu. ¹⁵ Ige tota Balisesea belai avoe a esisiai nialu, ige eu loui avoe eu tobanata di ni vavui louge da tai emoai niai lolu. ¹⁶ Ige Balisese volea loui avoe ata keu DILAVA vileo loie solilu isi bula lehosivalu ige volea loui avoe toela avale atau ba aveve kateale alivelu bele. Kea vaki abuti ai leleisi ke belalai kalevai tievelu, tuvuige. ¹⁷ Ea tota nite ke belaevelu, a huhuige olela keu au ai ni alavalu ige eu loui avoe Beloveta ata volela. ¹⁸ Ige Diuia nona kevai lelevetie solilu isi ese ke aiaveta mamaveta toiavege ea lolu. ¹⁹ Abo belagei avoe au lai vola kou ni solisi ulu? au oleve kateai nialu? ²⁰ Ige aia mamau lavigei avoe mana loi vola keu, niveu keloaleta ualela keu. ²¹ Isito ave niale ke lo simalalu, au oleve kateai niale ke isi olela nive ke alavalu. Keu malahala keu belagau au ba ke loui. ²² Aia mamau Diu vabuiavei nona kateale alu Diuia memila huhuai avoe oleule loui koseige KELISOla keu ige lai lole dubule lovegei. ²³ Katealelu aia mamu Diu lavigei avoe keu vo kitaela keu, belagau ba lalai loui. ²⁴ Ige abo tota malaha ni kelote toiava loualu ige eu loige abo lavia avoe ai dua keneni DILAVA vavui hoeaseava IESU keu kalau toela atala keu. ²⁵ Ige malaha keu lavigei avoe da lulele solilu au keu kalau toela avalela, hau igalali di niu keloalela da ave nialu. ²⁶ Ige ea laviai avoe au alu vadeu alu? au oleve kateai ai ni alavalu? ²⁷ Eu lavigei avoe da memila la lavigealela ige la eviesolilu, isi tota belai uva au lale loi disaibolove olisi au lale? ²⁸ Ige ea avolu tuvuai dubitoeavai hanavage tilu avolu loui avoe, au Disaibolove oliso loea Mousese vile lolaea. ²⁹ Lo lulealu DILAVAu Mouseseti nonalu isito ata keu oleve kateai lolu. ³⁰ Ige Malaha keu lavigei avoe kou huhui kitaela kou, la huhue solilu atakeu oleve kateai loale isito di ni alavalu. ³¹ Lai huhuage DILAVAu ba kalau toela avale kea nona evilivelu bele isito ata vadeu duage aule ke nona evisi. ³² Vata kou iviavai loale keu uvue lai evie solilu ata beu, ni kelote valai uale ke nive alavage lai evie solilu. ³³ Ata keu DILAVA vileo loie solige aule ba valebe alivelu bele. ³⁴ Ige ea laviai avoe a keu kalau toelale ulu. Isi lohaiveva isi dubule lovaevelu. ³⁵ IESU evige abo dubule lovalu ige IESU ivai laviai avoe au a atau ese vai leleve tilu? ³⁶ Ige eu loui avoe olela keu kosive ige da valivelu vai lelevetisi? ³⁷ IESU laviai avoe avola ke aa malihava isi avoti nonava. ³⁸ Ige malaha keu loui avoe kosive, da avai leleve tilu, isi guliguli avalu. ³⁹ IESU loui avoe ataea avela da kaoai vatae lolu iale ni kelote keale niai isege niale keale niabeu keloai. ⁴⁰ Ige Balisese volea loi kele uale kea loui avoe au a huhuage lota loi niu keloalu. ⁴¹ Kateige IESU lavigei avoe lai niu keloige lae kalau toelau laele ue solilu. Isito ave la loui avoe loea nialu ige lai kalau toelau laili ulu.