¹ Di kakolo oo Tiobilasi da olai kotou ioni vole loui a haivui. Da memila IESU vatae loale ata haivei ale ke kisaiai alu hanavalu. ² IESU Otogoe tie solisito munanau tuvu vuvunele au mohoho tuelo agigei au hau aveve loui lavigelu. ³ Au voelele kobelai to valiu ni voti ke uvule amiga vai au mohoho haivege abo kele luleleage eu voelele kobelalu. Isi vali moeaga aboe loi DILAVAu vatavau dogae uveve nona loui haiveva. ⁴ Iloho vali voleo abo igalitoai usege au lavigei avoe lake nenia momai Dielusalema kalevai tievivale isito uve isege da memila louale ke di mamau lamei. ⁵ Dioniu ata babatisogeve vale keu eulalega keu isito vali volea ue solisege munana tuvu vuvuneule laele loi. ⁶ Vali voleo IESU au mohohoeali igalitoai usege abo belai avoe kosive loea Iselala ata koea memila loi vata ko sisila ava. Isito ave vali kole ata nivolea loi. Loi vata ko sisiaeviva iale au ale valivelu loi kosive olisi lo dulugege lo loi vata ko vai sisilave ai ui. ⁷ Ige IESU lavigei avoe di mamau au vuvue aveve bahata dibalu isi olae soliale la lavigege la ke dibalivelu. ⁸ Isito da koto vole louge evive vaoe DILAVAu munanau tuvu laele loige lale vuvuneve kele di kotou dua ko loui Dielusalema oo keveo, Diudea vatae, Samalia vatae isi vata bahata ke haiveve. ⁹ Kateai louge vesuge mohohoea bea malihasege eu Otogoe vaeatilu. Tigeto goeu bavuge abo iva solilu isege eu tilu. ¹⁰ Abo Otogole IESU nimabisi usege ata abutiu ogona taete katuale keta solekata vavaeabele leleisi ulu. ¹¹ Isi lavigei avoe Galileia ataea la Otogoe vadeu malihai uva. IESU eue tige la ivale kelate aule ba tota dobai loi. ¹² Kateige abo Oliveta tala ke kalevai kevaluvisi Dielusalemae loevelu keu ege solilu. ¹³ Kateai loevealea abo memila oo volele uvale oo kele ue velu ese keala koea. Bita, Dioni, Diemisi, Enidulu, Bilibi, Tomasi, Batolomi, Matiu, Alobiesi vo Dieimisi, Selotia ata Saimoni isi Dieimisi vole vove Diudasi. ¹⁴ Kea bahata meliai DILAVA imiliaviva, laviava isege IESU aia Meli isi keate volea isi IESU lovuvu keta keveo meliai oo Giliai DILAVA laviava. ¹⁵ Kateavale valila Bitau kobelai evievi ata bahata uani handele tueniti haivelu. ¹⁶ Haivei loui avoe di kakoluvuia bahata evive memila voleo DILAVAu munana tuvu Deividi laviage au Diudasiu IESU kavaveve nona ke loulu iale koto keu ave leleve olilu. ¹⁷ Lai dibage keu lailoili IESU hau avale ata volela. ¹⁸ Isito au IESU valeke ibilave vai ela vata vole voialu vata kelega au dobai voeleige gogoveu dikohovoge deve koloea daialu. ¹⁹ Ige Dielusalemau ataea evige Diudasiu voelealu ige abo vatava ke aboi kotole ivi hai avoe Akemada koto keu baiveu kosealu taou lotiale vatava. ²⁰ Deividiu memila Diudasiu aveve ke Samusi Bukau uvule kisaiai avoe esevea ulivelu bele atave ke nenia vovoatilu. ²¹ Iale lai malaha vole vage au Diudasi lovo vai lailoili igali toai IESU kobelale koto ke loui ata haiei isito ata makale keu kosealu. ²² Ata oleu memila Dioniu IESU vai babatisoale ke ivai lovai loale IESU eue tiale ke ivai dibale ke lai lole makai letatavage au Diudasi lovo vai lailoili ui. ²³ Bitau koto kateale louge abo malaha abuti makalu, malaha vole ivila Dioseba ige voleu ivila Mataeasi Dioseba ivivolela Basabasi ige ivive volela Diasitasi. ²⁴ Ige abo guliguliai loui avoe kosive ai abositolo vole Diudasiu ai hau kalei voeleige a ibilave vavulu. Iale lo ave ata abuti ko makage oleule lovove vai. ²⁵ Loi kosive au ata bahataea uvu dibalu ialelu aike lo haivege lo ata igali makage au Diudasiu lovo vai. ²⁶ Kateaito ata abutita kea ivi vulele kisaiai to vai kavatuge oleu iviu eue uale keule Diudasi lovo vai. Abo aveve ke age Mataeasi iviu eule ulu, ige abo letatavage keu IESU abositolo vole olilu.