¹ Dau di ivila Bolo DILAVAu olale da IESU KELISOu Abositolo olisi hauve ava. Iale dala di kakolo Timotiti levaleva ko kisaiai Kolosenia evievi ata lalai hanaviva. ² Loi kakoluvuia lo ivage laea lai evievi vai IESU KELISO vileo vaeavai melitavage lo kelega ke ivai olale DILAVA mama kitaeu la hoeaseavei laili ui tigei vali bahata. ³ Lo vali baita sisila ulale lalai guliguliai lai loi kosive IESU KELISO mama kitae laviava. ⁴ Kosealelu lo evige laea lai uvu vai iESU KELISO vileo vaeavai melitavai ui lai kakoluvulai olai dulugei hoeaseaveva keu duave. ⁵ Koto leleveu luta laeo lolige la ke evisi Otogoe tiveve ke huhuai koto ke valu. Isi DILAVAu Otogoe lalai valevile otoveale ke huhuai vole duluge dua ava. ⁶ Kotou dua keu vata bahata bavui tiva ige ataea ke evisi lovai tiva. Ige lata ke evisi lovai tige DILAVAu lalai hau otoveale keta la evisi melitavai olai ke agisi huhui keu lai uvule kitaeai tiva. ⁷ Di kakolo vole Ebabalasi lo avoti hauivale kela tialeu la haivege la koto leleve kele la lulelealu Ebabalasi keu kosiveu haule haudua avale ata. ⁸ Lo laeo tie solilu isito keu laeo tai lai hau dua ke ivai loi kosiveu munanau tuvu laele uge la hauai vole duluge dua avale ke loui lo haivelu. ⁹ Kateage lo lai aveve ke evisi meliai vali bahata lalai guliguliava olavale DILAVAu au lulele kitae lamege lale kele olave ke ula aevigeve. ¹⁰ Lo lalai guliguliai olavale kosive ola ke lale lovai tige luleleveule lai uvule kitaeage lale volelai olai vole dulugei volelai guliguliai meliai ugeve. ¹¹ Lo olale DILAVAu au siau kitaele la siauiavege aveve toela vadeu laele loige laba homasialivelu bele isito lale meliai ui tigeve. ¹² Lo olale lale vali bahata sisilai lai loi mama kitae hoeaseavai ui tigeve. Ilivelu au atalai hau moeaga otoveale ke agive vatavau atagai uale ke uvue. ¹³ DILAVA ke igalila vaviu aveve kele lailo agigei loi au lalokau vo IESU KELISOu adau vuvune valale otovege lai ui tiva Otogoe talivelu. ¹⁴ DILAVAu huhui vo kela lailoi toela ibilavelu lailoi toela totoalu IESU taota. ¹⁵ Ataea DILAVA iva solilu isito vove IESU keu loige ataea ivalu iale vove keu au mama late hau ko nenia ue solisege vove keu ulu. ¹⁶ Iale vove kelega hau bahata Otogole uale isi vatale uale ke nenia ulu. Kelega lai vale vile ivivale isi iva soliale kea ulu kelega vale vile tuvute kea Otogole ulu. Kea abo vuvunele vale vile bahata aevei olale kea bahata hoeaseavegei. ¹⁷ Valevilea bahata ue solisege ea ulu iale kea vuvunele vale vile keale vali bahata ui tigei. ¹⁸ IESU keu Ekalesia bahata kea kine isege Ekalesia kea vavave keu Ekalesia umuka. Keu memila voeleai kobelalu iale kelega Ekalesiale vovoi to ba kobekavai, au voeleai kobelale kelegau hau keneni leivigelu. ¹⁹ DILAVAu au olale au vo letatavai au aveve keneni vai avoele vaeavalu. ²⁰ DILAVAu vou idiu dole voeleale kelu louve ataea avoele ogela uale agigei loi igali toai hoeaseavei aboili ulu isi olale vale vilea Otogoe uvale isi vatae uvale ke hoeaseavege abole tota udua ai. ²¹ La memila DILAVA vilele ogela ui huhui toela ai aveve toela ai ke lehosivaeviva. ²² La memila kateiva isito IESU idiu toela dole voeleige kelu DILAVAu la agige la aike atave olilu. Keu la agigei olale la nivele ata tuvute olisi uge au ba lalai kotobe toela loulivelu bele. ²³ Lale lai evievile melitavai Otogoe tiveve ke huhuai uge keu duave. Isito isoho la koto leleve ke huhue solisi kalevage DILAVAule ke loui, la koto leleve ke evilu ige koto leleve keu ave vata ko bavui tiva. Iale koto leleve kela da ko loui ata haiveva. ²⁴ Da kotou dua loui la haivevale kele vateu tuvu agisi kele sisilalu. Kosealelu IESU KELISOu memila vateu tuvu agilu iale dale data vateu tuvu vai Ekalesia dulugei ige abo IESU KELISOu vateu tuvu vale kelate ai. ²⁵ DILAVAu da letatavage da ekalesia haivevale ata olilu keu siaulega da lae loi kotove bahata ke loui la haiveva. ²⁶ DILAVAu memila uale ata kelai au koto vai mahogovalu ige abo diba savalu isito aike au koto daiai louge ataea bahata kotove evisi vaevelu abobigalai kelu ata evisi amigalu vaso. ²⁷ DILAVAu memila IESU KELISOu loi ataeali igalitoai uveve koto ke mahogovalu isito keu aike koto ke daiai loui olale ata bahataea kotove ke evisi kele udua agei. Ige lata IESU laili igalitoai uvale kele lale Otogoe DILAVAu atagale uveve ke huhuai tigeve. ²⁸ Lale lo vatava bahatale tiale DILAVAu lulelele IESU koto loui ata haiveva, kosealelu lo olale ata igaligaliai IESU KELISO lovale kea abobiga neniavei DILAVAu nile lilikata ui. ²⁹ Katealelu IESU au siaule daa vai melitige da meliai kotove loui ata haiveva.